KEVCAI 24

Sib Nrauj

1 Thaum tus txivneej twg yuav tau pojniam, tiamsis tsis txaus siab rau tus pojniam vim yog paub tias nws poob koob lawm, mas tus txiv ua ntawv nrauj cev rau tus pojniam ntawd txhais tes thiab ntiab nws tawm hauv tsev mus mas nws thiaj li tawm mus.

2 Yog tus pojniam ntawd ho mus yuav dua txiv,

3 thiab tus txiv tom qab ntawd tsis nyiam nws thiab ua ntawv nrauj cev rau nws txhais tes thiab ntiab nws tawm hauv tsev mus, lossis yog tus txiv ntawd tuag lawm kuj xij,

4 mas tus qub txiv uas nrauj nws tawm mus ntawd rov yuav tsis tau tus pojniam uas qias tsis huv ntawd lawm, vim yog tej uas qias vuab tsuab rau (יחוח)Yahweh. Koj tsis txhob ua rau lub tebchaws uas (יחוח)Yahweh uas yog koj Tus Tswv muab pub ua qub txeeg qub teg rau koj muaj txim.

5 Thaum leejtwg nyuam qhuav yuav tau poj niam mas tsis txhob kheev tus ntawd mus ntaus rog lossis ua nom tswv li haujlwm. Cia nws nyob ib xyoos hauv tsev kom thiaj li ua rau nws tus pojniam uas nws yuav tau ntawd zoo siab.

Tej Kevcai

6 Tsis txhob kheev leejtwg muab luag hwm zeb los nias nqi cia, tsis hais txhib txiv lossis txhib niam, rau qhov nws muab yam uas yug lawv txojsia los nias lawm.

7 Yog leejtwg raug luag ntes vim yog nws nyiag ib tug kwvtij Ixayees coj mus ua qhev lossis coj mus muag, mas tus tub sab ntawd yuav tau raug muab tua. Ua li no nej thiaj li rhuav tshem tau tej kev phem tawm hauv nej mus.

8 Nej yuav tau ceev faj tej kev mob lig mob ruas, yuav tau ceev faj ua txhua yam raws li cov Levis uas ua pov thawj qhia nej. Nej yuav tau ceev faj ua raws li uas kuv twb hais rau lawv lawd.

9 Nej cia li nco txog tej uas (יחוח)Yahweh uas yog nej Tus Tswv tau ua rau Mili‑as rau thaum uas nej taug kev tawm hauv Iziv tebchaws los.  

10 Thaum koj muab ib yam abtsi txais rau kwvtij zej zog, mas tsis txhob nkag mus rau hauv nws lub tsev thiab muab yam uas nws muab yuam nqi rau koj.

11 Koj nyob sab nraud tos mas tus uas txais ntawd mam li coj yam uas muab yuam nqi ntawd tuaj rau koj.

12 Yog nws pluag mas tsis txhob khaws yam uas nws muab yuam ntawd cia es txawm mus pw.  

13 Thaum hnub poob qho, koj cia li muab lub tsho ntev thim rov rau nws, kom nws thiaj li tau hnav rau thaum uas pw thiab foom hmoov rau koj. Ua li no thiaj yog koj ua ncaj rau ntawm (יחוח)Yahweh uas yog koj Tus Tswv xub ntiag.

14 Koj tsis txhob quab yuam tus tub zog uas pluag thiab txom nyem, tsis hais yog koj li kwvtij lossis lwm haiv neeg uas nyob hauv koj lub tebchaws rau hauv koj tej moos.

15 Koj yuav tau them hnub ntawd li nqi zog rau nws ua ntej hnub poob qho, rau qhov nws pluag thiab tos ntsoov tus nqi zog ntawd, tsam ces nws yuav yws koj rau (יחוח)Yahweh ces koj yuav muaj txim.

16 Leej txiv yuav tsis ris nws tej menyuam lub txim tuag, thiab tej menyuam yuav tsis ris leej txiv lub txim tuag. Cia txhua tus nyias ris nyias lub txim tuag.

17 Koj tsis txhob yuam lwm haiv neeg uas nrog nej nyob thiab tej menyuam uas tsis muaj txiv txojcai thiab tsis txhob muab tej poj ntsuam li tsoos tsho coj los yuam nqi.

18 Koj yuav tau nco ntsoov tias nej tau ua qhev nyob hauv Iziv tebchaws thiab (יחוח)Yahweh uas yog nej Tus Tswv txhiv nej tawm qhov ntawd los. Vim li ntawd kuv thiaj hais kom koj ua li no.

19 Thaum koj sau qoob, yog tshuav qee teg sau tsis txhua, koj tsis txhob rov qab mus sau dua. Cia li tseg cia rau lwm haiv neeg uas nrog nej nyob thiab tej menyuam uas tsis muaj txiv thiab tej poj ntsuam, xwv (יחוח)Yahweh uas yog koj Tus Tswv thiaj li foom koob hmoov rau tej haujlwm uas koj txhais tes ua huvsi.   

20 Thaum koj nplawm txiv ntoo aulib, koj tsis txhob rov de zaum ob, yuav tseg cia rau lwm haiv neeg uas nrog nej nyob thiab tej me nyuam uas tsis muaj txiv thiab tej poj ntsuam.  

21 Thaum de txiv hmab hauv nej tej vaj, tsis txhob rov mus xawb de dua, yuav tseg tej uas tshuav ntawd cia rau lwm haiv neeg uas nrog nej nyob thiab tej menyuam uas tsis muaj txiv thiab tej poj ntsuam.

22 Koj yuav tau nco ntsoov tias koj tau ua qhev nyob hauv Iziv tebchaws. Vim li ntawd kuv thiaj hais kom koj ua li no.