1 Thaum muaj ob leeg ua plaub mus txog tsev tu plaub, es cov tu plaub tu rau nkawv tias ib tug txhaum ib tug tsis txhaum,

2 mas yog tus uas txhaum tsim nyog raug nplawm, tus tu plaub yuav kom nws pw mas tu kom nplawm npaum li nws kev txhaum tab meeg tus tu plaub.  

3 Yuav nplawm tau txog plaub caug nplawm, tsis txhob nplawm ntau dua ntawd, ntshai tsam ces nej yuav rhuav nws ntsej muag tab meeg sawvdaws.

4 Thaum nyuj tab tom tsuj qeb tsuj mog, nej tsis txhob muab tawb looj nyuj qhov ncauj. 

Kevcai Yuav Niam Tij

5 Yog muaj kwvtij nyob ua ke ib tug tuag lawm, tsis tau muaj tub, tus uas tuag ntawd tus pojniam tawm mus yuav txiv sab nraud tsis tau. Nws tus txiv ib tug kwvtij yuav tau yuav nws ua pojniam thiaj sawv nws tus txiv chaw.

6 Mas thawj tus tub uas yug los yuav muab ua tus kwvtij uas tuag lawm li tub kom nws lub npe thiaj tsis ploj hauv cov Ixayees mus.

7 Yog tus kwvtij ntawd tsis yeem yuav tus pojniam ntawd, mas tus pojniam ntawd yuav mus cuag cov kev txwj laug ntawm lub rooj loog thiab hais tias, kuv tus txiv tus kwvtij tsis yeem tuav nws tus kwvtij lub npe rau hauv cov Ixayees, nws tsis yeem sawv kuv tus txiv chaw. 

8 Mas cov kev txwj laug hauv lub moos ntawd yuav hu tus yawg ntawd tuaj nrog lawv hais. Yog nws tseem ua tawv qhawv hais tias, kuv tsis yeem yuav tus pojniam no,

9 ces tus pojniam ntawd yuav txav zog ze rau tus kwv tij ntawd tab meeg cov kev txwj laug chua kiag tus kwvtij ib sab khau thiab nto qaub ncaug rau tus kwvtij ntawd lub plhu thiab hais tias, tus uas tsis tuav nws tus kwvtij caj ces yeej raug li no.

10 Mas hauv cov Ixayees luag yuav hu tsev neeg no tias, tsev neeg uas raug chua khau hle.

​

Tej Kevcai

11 Thaum ob tug txivneej sib ntaus es ib tug tus pojniam txav ze mus pab nws tus txiv kom dim hauv tus uas ntaus ntawd txhais tes, nws cev tes loo mus chua tus txivneej tod chaw xis,

12 mas nej muab tus pojniam ntawd txhais tes txiav pov tseg, tsis txhob khuv xim li.   

13 Koj tsis txhob muaj ob lub thauj teev tsis sib luag cia hauv lub hnab, ib lub nyhav ib lub sib.

14 Koj tsis txhob muaj ob lub thoob tsis sib luag cia hauv koj lub tsev, ib lub loj ib lub me.   

15 Koj yuav tau muaj lub thauj teev uas haum thiab ncaj thiab muaj lub thoob uas haum thiab ncaj, xwv koj txojsia thiaj li ntev hauv lub tebchaws uas (יחוח)Yahweh uas yog koj Tus Tswv muab pub rau koj.

16 Rau qhov txhua tus uas ua li no, txhua tus uas ntxo luag noj li no, yog tibneeg qias vuab tsuab rau (יחוח)Yahweh uas yog koj Tus Tswv.

​

Rhuav Tshem Cov Amalej

17 Nco ntsoov txog tej uas thaum nej taug kev tawm hauv Iziv tebchaws los es cov Amalej ua rau nej.

18 Lawv tuaj ntaus nej rau ntawm tog kev uas nej tsaug tsaug leeg txog siav thiab muab nej cov uas maj mam mus tom qab txiav tua pov tseg.  Lawv tsis ntshai (יחוח)Yahweh li.  

19 Vim li no, thaum uas (יחוח)Yahweh uas yog nej Tus Tswv pub nej tau so tsis ua rog rau tej yeeb ncuab uas nyob ib ncig nej hauv lub tebchaws uas (יחוח)Yahweh uas yog nej Tus Tswv muab pub rau nej ua qub txeeg qub teg ua nej tug, ces nej cia li muab cov Amalej rhuav tshem kom ploj ntais hauv qab ntuj no kom tsis muaj leejtwg nco tau. Nej cia li nco ntsoov qhov no.