(יחוח)Yahweh Cog Lus Rau Cov Ixayees

1 Ntawm no mus yog tej lus cog tseg uas (יחוח)Yahweh kom Mauxes hais rau cov Ixayees hauv Mau‑as tebchaws, tsav rau tej lus cog tseg uas nws twb hais rau lawv ntawm Haules.

2 Mauxes hu cov Ixayees sawv daws tuaj ua ke mas hais rau lawv tias, nej lub qhov muag twb pom ntsoov txhua yam uas (יחוח)Yahweh ua hauv Iziv tebchaws uas yog ua rau Falaus thiab nws cov tub teg tub taws thiab ua rau thoob plaws nws lub tebchaws huvsi,

3 thiab nej twb pom tej uas nws ua sim lawv loj kawg thiab tej txujci tseem ceeb thiab tej txujci uas loj heev.

4 Tiamsis los txog hnub no, (יחוח)Yahweh tsis tau pub lub siab uas tau taub thiab lub qhov muag uas pom kev thiab lub qhov ntsej uas hnov tau rau nej.

5 Kuv coj nej hauv tebchaws moj sab qhua tau plaub caug xyoo. Nej tej ris tsho kuj tsis ntuag, nej tej khau kuj tsis ntuag hle ntawm nej kotaw.   

6 Nej tsis tau noj ncuav tsis tau haus cawv txiv hmab thiab cawv ntxwg, xwv nej thiaj paub tias kuv yog (יחוח)Yahweh uas yog nej Tus Tswv.

7 Thaum nej los txog ntawm no, Hesanpoos tus vajntxwv Xihoos thiab Npasas tus vajntxwv Aus tawm tuaj ua rog rau peb, tiamsis peb kuj ua rau lawv swb kiag.

8 Peb txeeb kiag lawv lub tebchaws thiab muab ua qub txeeg qub teg rau xeem Lunpees thiab xeem Nkas thiab ib nrab xeem Manaxes.

9 Vim li no, nej yuav tau ceev faj ua raws li tej lus cog tseg no kom nej thiaj vam meej rau txhua yam uas nej ua.

10 Hnub no nej txhua tus sawv tab meeg ntawm (יחוח)Yahweh uas yog nej Tus Tswv xub ntiag, tsis hais txhua xeem cov thawj thiab nej cov kev txwj laug thiab cov uas kav nej thiab Ixayees cov txivneej sawvdaws,

11 nej cov menyuam yaus, nej tej pojniam thiab lwm haiv neeg uas nrog nej nyob txiav taws kwv dej rau nej,

12 xwv nej thiaj tau txais (יחוח)Yahweh uas yog nej Tus Tswv tej lus cog tseg ruaj khov uas (יחוח)Yahweh nrog nej cog tseg hnub no,

13 xwv hnub no nws thiaj muab nej tsa ua nws haiv neeg thiab nws yuav ua nej Tus Tswv raws li nws cog lus tseg rau nej, thiab raws li nws cog lus ruaj khov rau nej tej poj koob yawm txwv, yog Anplaham, Ixaj thiab Yakhauj.   

14 Tej lus sib cog tseg ruaj khov no tsis yog kuv kom nej cov uas,

15 hnub no nrog peb sawv rau ntawm (יחוח)Yahweh xub ntiag no ua xwb, kuv kuj kom cov uas hnub no tsis nrog peb nyob ua thiab.

16 Nej yeej paub tias peb nyob li cas hauv Iziv tebchaws, thiab peb hla dhau tej tebchaws los txog ntawm no li cas.

17 Thiab nej twb pom lawv li tej yam uas ntxim ntxub kawg, yog lawv tej dab mlom uas xuas ntoo xuas pob zeb xuas nyiaj xuas kub ua uas nyob hauv lawv nruab nrab.

18 Yuav tau ceev faj zoo tsam muaj tus txiv neej twg lossis tus pojniam twg lossis tsev neeg twg lossis xeem twg uas lub siab tig ntawm (יחוח)Yahweh uas yog peb Tus Tswv mus ua koom tu tej haiv neeg ntawd tej dab, ntshai tsam hauv nej muaj ib tug cag tuaj ntsuag uas muaj taug thiab iab iab.

19 Thaum ib tug uas zoo li ntawd tau hnov tej lus sib cog tseg uas ruaj khov no, nws lub siab yuav xav tias, zoo xwb lauj! Txawm yog kuv ua raws li kuv lub siab tawv xwb los kuv yeej yuav tau zoo. Qhov uas nws xav li no, yog coj kev puam tsuaj los rau tej tibneeg zoo thiab tej tibneeg phem huvsi.

20 (יחוח)Yahweh yuav tsis zam txim rau tus ntawd. (יחוח)Yahweh txojkev npau taws thiab txojkev khib xeeb yuav tshwm plaws kub tus ntawd thiab tej lus tsawm foom uas sau cia rau hauv phau ntawv no yuav raug nws, thiab (יחוח)Yahweh yuav rhuav nws lub npe kom ploj hauv lub qab ntuj mus.

21 (יחוח)Yahweh yuav muab nws cais tawm hauv txhua xeem Ixayees kom raug kev puam tsuaj raws li tej lus tsawm foom huvsi hauv tej lus cog tseg uas sau cia rau hauv phau kevcai no.

22 Nej tej tub ki uas yug tiam tom qab thiab lwm haiv neeg uas tuaj tebchaws deb deb tuaj yuav pom tej kev txom nyem nyuaj siab hauv lub tebchaws no thiab pom tej mob phem uas (יחוח)Yahweh tso kom muaj.

23 Lawv yuav pom tag nrho lub tebchaws ua quav lawj faj thiab ua ntsev, nyob do cuas vim raug kub nyhiab, tsis muaj leejtwg cog tsis muaj ib yam abtsi tuaj, nroj tsuag kuj tsis tuaj, raug muab rhuav pov tseg yam li Xaudoos thiab Kaumaulas thiab lub moos Amas thiab lub moos Xenpau‑is uas ()Yahweh chim thiab npau taws, nws muab rhuav pov tseg tag.

24 Mas ib tsoom tebchaws sawvdaws yuav hais tias, ua cas (יחוח)Yahweh ua li ntawd rau lub tebchaws no? Nws chim siab loj li no yog vim li cas?

25 Mas luag yuav teb tias, yog vim lawv muab (יחוח)Yahweh uas yog lawv tej poj koob yawm txwv Tus Tswv tej lus cog tseg tso pov tseg, yog tej lus uas thaum (יחוח)Yahweh coj lawv tawm hauv Iziv teb chaws los, nws cog tseg rau lawv.

26 Lawv cia li mus ua koom tu thiab pe hawm luag tej dab uas lawv tsis tau paub dua thiab tsis yog (יחוח)Yahweh muab rau lawv.

 27 Vim li ntawd (יחוח)Yahweh txojkev npau taws thiaj li tshwm plaws rau lub tebchaws no, thiaj coj txhua lo lus tsawm foom uas sau cia rau hauv phau no los raug.  

28 (יחוח)Yahweh muab lawv dob kiag cag tawm hauv lawv lub tebchaws ua npau taws thiab chim tsawv thiab muab laim kiag mus rau lwm lub tebchaws zoo li niaj hnub nimno.  

29 Tej xwm uas tsis tau muab qhia tshwm los yeej yog (יחוח)Yahweh uas yog peb Tus Tswv li, tiamsis tej xwm uas twb muab qhia tshwm los yog peb li thiab peb tej tub ki li mus ib txhis, xwv peb thiaj tau ua raws li tej kevcai no txhua nqe huvsi.