Sau Tej Kevcai Cia Rau Saum Lub Roob Enpas

1 Mauxes thiab Ixayees cov kev txwj laug hais rau cov pejxeem tias, nej yuav tau tuav rawv tej lus cob qhia huvsi uas hnub no kuv cob rau nej.

2 Hnub uas nej yuav hla tus dej Yaladees mus rau hauv lub teb chaws uas (יחוח)Yahweh uas yog nej Tus Tswv pub rau nej, nej yuav tau teeb tej lub pob zeb loj loj muab hmoov zeb sib pleev,

3 thiab sau tej kevcai no txhua nqe huvsi rau saum tej pob zeb ntawd rau thaum nej hla mus rau hauv lub tebchaws uas (יחוח)Yahweh uas yog nej Tus Tswv pub rau nej, yog lub tebchaws uas muaj kua mis thiab zib ntab ntws nto, raws li (יחוח)Yahweh uas yog nej tej poj koob yawm txwv Tus Tswv cog lus rau nej.

4 Thaum nej hla tus dej Yaladees mus lawm, nej yuav tau teeb tej pob zeb no rau saum lub roob Enpas raws li uas hnub no kuv hais rau nej, thiab nej yuav tau muab hmoov zeb sib pleev.

5 Thiab nej yuav tau tib ib lub thaj xyeem rau (יחוח)Yahweh uas yog nej Tus Tswv rau qhov ntawd, yog ib lub thaj pob zeb, tsis txhob siv twj hlau txaug tej pob zeb ntawd.

6 Nej yuav muab tej pob zeb uas tsis tau muab txaug kiag li los tib ua lub thaj xyeem rau (יחוח)Yahweh uas yog nej Tus Tswv thiab nej yuav muab tsiaj hlawv xyeem saum lub thaj ntawd rau (יחוח)Yahweh uas yog nej Tus Tswv.

7 Nej yuav muab qhov txhia chaw xyeem ua kevcai sib raug zoo thiab noj rau qhov ntawd, thiab nej yuav zoo siab heev rau ntawm (יחוח)Yahweh uas yog nej Tus Tswv lub xub ntiag.

8 Thiab nej yuav muab tej kevcai no huvsi sau meej meej rau saum cov pob zeb ntawd.

9 Mauxes thiab cov pov thawj uas yog xeem Levis hais rau cov Ixayees sawvdaws tias, cov Ixayees es, cia li nyob twjywm tig ntsej mloog.  Hnub no nej tau ua (יחוח)Yahweh uas yog nej Tus Tswv haiv neeg lawm.

10 Vim li no, nej yuav tau mloog (יחוח)Yahweh uas yog nej Tus Tswv lus, thiab tuav rawv nws tej lus cob qhia thiab nws tej kab ke uas hnub no kuv hais rau nej.

​

Tej Lus Tsawm Foom Saum Lub Roob Enpas

11 Tib hnub ntawd Mauxes hais lus cob qhia rau cov pejxeem tias,

12 thaum nej hla tus dej Yaladees mus lawd, cov xeem no yuav mus sawv saum lub roob Kelixis hais tej lus foom koob hmoov rau cov pejxeem, yog Xime‑oos, Levis, Yahdah, Ixakhas, Yahxej thiab Npee-yamees.

13 Thiab cov xeem no yuav mus sawv saum lub roob Enpas hais tej lus tsawm foom, yog Lunpees, Nkas, Asaws, Xenpuloos, Daj thiab Nathalis.

14 Cov Levis yuav qhia nrov nrov rau ib tsoom Ixayees tias,

15 leej twg ua dab mlom, tsis hais txua los lossis nchuav los, yog yam uas qias vuab tsuab rau (יחוח)Yahweh, thiab yog yam uas tus Kws txawj txhais tes ua tau los xwb, thiab muab teev zais ntshis, mas tus ntawd raug foom tsis zoo. Mas cov pej xeem sawvdaws yuav teb hais tias, Amees.

16 Leej twg saib tsis taus nws niam nws txiv, mas tus ntawd yuav raug foom tsis zoo. Mas cov pejxeem sawvdaws yuav hais tias, Amees.

17 Leejtwg txav kwvtij zej zog ciam teb, tus ntawd yuav raug foom tsis zoo.  Mas cov pejxeem sawvdaws yuav teb hais tias, Amees.

18 Leejtwg dag cov dig muag mus yuam kev, tus ntawd yuav raug foom tsis zoo. Mas cov pejxeem sawvdaws yuav hais tias, amees.

19 Leejtwg yuam lwm haiv neeg uas nrog nej nyob thiab cov menyuam uas tsis muaj txiv thiab cov poj ntsuam txojcai, tus ntawd yuav raug foom tsis zoo. Mas cov pejxeem sawv daws yuav hais tias, Amees.  

20 Leejtwg nrog nws txiv tus pojniam pw, yog nws thws nws txiv tus pojniam chaw txaj muag, tus ntawd yuav raug foom tsis zoo.  Mas cov pejxeem sawvdaws yuav hais tias, Amees.

21 Leejtwg deev tsiaj txhu yam twg kuj xij, tus ntawd yuav raug foom tsis zoo. Mas cov pejxeem sawvdaws yuav hais tias, Amees.

22 Leejtwg nrog nws tus muam pw, yog nws txiv tus ntxhais lossis nws niam tus ntxhais kuj xij, tus ntawd yuav raug foom tsis zoo. Mas cov pejxeem sawvdaws yuav hais tias, Amees.

23 Leejtwg nrog nws niam tais pw, tus ntawd yuav raug foom tsis zoo.  Mas cov pejxeem sawvdaws yuav hais tias, Amees.

24 Leejtwg nyiag tua tibneeg twjywm, tus ntawd yuav raug foom tsis zoo.  Mas cov pejxeem sawvdaws yuav hais tias, Amees.   

25 Leejtwg yuav nyiaj ntiav es tua tus tibneeg uas tsis txhaum, tus ntawd yuav raug foom tsis zoo. Mas cov pejxeem sawvdaws yuav hais tias, Amees.

26 Leejtwg tsis tuav rawv tej kevcai no thiab tsis ua raws nraim, tus ntawd yuav raug foom tsis zoo. Mas cov pejxeem sawvdaws yuav hais tias, Amees.