Kevcai Xyeem Thawj Phaum Qoob Thiab Ib Feem Kaum

1 Thaum koj mus rau hauv lub tebchaws uas (יחוח)Yahweh uas yog koj Tus Tswv pub ua qub txeeg qub teg rau koj, thiab koj txeeb tau ua koj tug thiab nyob rau hauv lawm. 

2 Koj yuav tau muab txhua yam qoob thawj phaum uas koj sau tau hauv lub tebchaws uas (יחוח)Yahweh uas yog koj Tus Tswv pub rau koj ib txhia tso rau hauv lub tawb coj mus rau ntawm lub chaw uas (יחוח)Yahweh uas yog koj Tus Tswv yuav xaiv cia rau nws lub npe nyob.   

3 Koj yuav mus cuag tus pov thawj uas ua haujlwm rau lub sijhawm ntawd mas hais rau nws tias, hnub no kuv lees rau (יחוח)Yahweh uas yog koj Tus Tswv hais tias, kuv tau los nyob lub tebchaws uas (יחוח)Yahweh cog lus ruaj khov rau peb tej poj koob yawm txwv tias yuav pub rau peb.

4 Mas tus pov thawj yuav txais lub tawb ntawm koj txhais tes coj mus tso rau ntawm ()Yahweh uas yog koj Tus Tswv lub thaj xyeem ib sab.

5 Koj yuav tau hais li no rau ntawm (יחוח)Yahweh uas yog koj Tus Tswv xub ntiag tias, kuv txiv yog tibneeg Alas uas mus mus los los, thiab thaum nws nqis mus nyob nram Iziv tebchaws, nws muaj tibneeg tsawg tsawg xwb.  Nyob qhov ntawd nws huaj vam ua ib haiv neeg loj thiab muaj zog thiab muaj tibneeg coob.

6 Mas cov Iziv ua nruj ua tsiv rau peb thiab ua rau peb txom nyem nyuaj siab thiab quab yuam peb ua qhev khwv kawg nkaus.

7 Mas peb thiaj quaj thov (יחוח)Yahweh uas yog peb tej poj koob yawm txwv Tus Tswv, (יחוח)Yahweh thiaj hnov peb lub suab thov thiab pom peb tej kev txom nyem nyuaj siab, tej haujlwm khwv thiab tej uas peb raug quab yuam.  

8 (יחוח)Yahweh siv nws txhais tes uas muaj hwjchim thiab nws txhais npab uas tsa hlo thiab nws lub hwjchim uas txaus ntshai heev thiab tej txujci loj thiab txujci tseem ceeb `coj peb tawm hauv Iziv tebchaws.

9 Nws coj peb los txog ntawm no thiab pub lub tebchaws no rau peb, yog lub tebchaws uas muaj kua mis thiab zib ntab ntws nto.

10 Au (יחוח)Yahweh, nimno kuv coj thawj phaum qoob loo hauv teb uas koj pub rau kuv tuaj. Mas koj yuav muab cov qoob loo ntawd tso rau ntawm (יחוח)Yahweh uas yog koj Tus Tswv xub ntiag thiab pe hawm (יחוח)Yahweh uas yog koj Tus Tswv.

11 Koj thiab cov Levis thiab lwm haiv neeg uas nrog nej nyob cia li zoo siab rau txhua yam zoo uas (יחוח)Yahweh uas yog koj Tus Tswv pub rau koj thiab koj tsev neeg.

12 Thaum koj muab koj tej qoob loo thiab txiv ntoo ib feem kaum pub rau xyoo uas peb, yog xyoo uas pub ib feem kaum rau cov Levis thiab lwm haiv neeg uas nrog nej nyob thiab cov menyuam uas tsis muaj txiv thiab cov poj ntsuam, xwv lawv thiaj li tau noj tsau npo rau hauv nej tej moos,

13 mas koj mam hais rau ntawm (יחוח)Yahweh uas yog koj Tus Tswv xub ntiag tias, kuv rho tej uas dawb huv tawm hauv kuv lub tsev los mas muab pub rau cov Levis thiab lwm haiv neeg uas nrog peb nyob thiab cov menyuam uas tsis muaj txiv thiab cov poj ntsuam raws li koj tej lus cob qhia uas koj cob rau kuv txhua yam. Kuv tsis ntxeev siab rau koj tej lus qhia ib nqes kiag li thiab kuv yuav tsis hnov qab li.   

14 Thaum kuv pam tuag kuv tsis tau noj ib feem kaum ntawd thiab thaum kuv qias tsis huv kuv kuj tsis muab ib qho rho thiab kuv tsis tau muab ib qho rau tej tuag. Kuv mloog (יחוח)Yahweh uas yog kuv Tus Tswv lus, kuv ua txhua yam raws li uas koj hais cia.

15 Thov koj tsa qhov muag saum ntuj uas yog koj lub chaw nyob dawb huv saib tuaj thiab thov foom koob hmoov rau koj haiv neeg Ixayees thiab rau cov av uas koj pub rau peb raws li koj tau cog lus ruaj khov rau peb tej poj koob yawm txwv, yog lub tebchaws uas muaj kua mis thiab zib ntab ntws nto.

​

(יחוח)Yahweh Haiv Neeg

16 Hnub no (יחוח)Yahweh uas yog koj Tus Tswv hais kom koj ua raws li tej kab ke thiab tej kevcai no. Mas koj yuav tau ceev faj ua raws nraim kawg koj lub siab lub ntsws.

17 Hnub no koj twb lees tias (יחוח)Yahweh yog koj Tus Tswv thiab lees tias koj yuav xyaum koj lub neej raws li nws txojkev, thiab yuav tuav rawv nws tej kab ke thiab nws tej lus cob qhia thiab nws tej kevcai thiab yuav mloog nws lus.

18 Thiab hnub no (יחוח)Yahweh twb lees hais tias nej yog nws haiv neeg yog nws teej nws tug raws li nws cog lus cia rau nej, thiab hais tias nej yuav tau tuav rawv nws tej lus cob qhia huvsi.

19 Nws yuav tsa kom nej siab dua txhua haiv neeg uas nws tau tsim los, nej yuav tau lo lus qhuas, tau meej mom, tau koob meej, thiab nej yuav ua haiv neeg uas dawb huv rau (יחוח)Yahweh uas yog nej Tus Tswv raws li nws hais cia lawd.