Yahshua Yuav Nyob Mauxes Chaw

1 Mauxes tseem hais tej lus no rau cov Ixayees sawvdaws,

2 thiab nws hais rau lawv tias, hnub no kuv hnub nyoog twb muaj ib puas nees nkaum xyoo lawm. Kuv yuav mus mus los los tsis taus lawm. (יחוח)Yahweh twb hais rau kuv tias, koj yuav tsis tau hla tus dej Yaladees no mus.  

3 (יחוח)Yahweh uas yog nej Tus Tswv yuav hla ua nej ntej mus. Nws yuav ua rau tej haiv neeg ntawd puam tsuaj rau ntawm nej xub ntiag nej thiaj txeeb tau lawv lub tebchaws. Mas Yahshua yuav ua tus uas coj nej mus raws li (יחוח)Yahweh tau hais cia lawd.

4 (יחוח)Yahweh yuav ua rau lawv ib yam li nws ua rau Xihoos thiab Aus uas yog cov Amaulais li vajntxwv thiab ib yam li ua rau nkawv lub tebchaws rau thaum (יחוח)Yahweh muab nkawv ua puam tsuaj.

5 (יחוח)Yahweh yuav muab lawv cob rau nej mas nej yuav ua rau lawv raws tej lus cob qhia uas kuv tau cob rau nej lawd huvsi.

6 Cia li ua khov kho ua siab loj siab tuab, tsis txhob ras tsis txhob ntshai lawv li rau qhov (יחוח)Yahweh uas yog nej Tus Tswv yeej nrog nraim nej mus. Nws yuav tsis ncaim nej yuav tsis tso nej tseg.

7 Ces Mauxes txawm hu Yahshua los thiab hais rau nws tab meeg cov Ixayees sawvdaws tias, cia li ua khov kho thiab ua siab loj siab tuab, rau qhov koj yog tus uas yuav nrog haiv neeg no txeem mus rau hauv lub tebchaws uas (יחוח)Yahweh cog lus ruaj rau lawv tej poj koob yawm txwv tias yuav pub rau lawv. Koj yuav ua rau lawv tau lub tebchaws ntawd ua lawv tug.

8 Tus uas ua koj ntej yog (יחוח)Yahweh, nws yuav nrog nraim koj, nws yuav tsis ncaim koj thiab tsis tso koj tseg. Tsis txhob ntshai tsis txhob poob siab li.

​

Puv Xya Xyoo Nyeem ()Yahweh Txoj Kevcai Ib Zaug

9 Mauxes sau txoj kevcai no thiab muab rau cov pov thawj uas yog xeem Levis uas kwv (יחוח)Yahweh lub phij xab sib cog lus, thiab muab rau Ixayees cov kev txwj laug sawv daws.

10 Thiab Mauxes hais rau lawv tias, thaum puv xya xyoo uas teem ua xyoo uas tso nuj nqis tseg, ncaj lub sijhawm uas ua kevcai nyob tsev pheeb suab,

11 mas thaum ib tsoom Ixayees tuaj rau ntawm (יחוח)Yahweh uas yog nej Tus Tswv lub xub ntiag, ntawm lub chaw uas nws yuav xaiv cia, nej yuav nyeem txoj kevcai no rau cov Ixayees sawvdaws mloog.

12 Cia li hu cov pejxeem tuaj txoos ua ke, pojniam, txivneej, menyuam yaus thiab lwm haiv neeg uas nyob hauv nej tej moos, kom lawv thiaj tau hnov thiab kawm paub ntshai thiab hwm (יחוח)Yahweh uas yog nej Tus Tswv thiab ceev faj ua raws nraim li tej lus huvsi hauv txoj kevcai no,

13 thiab lawv tej menyuam uas tsis tau paub dua thiaj tau hnov thiab kawm paub ntshai thiab hwm (יחוח)Yahweh uas yog nej Tus Tswv tag lawv sim neej uas nyob rau hauv lub tebchaws uas nej tab tom yuav hla tus dej Yaladees mus txeeb ntawd.

​

(יחוח)Yahweh Qhia Mauxes Zaum Kawg

14 (יחוח)Yahweh hais rau Mauxes tias, twb yuav txog hnub uas koj tuag lawm. Cia li hu Yahshua tuaj mas neb ob leeg cia li los cuag kuv rau hauv lub tsev ntaub sib ntsib, kuv thiaj tsa tau nws ua haujlwm. Ces Mauxes thiab Yahshua thiaj mus cuag (יחוח)Yahweh rau hauv lub tsev ntaub sib ntsib.

15 (יחוח)Yahweh tshwm rau hauv tus ncej huab los rau hauv lub tsev ntaub, thiab tus ncej huab nyob ntawm lub qhov rooj tsev ntaub.

16 (יחוח)Yahweh hais rau Mauxes tias, koj twb yuav qi muag mus nrog koj tej poj koob yawm txwv nyob. Mas haiv neeg no yuav cia li mus deev tej dab uas txawv txawv hauv lub tebchaws uas lawv mus nyob ntawd, thiab lawv yuav tso kuv tseg thiab rhuav kuv tej lus uas kuv nrog lawv sib cog lus.

17 Ces hnub ntawd kuv yuav npau taws heev rau lawv, kuv yuav muab lawv tso tseg thiab kuv yuav fee plhu tsis saib lawv li lawm, mas lawv yuav raug puam tsuaj. Ntau yam kev phem kev txom nyem yuav los raug lawv.  Hnub ntawd lawv yuav hais tias, tej kev phem no los raug peb vim yog peb Tus Tswv tsis nrog peb nyob lawm los tsis yog?   

18 Hnub ntawd kuv yeej yuav fee plhu tsis saib lawv, vim yog tej kev phem huvsi uas lawv tau ua, yog qhov uas lawv tig mus raws ncuj nciav luag tej dab.

19 Nimno neb cia li sau txoj nkauj no thiab qhia rau cov Ixayees, muab tso rau hauv lawv lub qhov ncauj, xwv txoj nkauj no thiaj ua timkhawv nrog kuv nkaug cov Ixayees.

20 Thaum kuv coj lawv mus rau hauv lub tebchaws uas muaj kua mis thiab zib ntab ntws nto uas kuv tau cog lus ruaj tias kuv yuav pub rau lawv tej poj koob yawm txwv, thiab thaum lawv tau noj tsau npo thiab rog rog, mas lawv yuav tig mus ua koom tu luag tej dab thiab yuav saib tsis taus kuv thiab rhuav kuv tej lus cog tseg.  

21 Thaum ntau yam kev phem thiab kev txom nyem los raug lawv lawd, mas txoj nkauj no yuav ua timkhawv nkaug lawv, rau qhov txoj nkauj no yuav nyob ntawm lawv tej caj ces lub qhov ncauj yuav tsis hnov qab mus li. Thaum kuv tsis tau coj lawv los rau hauv lub tebchaws uas kuv cog lus ruaj tias yuav pub rau lawv, kuv twb paub tej uas lawv npaj siab yuav ua lawm.

22 Mauxes thiaj sau txoj nkauj ntawd rau tib hnub ntawd thiab qhia rau cov Ixayees hu.

23 Ces (יחוח)Yahweh txawm tsa Yahshua uas yog Noos tus tub los ua haujlwm thiab hais tias, koj cia li ua khov kho thiab ua siab loj siab tuab. Koj yuav coj cov Ixayees mus rau hauv lub tebchaws uas kuv cog lus ruaj tias yuav pub rau lawv. Kuv yuav nrog koj nyob.

24 Thaum Mauxes sau tej kevcai no txhua nqe huvsi rau hauv phau ntawv tag lawm,

25 nws thiaj hais rau cov Levis uas kwv lub phij xab sib cog lus tias,

26 cia li muab phau ntawv kevcai no tso rau ntawm ib sab lub phij xab sib cog lus, kom thiaj ua timkhawv nkaug nej.

27 Rau qhov kuv yeej paub tias, nej ntxeev siab thiab siab tawv li cas. Saib maj, thaum kuv tseem muaj txojsia nrog nej nyob los txog hnub no nej pheej ntxeev siab rau (יחוח)Yahweh. Thaum kuv tuag lawm nej yeej yuav ua phem heev dua xwb lauj!

28 Nej cia li hu cov kev txwj laug huvsi hauv nej txhua xeem thiab cov uas kav nej tuaj sablaj ua ke kom kuv thiaj tau hais tej lus no rau lawv mloog thiab hu lub ntuj lub teb ua timkhawv nkaug lawv.

29 Kuv yeej paub tias thaum dua kuv lawm, nej yuav ua phem ua qias tiag tiag li thiab tig kiag ntawm txojkev uas kuv twb qhia rau nej. Tom hauv ntej tej xwm txheej phem yuav poob los raug nej rau qhov nej ua tej uas (יחוח)Yahweh pom tias phem thiab tej uas nej txhais tes ua zes ua kom nws chim.

​

Mauxes Txoj Nkauj

30 Mas Mauxes hais txoj nkauj no tag nrho rau ib tsoom Ixayees mloog.