Xaiv Koob Hmoov Lossis Xaiv Los Tsawm Foom

1 Thaum txhua yam uas hais tag no, yog tej lus foom koob hmoov thiab tej lus tsawm foom uas kuv hais tab meeg nej no, los txog nej lawm, thiab nej nco txog tej no hauv txhua lub tebchaws uas (יחוח)Yahweh uas yog nej Tus Tswv ntiab nej mus nyob,

2 yog nej thiab nej cov menyuam rov los cuag (יחוח)Yahweh uas yog nej Tus Tswv thiab mloog nws tej lus huvsi uas hnub no kuv hais rau nej kawg nej lub siab lub ntsws,

3 mas (יחוח)Yahweh yuav pub nej vam meej li qub, thiab yuav hlub nej thiab qaws nej hauv txhua haiv neeg uas (יחוח)Yahweh ua rau nej khiav ri sua mus nyob lawm rov los.

4 Yog nej muaj tibneeg uas raug muab ntiab mus nyob kawg nkaus qab ntuj, los (יחוח)Yahweh uas yog nej Tus Tswv yuav qaws nej qhov ntawd coj nej rov qab los.

5 Thiab (יחוח)Yahweh uas yog nej Tus Tswv yuav coj nej los rau hauv lub teb chaws uas nej tej poj koob yawm txwv tau nyob ua lawv tug rov ua nej tug.  Nws yuav pub kom nej vam meej thiab huaj vam coob heev dua nej tej poj koob yawm txwv.

6 Thiab (יחוח)Yahweh uas yog nej Tus Tswv yuav txiav kiag nej thiab nej tej tub ki lub siab tawv ncauj xwv nej thiaj hlub (יחוח)Yahweh kawg siab kawg ntsws thiab nej thiaj muaj txojsia nyob.

7 (יחוח)Yahweh uas yog nej Tus Tswv yuav muab tej lus tsawm foom no tso los raug cov uas tawm tsam thiab ua yeeb ncuab tsim txom nej,

8 thiab nej yuav rov mloog (יחוח)Yahweh lus thiab tuav rawv nws tej lus cob qhia huvsi uas hnub no kuv cob rau nej.

9 (יחוח)Yahweh uas yog Tus Tswv yuav ua rau nej vam meej nplua nuj heev kawg rau txhua yam haujlwm uas nej txhais tes ua, pub nej muaj menyuam coob, thiab nej tej tsiaj txhu huaj vam coob, thiab nej tej liaj teb yuav ntsu qoob, vim yog (יחוח)Yahweh yuav rov txaus siab ua rau nej vam meej ib yam li nws txaus siab rau nej tej poj koob yawm txwv,

10 tsuav yog nej mloog (יחוח)Yahweh uas yog nej Tus Tswv lus, thiab tuav rawv nws tej lus cob qhia thiab nws tej kab ke uas sau rau hauv phau kevcai no, thiab tsuav yog nej tig kiag rov los cuag (יחוח)Yahweh uas yog nej Tus Tswv kawg siab kawg ntsws xwb.

11 Tej lus cob qhia uas hnub no kuv muab cob rau nej no, tsis yog yam uas ceeblaj dhau rau nej ua thiab tsis yog nyob deb ntawm nej.

12 Txoj kevcai ntawd tsis yog nyob saum ntuj es nej yuav hais tias, leejtwg yuav nce mus muab saum ntuj los rau peb, peb thiaj tau hnov thiab ua raws li?

13 Thiab tsis yog nyob dhau hiav txwv sab tim ub es nej yuav hais tias, leej twg yuav hla mus muab los rau peb, peb thiaj tau hnov thiab ua raws li?

14 Tiamsis tej lus ntawd yeej nyob ze nej, nyob hauv nej lub qhov ncauj thiab nyob hauv nej lub siab, mas nej yeej ua raws li ntawd tau.

15 Cia li ua tib zoo saib, hnub no kuv muab txojsia thiab yam uas zoo, thiab muab txojkev tuag thiab yam uas phem tso rau ntawm nej xub ntiag.

16 Yog nej mloog (יחוח)Yahweh uas yog nej Tus Tswv tej lus cob qhia uas hnub no kuv muab cob rau nej, yog qhov uas muab siab hlub (יחוח)Yahweh uas yog nej Tus Tswv thiab ua nej lub neej raws li nws txojkev thiab tuav rawv nws tej lus cob qhia thiab nws tej kab ke thiab nws tej kevcai, mas nej yuav muaj txojsia nyob thiab huaj vam coob, thiab (יחוח)Yahweh uas yog nej Tus Tswv yuav foom koob hmoov rau nej rau hauv lub tebchaws uas nej txeem mus ntawd.

17 Tiamsis yog nej lub siab tig kiag lawm thiab nej tsis yeem mloog lus es raug ntxias mus pe thiab ua koom tu luag tej dab,

18 mas hnub no kuv qhia tseeb rau nej tias, nej yuav puam tsuaj tag. Nej yuav tsis muaj txoj sia nyob ntev rau hauv lub tebchaws uas nej tab tom hla tus dej Yaladees mus txeeb ntawd.

19 Kuv thov lub ntuj lub teb ua timkhawv rau nej hnub no tias, kuv twb muab txojsia thiab txojkev tuag, muab koob hmoov thiab lus tsawm foom tso rau ntawm nej xub ntiag. Mas nej cia li xaiv yuav txojsia, kom nej thiab nej caj ces thiaj li muaj txojsia nyob,

20 thiab nej hlub (יחוח)Yahweh uas yog nej Tus Tswv thiab mloog nws lus thiab tuav rawv nws. Ua li no nej thiaj tau txojsia thiab nyob ntev, kom nej thiaj tau nyob rau hauv lub tebchaws uas (יחוח)Yahweh cog lus ruaj khov rau nej tej poj koob yawm txwv uas yog Anplaham, Ixaj thiab Yakhauj tias yuav muab pub rau lawv.