1 Lub ntuj es, cia li tig ntsej mloog kuv yuav hais, lub ntiajteb es, cia li mloog tej lus ntawm kuv lub qhov ncauj.

2 Cia kuv tej lus qhuab qhia poob yam nkaus li nag los, cia kuv tej lus poob los yam li lwg nias, thiab yam nkaus li nag tshauv los rau saum tej nroj tsuag mos nyoos, thiab yam li tej pluav nag rau saum tej yub zaub.

3 Rau qhov kuv yuav tshaj tawm (יחוח)Yahweh lub npe. Cia li qhuas ntxhias tias peb Tus Tswv loj kawg nkaus.

4 Nws yog txhib zeb, mas nws tes haujlwm zoo txhua fab, txhua yam uas nws ua kuj ncaj ncees. (יחוח)Yahweh yog tus uas yeej tso siab tau, nws tsis ua ib qho txhaum li, nws txiav txim ncaj thiab ua raug cai xwb.

5 Lawv ua phem ua qias rau (יחוח)Yahweh, lawv ua tsis tau nws cov menyuam lawm, vim lawv muaj kev txaug kev txhaum. Lawv yog tiam tibneeg uas siab phem siab qias thiab siab nkhaus.  

6 Haiv neeg ruam, tibneeg tsis txawj xav es, nej ua pauj (יחוח)Yahweh tshav ntuj li no xwb lov? (יחוח)Yahweh tsis yog Leej Txiv uas tsim nej los lov, tsis yog tus uas tsim nej thiab yug nej kom hlob zoo lov?  

7 Cia li nco txog yav thaum ub, cia li xav txog tej hnub nyoog uas ntau tiam tibneeg dhau los lawd. Cia li nug nej txiv mas nws yuav qhia rau nej paub, cia li nug nej cov laus mas lawv yuav qhia rau nej.

8 Thaum tus uas loj dua ntais pub qub txeeg qub teg rau ib tsoom tebchaws, thaum nws muab cov tib neeg faib, nws tu ciam rau cov tibneeg raws li Ixayees cov tub.

9 Rau qhov (יחוח)Yahweh li feem yog nws cov tibneeg, Yakhauj yog (יחוח)Yahweh li qub txeeg qub teg.

10 (יחוח)Yahweh ntsib lawv hauv tebchaws moj sab qhua, hauv ntuj nrag teb do uas cua ntsawj vig voog.  Nws thaiv ib ncig lawv thiab zov lawv, tsom kwm lawv zoo yam nkaus li lawv yog nws lub ntsiab muag.

11 Nws zoo yam nkaus li tus dav uas muab nws lub zes rhuav es yuj saum nws cov menyuam. Nws nthuav tis kiag cug cov menyuam kwv rau saum phab tis.

12 (יחוח)Yahweh tib leeg coj lawv los, tsis muaj lwm lub tebchaws li dab nrog lawv nyob.

13 (יחוח)Yahweh pub lawv caij sau tej chaw siab hauv ntiajteb, pub lawv noj tej qoob loo hauv liaj teb, pub lawv ntxais zib ntab ntawm tej pob tsuas, thiab noj roj ntawm tej roob pob zeb uas tawv tawv, 14thiab haus kua mis nyeem ntawm tej nyuj thiab kua mis ntawm tej tshis, thiab noj roj ntawm tej menyuam yaj thiab txiv yaj, thiab noj tej nyuj Npasas thiab tshis thiab tej mog uas zoo zoo. Nej tau haus tej txiv hmab li ntshav ua cawv.

15 Yesulus rog tuaj ces kuj ntxeev siab, nej rog heev, nqaij tuab ceev nrees. Lawv muab (יחוח)Yahweh uas tsim lawv tso tseg, thiab saib tsis taus txhib zeb uas cawm lawv dim.

16 Lawv teev luag tej dab ua rau (יחוח)Yahweh khib, lawv ua tej kev qias vuab tsuab zes ua kom nws chim.  

17 Lawv tua tsiaj xyeem rau tej dab uas tsis yog (יחוח)Yahweh, yog xyeem rau tej dab uas lawv tsis tau paub dua, thiab xyeem rau tej dab uas nyuam qhuav muaj nimno, yog tej uas nej tej poj koob yawm txwv tsis tau hwm thiab ntshai.

18 Nej tsis nco txog txhib zeb uas yug nej los, nej tsis nco qab (יחוח)Yahweh uas yug nej.

19 (יחוח)Yahweh pom mas tsis yuav lawv lawm, rau qhov nws tej tub tej ntxhais ua rau nws chim.

20 Mas (יחוח)Yahweh thiaj hais tias, kuv yuav fee plhu ntawm lawv, kuv yuav tos saib thaum kawg lawv yuav zoo li cas, rau qhov lawv yog tiam tibneeg uas tawv ncauj, yog cov menyuam uas tsis xib rau kuv.  

21 Lawv twb teev tej uas tsis yog (יחוח)Yahweh ua rau kuv khib, lawv twb muaj dab mlom zes kom kuv chim. Mas kuv yuav siv tej tibneeg uas tsis yog haiv neeg ua rau lawv khib, kuv yuav siv ib haiv neeg ruam ua rau lawv chim.

22 Rau qhov kuv lub siab chim chim tawm hluavtaws kub mus txog ntua ti nkaus qab thu hauv tub tuag teb, thiab kub ntiajteb thiab tej qoob loo thiab kub tej lag zeb uas pua tiag tej roob.

23 Kuv yuav sau xwm txheej phem rau saum lawv thiab tso kuv tej xub hneev los tua lawv.

24 Lawv yuav tshaib tshaib yuag zuj zus, thiab lawv yuav puam tsuaj, vim yog muaj mob kub heev thiab mob kis. Kuv yuav tso kaus hniav tsiaj nyaum los tom lawv thiab tso tej uas muaj taug nkag hauv av los tom lawv.

25 Nraum tshav puam los hniav ntaj hniav riam yuav ua rau tibneeg ua ntsuag, hauv tsev los yuav muaj kev ntshai heev, ua rau cov tub hluas ntxhais hluas thiab cov menyuam uas tseem noj mis thiab cov laus uas dawb hau paug puam tsuaj.

26 Kuv twb hais lawm tias, kuv yuav ua rau lawv tawg ri sua mus deb, yuav rhuav lawv lub npe ua kom tsis muaj leejtwg nco tau.

27 Tiamsis kuv ntshai tsam tej yeeb ncuab thuam kuv, ntshai tsam tej yeeb ncuab ho xav yuam kev, tsam ces lawv ho hais tias, yog peb txhais tes kov yeej, tsis yog ()Yahweh ua txhua yam no.

28 Lawv yog ib haiv neeg uas tsis paub qabhau, yog tibneeg tsis thoob tsib.

29 Yog lawv ntse los lawv yuav nkag siab tej no thiab lawv yuav paub txog lawv lub neej thaum kawg.

30 Ib leeg yuav ua li cas ntiab tau ib txhiab leej khiav, ob leeg yuav ua li cas ntiab tau kaum txhiab leej khiav? Twb yog lawv txhib zeb twb muab lawv muag lawm thiab (יחוח)Yahweh twb tso lawv tseg lawm.   

31 Cov yeeb ncuab txhib zeb tsis thooj li peb txhib zeb, cov yeeb ncuab los yeej paub li ntawd.

32 Lawv lub hauv paus txiv hmab yog ncau ntawm txiv hmab Xaudoos, thiab tuaj hauv Kaumaulas vaj txiv hmab tuaj. Lawv tej txiv hmab yog tshuaj lom, lawv tej tauv txiv hmab kuj iab kawg.

33 Lawv tej cawv txiv hmab yog taug nab, yog nab raj kub sai li taug heev.

34 Kuv tsis tau muab qhov uas kuv yuav ua no khaws cia, thiab muab kaw ceev cia rau hauv kuv lub txhab lov?

35 Qhov uas ua pauj thiab qhov uas teem txim yog kuv li feem tos cia txog thaum lawv plam kotaw, rau qhov hnub uas lawv yuav puam tsuaj twb los yuav txog, thiab lawv lub txim twb yuav los raug lawv sai sai no.

36 (יחוח)Yahweh yuav muab cai rau nws cov tibneeg, nws yuav hlub nws cov tub qhe rau thaum nws pom tias lawv zog tag lawm, thiab tsis muaj leejtwg tshuav nyob lawm, tsis hais cov uas ua qhev thiab cov uas tsis ua qhev.

37 Mas (יחוח)Yahweh yuav hais tias, lawv tej dab dua twg lawm, txhib zeb uas lawv nraim cev ntawd dua twg lawm?

38 Yog cov uas noj tej tsiaj uas muab tua xyeem li roj thiab haus tej cawv txiv hmab uas lawv muab hliv xyeem. Cia tej dab ntawd sawv tsees los pab nej, cia lawv tsom kwm nej los maj.

39 Saib maj, kuv yeej yog tus ntawd ntag, dhau kuv lawm tsis muaj lwm Tus Tswv. Kuv tua kom tuag thiab kuv tsa kom sawv, kuv ua kom mob kom to thiab kuv kho kom zoo, tsis muaj leejtwg yuav pab kom dim tau hauv kuv txhais tes.

40 Kuv tsa tes rau saum ntuj twv hais tias, kuv yeej muaj txojsia nyob ib txhis tsis kawg,

41 thaum kuv hov kuv rab ntaj kom ntse ci nplas, thiab kuv txhais tes tuav rawv kev txiav txim, kuv yuav ua pauj rau kuv cov yeeb ncuab thiab ua pauj rau cov uas ntxub kuv.

42 Kuv yuav ua rau kuv rab xub haus ntshav qaug thiab kuv rab ntaj yuav noj nqaij, yog cov uas raug tua tuag thiab cov uas raug ntes li ntshav uas los ntawm tej yeeb ncuab li taubhau.

43 Ib tsoom tebchaws es, cia li qhuas (יחוח)Yahweh cov tibneeg, rau qhov (יחוח)Yahweh yuav pauj nws cov tub qhe tej ntshav thiab ua pauj rau nws cov yeeb ncuab, thiab ntxuav nws cov tibneeg thiab lub teb chaws kev txhaum.

44 Mauxes thiab Noos tus tub Yahshua tuaj qhia txhua lo lus hauv txoj nkauj no rau cov pejxeem lub qhov ntsej hnov.

45 Thaum Mauxes qhia txhua lo lus no rau cov Ixayees sawvdaws mloog tag lawd,

46 nws kuj hais rau lawv tias, cia li khaws tej lus uas hnub no kuv hais kom nej ua rau nruab siab, xwv nej thiaj qhia tau rau nej tej tub ki kom lawv thiaj li paub ceev faj ua raws li tej lus hauv txoj kevcai no huvsi.

47 Tej no tsis yog tej nyuag dog dig rau nej, tej no yeej yog nej txojsia ntag, thiab yog nej ua raws li tej no, nej yuav muaj txoj siav loj siav ntev rau hauv lub tebchaws uas nej tabtom yuav hla tus dej Yaladees mus txeeb ua nej tug ntawd.

(יחוח)Yahweh Pub Mauxes Tsa Muag Saib Lub Tebchaws Khana‑as

48 Hnub ntawd (יחוח)Yahweh hais rau Mauxes tias,

49 koj cia li nce mus pem lub roob Anpalis no mus kom txog lub roob Nenpaus uas nyob hauv Mau‑as tebchaws uas ncaj lub moos Yelikhaus es tsa muag saib lub teb chaws Khana‑as uas kuv muab pub rau cov Ixayees yuav ua lawv tug.

50 Koj yuav tu siav rau saum lub roob uas koj nce mus ntawd es

mus nrog koj tej poj koob yawm txwv nyob, ib yam nkaus li uas koj tus tijlaug Aloos tuag saum lub roob Haus es mus nrog nws tej poj koob yawm txwv nyob.

51 Vim yog neb ob leeg tsis ua ncaj rau kuv tab meeg cov Ixayees ntawm qhov dej Melinpas Khades hauv teb chaws moj sab qhua Xees. Neb tsis hwm kuv ua tus uas dawb huv rau hauv cov Ixayees.

52 Vim li no koj yuav tuaj deb saib pom lub tebchaws tiamsis koj yuav tsis tau nkag mus rau hauv lub tebchaws uas kuv muab pub rau cov Ixayees.