KEVCAI 28

Mloog Lus Tau Koob Hmoov

1 Yog nej mloog (יחוח)Yahweh uas yog nej Tus Tswv lus thiab ceev faj ua raws nraim nws tej lus cob qhia huvsi uas hnub no kuv cob rau nej, mas (יחוח)Yahweh uas yog nej Tus Tswv yuav tsa nej siab dua txhua haiv neeg hauv qab ntuj.

2 Tej koob hmoov no yuav los txog nej thiab nrog nraim nej mus li, tsuav yog nej mloog (יחוח)Yahweh uas yog nej Tus Tswv lus.

3 Nej yuav tau koob hmoov hauv lub moos thiab tau koob hmoov hauv tej liaj teb.

4 Nej tej noob uas xeeb menyuam thiab nej tej qoob loo hauv liaj teb thiab tej noob nyuj, noob yaj, yuav tau koob hmoov huaj vam coob.

5 Nej lub tawb thiab nej tej phaj zuaj ncuav yuav tau hmoov zoo.

6 Thaum nej nkag los yuav tau koob hmoov, thaum nej tawm mus nej yuav tau koob hmoov.  

7 (יחוח)Yahweh yuav ua rau tej yeeb ncuab uas tawm tsam nej swb nej. Lawv yuav tawm ib txojkev tuaj tawm tsam nej, tiamsis yuav khiav ntawm nej xub ntiag ua xya txoj kev rov qab.

8 (יחוח)Yahweh yuav tso koob hmoov rau hauv nej lub txhab thiab txhua yam haujlwm uas nej ua. Nws yuav foom koob hmoov rau nej hauv lub tebchaws uas (יחוח)Yahweh uas yog nej Tus Tswv pub rau nej.

9 (יחוח)Yahweh yuav muab nej tsa ua haiv neeg uas dawb huv rau nws, yam li uas nws twb cog lus ruaj khov rau nej lawd, tsuav yog nej tuav rawv (יחוח)Yahweh uas yog nej Tus Tswv tej lus cob qhia thiab ua lub neej raws li nws txoj kev.

10 Txhua haiv neeg hauv ntiajteb yuav pom tias nej raug hu raws li (יחוח)Yahweh lub npe thiab lawv yuav ntshai nej.

11 (יחוח)Yahweh yuav ua rau nej vam meej nplua mias kom nej muaj menyuam coob, nej tej tsiaj txhu yuav huaj vam coob, nej tej liaj teb yuav ntsu qoob rau hauv lub tebchaws uas (יחוח)Yahweh cog lus ruaj khov rau nej tej poj koob yawm txwv tias yuav pub rau nej.

12 (יחוח)Yahweh yuav qhib nws lub txhab koob hmoov saum ntuj los rau nej thiab tso nag los raws lub caij lub sijhawm thiab foom koob hmoov rau txhua yam haujlwm uas nej txhais tes ua. Nej yuav muab rau ntau lub tebchaws qiv txais tiamsis nej yuav tsis qiv txais lawv li.

13 (יחוח)Yahweh yuav ua rau nej ua taubhau tsis yog ua kotw. Nws yuav tsa nej nyob lub rooj siab, tsis yog nyob lub rooj qis, tsuav yog nej mloog (יחוח)Yahweh uas yog nej Tus Tswv tej lus cob qhia uas hnub no kuv cob rau nej thiab ceev faj ua raws nraim,

14 thiab tsuav yog nej tsis tso tej lus uas hnub no kuv hais rau nej ib los tseg li, thiab tsis tig rau sab xis lossis sab laug mus raws ncuj nciav luag tej dab thiab ua koom tu.

​

Saws Qhov Uas Tsis Mloog Lus 

15 Tiamsis yog nej tsis mloog (יחוח)Yahweh uas yog nej Tus Tswv tej lus thiab tsis ceev faj ua raws li (יחוח)Yahweh tej lus cob qhia huvsi thiab nws tej kab ke uas hnub no kuv qhia rau nej mas txhua lo lus tsawm foom no yuav los raug nej thiab yuav caum cuag nej.   

16 Ces nej yuav raug lo lus tsawm foom rau hauv lub moos thiab nej yuav raug lo lus tsawm foom rau hauv tej liaj teb.

17 Nej lub tawb thiab nej tej phaj zuaj ncuav yuav raug lo lus tsawm foom.

18 Nej tej noob uas xeeb menyuam thiab nej tej qoob loo hauv nej tej teb, nej tej noob nyuj, noob yaj, yuav raug lo lus tsawm foom.

19 Nej yuav raug lo lus tsawm foom rau thaum nej nkag los thiab nej yuav raug lo lus tsawm foom rau thaum nej tawm mus.

20 (יחוח)Yahweh yuav tso tej lus tsawm foom, tej kev kub ntxhov, kev poob thab los raug nej thiab txhua yam haujlwm uas nej ua mus txog thaum nej puam tsuaj ploj ntais tag, vim yog tej kev phem uas nej ua, yog qhov uas nej tso kuv tseg.

21 (יחוח)Yahweh yuav ua rau tej mob phem los kis rau nej mus txog thaum nws muab nej rhuav tshem ploj tag rau hauv lub tebchaws uas nej mus txeeb ua nej tug.

22 (יחוח)Yahweh yuav nplawm nej kom nej mob yuag zuj zus, muaj mob muaj nkeeg heev, muaj mob muaj paug, raug tshav kub, raug ntuj qhuav teb nkig nkuav, qoob loo tuag tshav thiab raug kab mob. Tej no yuav raug nej mus txog thaum nej puam tsuaj tag.

23 Lub ntuj saum nej taubhau yuav ua tooj liab, lub ntiajteb av uas nej tsuj yuav ua hlau.

24 (יחוח)Yahweh yuav ua rau tej dej nag hauv nej lub tebchaws ua hmoov av mos mos mas yuav poob saum ntuj los rau nej mus txog thaum nej puam tsuaj tag.

25 (יחוח)Yahweh yuav ua rau nej swb nej tej yeeb ncuab. Nej yuav tawm ua ib ke mus ntaus lawv, tiamsis nej yuav khiav lawv xya txojkev rov qab. Nej yuav ua lub chaw rau ib tsoom tebchaws hauv qab ntuj no ceeb thiab ntshai.

26 Nej tej cev tuag yuav ua zaub mov rau txhua tus noog saum nruab ntug thiab tej tsiaj qus hauv ntiajteb noj. Thiab tsis muaj leej twg yuav ntiab tej tsiaj ntawd mus.

27 (יחוח)Yahweh yuav ua rau nej mob tej rwj Iziv thiab mob kiav txhab qawj thiab mob ua paug viag thiab mob khaus uas kho tsis tau li.  

28 (יחוח)Yahweh yuav nplawm nej kom vwm thiab dig muag thiab ntxhov siab nyho, 29 mas tav su nrig los nej yuav xuas dub yam nkaus li tej dig muag xuas hauv qhov tsaus ntuj. Nej yuav tsis vam meej rau hauv txhua yam uas nej ua. Nej yuav raug luag quab yuam tsim txom thiab raug luag huab lwg tsis tu mus li, thiab yuav tsis muaj leejtwg pab nej li.

30 Nej yuav qhaib pojniam cia los lwm tus txivneej yuav mus nrog pw. Nej ua tau tsev los yuav tsis tau nyob hauv lub tsev ntawd. Nej yuav cog vaj txiv hmab los nej yuav tsis tau tej txiv ntawd noj.

31 Luag yuav tua nej tus nyuj tab meeg nej mas nej yuav tsis tau noj tej nqaij nyuj ntawd. Luag yuav txeeb nej tus nees luav mus tab meeg nej thiab luag yuav tsis xa rov qab rau nej. Nej tej yaj yuav raug coj mus pub rau nej tej yeeb ncuab, mas yuav tsis muaj leejtwg pab tau nej li.

32 Nej tej tub tej ntxhais yuav raug coj mus pub rau lwm haiv neeg, mas nej lub qhov muag yuav saib ua tsaus muag ntais thiab nco nco ib hnub dhau ib hnub. Nej txhais tes lub zog yuav tsis muaj peev xwm tiv thaiv tau li.

33 Ib haiv neeg uas nej tsis tau paub dua yuav noj nej tej qoob loo hauv nej tej teb thiab noj nej tej dag tej zog. Thiab nej yuav raug luag tsuj thiab quab yuam tsim txom tsis tu mus li.

34 Mas tej uas nej qhov muag pom ntawd thiaj yuav ua rau nej vwm leg mus.  

35 (יחוח)Yahweh yuav nplawm nej kom mob rwj mob faj rau ntawm pob hauv caug thiab txhais ceg uas nej yuav kho tsis tau li, yuav ua rwj kiag hauv xib taws mus nto plaws tiaj taubhau.

36 (יחוח)Yahweh yuav coj nej thiab nej tus vajntxwv uas nej tsa kav nej mus rau hauv lub tebchaws uas nej thiab nej tej poj koob yawm txwv tsis tau paub kiag li. Qhov ntawd nej yuav ua koom tu luag tej dab uas muab ntoo muab pob zeb ua. 37 Nej yuav ua lub chaw rau luag ceeb thiab ntshai, thiab yuav ua paj lug rau luag hais, thiab yuav tiag luag ncauj luag lo rau hauv txhua haiv neeg uas (יחוח)Yahweh yuav coj nej mus ntawd.   

38 Nej yuav coj noob mus cog ntau rau hauv teb los yuav sau tau tsawg rov los, rau qhov kooj txig yuav muab noj tag.

39 Nej yuav cog vaj txiv hmab thiab tu tej txiv ntawd los nej yuav tsis tau haus tej cawv txiv hmab thiab tsis tau de tej txiv, rau qhov kab yuav muab noj tag. 

40 Nej yuav muaj ntoo txiv aulib nyob thoob hauv nej lub tebchaws tiamsis nej yuav tsis tau tej roj txiv ntawd los pleev nej lub cev, rau qhov tej txiv aulib ntawd yuav zeeg tag.

41 Nej yuav muaj tub muaj ntxhais tiamsis yuav tsis ua nej li, rau qhov lawv yuav raug luag ntes coj mus.

42 Nej tej xyoob ntoo txhua yam thiab nej tej qoob loo hauv nej tej teb yuav ua kooj txig tug.

43 Lwm haiv neeg uas nrog nej nyob yuav vam meej zuj zus tuaj heev dua nej thiab nej yuav poob zuj zus mus.

44 Luag yuav muaj qiv txais rau nej tiamsis nej yuav tsis muaj qiv txais rau luag. Luag yuav ua taubhau, nej yuav ua kotw.

45 Txhua lo lus tsawm foom no yuav raug nej thiab yuav caum cuag nej thiab yuav ntes tau nej mus txog thaum uas nej puam tsuaj tag, vim yog nej tsis mloog ()Yahweh uas yog nej Tus Tswv lus, tsis ua raws li nws tej lus qhia thiab tej kab ke uas nws hais kom nej ua lawd.

46 Tej xwm no yuav ua lub cim thiab txujci tseem ceeb qhia rau nej thiab nej caj ces nco mus ib txhis.

47 Vim thaum nej muaj ib puas tsav yam nplua mias lawm los nej tsis zoo siab ua koom tu (יחוח)Yahweh uas yog nej Tus Tswv.

48 Vim li no, nej thiaj yuav tu nej tej yeeb ncuab uas (יחוח)Yahweh yuav tso tuaj ntaus nej, nej yuav raug kev tshaib kev nqhis, tsis muaj hnav, thiab yuav tu ncua txhua yam. (יחוח)Yahweh yuav muab ib tug quab hlau rau nej kwv saum caj qwb mus txog thaum nws ua rau nej puam tsuaj tag.

49 ()Yahweh yuav coj ib haiv neeg uas nyob deb deb tim qab ntuj kawg tuaj ntaus nej, yuav tuaj sai yam nkaus li dav ya tuaj, yog haiv neeg uas nej yeej tsis paub lawv tej lus.

50 Yog haiv neeg uas ntsej muag nyaum yuav tsis hwm cov laus tsis nyiam cov hluas thiab cov yau.

51 Lawv yuav noj nej tej tsiaj txhu cov menyuam thiab noj tej qoob loo hauv nej tej teb mus txog thaum nej puam tsuaj tag. Lawv yuav tsis tseg qoob loo, cawv txiv hmab thiab roj, tsis tseg menyuam nyuj menyuam yaj rau nej mus txog thaum lawv ua rau nej puam tsuaj tag.  

52 Lawv yuav muab nej vij puav cia rau hauv nej txhua lub moos mus txog thaum lawv ua rau tej ntsa loog siab thiab ruaj khov uas nej tso siab rau ntawd pob tag thoob nej lub teb chaws. Lawv yuav muab nej vij puav cia rau hauv nej txhua lub moos thoob lub teb chaws uas (יחוח)Yahweh uas yog nej Tus Tswv twb muab rau nej lawm.

53 Nej yuav noj nej tej menyuam uas nej yug, yog noj nej tej tub tej ntxhais uas (יחוח)Yahweh uas yog nej Tus Tswv pub rau nej tej nqaij rau thaum uas nej tej yeeb ncuab vij puav nej cia thiab tsim txom nej.

54 Txawm yog ib tug txivneej uas muaj siab dawb siab zoo tshaj plaws hauv nej cov los yuav tsis kam faib mov rau nws cov kwvtij, rau nws tus pojniam ntawm nws xub ntiag, rau tus menyuam uas tseem ciaj nrog nws nyob noj.

55 Nws yuav tsis faib rau lwm tus noj nws tej menyuam li nqaij uas nws tab tom noj, vim nws tsis tshuav ib yam abtsi li lawm rau thaum uas nej tej yeeb ncuab vij puav nej cia thiab tsim txom nej hauv nej txhua lub moos.

56 Txawm yog tus pojniam uas muaj siab dawb siab zoo tshaj plaws hauv nej cov uas yeej tsis kam nws txhais kotaw tsuj av rau thaum taug kev li, vim yog ib tug uas siab dawb siab zoo thiab dawb huv tshaj plaws, los yuav tsis kam faib rau nws tus txiv ntawm nws xub ntiag thiab tsis pub rau nws tus tub tus ntxhais,

57 tau noj lub tsho me nyuam uas nws nyuam qhuav yug hauv ob ceg los thiab noj tej menyuam uas nws yug, rau qhov nws yuav muab noj twjywm, vim yog tsis muaj ib yam abtsi noj li rau thaum uas nej tej yeeb ncuab vij puav nej cia thiab tsim txom nej hauv nej tej lub moos.

58 Yog nej tsis ceev faj ua raws li txhua lo lus hauv txoj kevcai no uas sau cia rau hauv phau ntawv no, yog nej tsis hwm tsis ntshai lub npe uas muaj koob meej thiab txaus ntshai no, yog (יחוח)Yahweh uas yog nej Tus Tswv lub npe,

59 mas (יחוח)Yahweh yuav coj tej kev mob nkeeg uas tsis muaj leej twg kho tau, thiab mob aws mob ntsha uas tsis dua sai los raug nej thiab nej tej tub ki.

60 Thiab nws yuav rov coj dua tej kev mob phem hauv Iziv tebchaws uas nej ntshai huvsi los rau nej thiab tej mob ntawd yuav kis kiag rau nej.

61 Txhua yam kev mob thiab txhua yam kev txom nyem uas tsis tau sau rau hauv phau ntawv kevcai no, (יחוח)Yahweh yuav coj los rau nej mus txog thaum nej puam tsuaj tag.

62 Txawm yog nej twb coob npaum li tej hnub qub saum nruab ntug lawm los nej yuav tshuav tsawg tsawg nyob xwb, rau qhov nej tsis mloog (יחוח)Yahweh uas yog nej Tus Tswv lus.

63 Txawm yog (יחוח)Yahweh txaus siab ua zoo rau nej thiab ua kom nej huaj vam coob los (יחוח)Yahweh kuj yuav txaus siab coj kev puam tsuaj los rau nej thiab ua rau nej liamsim tag ib yam li ntawd. Nej yuav raug muab dob tawm hauv lub teb chaws uas nej tab tom mus txeeb ua nej tug ntawd.

64 Mas (יחוח)Yahweh yuav ua rau nej tawg ua sab ua sua mus rau hauv txhua haiv neeg tag nrho sab ntuj no mus txog sab ntuj tim ub, mas hauv tej tebchaws ntawd nej yuav ua koom tu luag tej dab uas muab ntoo muab pob zeb ua, yog tej dab uas nej thiab nej tej poj koob yawm txwv tsis tau paub dua li.  

65 Thaum nej nrog cov tibneeg ntawd nyob nej yuav tsis tau nyob kaj siab lug, nej xib taws yuav tsis tau ib qho chaw so li. (יחוח)Yahweh yuav ua rau nej lub siab ntshai thiab tshee, nej yuav tsaus muag zuj zus mus thiab siab ntsws yaj tag.

66 Nej lub neej yuav dai siav dhuam, nej yuav ntshai nruab hnub hmo ntuj tsis tso siab tias yuav muaj txojsia nyob.

67 Thaum kaj ntug los nej yuav hais tias, kheev yog tsaus ntuj zoo dua, thiab thaum tsaus ntuj los nej yuav hais tias, kheev yog kaj ntug zoo dua, vim yog tej kev txhawj kev ntshai uas nej siab puas tsus, thiab tej uas nej qhov muag yuav pom ntawd.

68 (יחוח)Yahweh yuav coj nej caij nkoj rov qab mus txog Iziv tebchaws, yog txojkev uas kuv twb cog lus tseg rau nej tias nej yuav tsis rov taug dua ib zaug li. Mus txog qhov ntawd lawm nej yuav yeem muab nej muag ua tub qhe nkauj qhe rau nej cov yeeb ncuab los twb tsis muaj leejtwg yuav nej.