Mauxes Foom Koob Hmoov Rau Txhua Xeem Ixayees

1 Ntawm no mus yog Mauxes uas yog (יחוח)Yahweh tus tibneeg tej lus foom koob hmoov rau cov Ixayees ua ntej uas nws tsis tau tuag.  

2 Nws hais tias, (יחוח)Yahweh nqis saum lub roob Xinais los, nws tawm ntawm Xe‑is ci tuaj rau lawv, nws ci nplas saum lub roob Palas tuaj, nws nrog qas txhiab qas vam leej uas dawb huv tuaj, muaj nplaim taws ntawm nws sab tes xis.

3 Nws yeej hlub nws haiv neeg. Nws cov tibneeg dawb huv, txhua tus nyob hauv nws txhais tes. Lawv pe ntawm koj kotaw thiab txais tej lus uas koj qhia.  

4 Mauxes muab txoj kevcai cob rau peb ua Yakhauj cov tibneeg qub txeeg qub teg.

5 (יחוח)Yahweh thiaj ua vajntxwv hauv Yesulus rau thaum cov pejxeem cov thawj tuaj txoos ua ke thiab nrog cov Ixayees txhua xeem ua ke.

6 Thov cia Lunpees muaj txojsia nyob, tsis txhob tuag, tiamsis cia nws cov tib neeg muaj tsawg.

7 Mauxes hais txog Yahdah li no tias, Au (יחוח)Yahweh, thov mloog Yahdah tej lus, thov coj nws rov los koom nws haiv neeg. Nws txhais tes tawm tsam pab nws tus kheej. Thov koj pab nws tawm tsam nws cov yeeb ncuab.

8 Mauxes hais txog Levis tias, (יחוח)Yahweh, koj li Thumis thiab Ulis nrog tus uas koj hlub nyob, yog tus uas koj twb muab sim ntawm Maxas lawm, thiab tus uas koj tawm tsam ntawm dej Melinpas.  

9 Nws hais rau nws niam nws txiv tias, kuv tsis quav ntsej lawv lawm. Nws tsis yuav nws cov kwvtij thiab tsis paub nws cov menyuam, rau qhov cov Levis ua raws li koj tej lus thiab tuav rawv koj tej lus cog tseg.

10 Lawv yuav qhia koj tej kevcai rau Yakhauj, thiab qhia koj txoj kevcai rau Ixayees. Lawv yuav muab hmoov tshuaj tsw qab tso rau ntawm koj xub ntiag, thiab muab tej uas hlawv huvsi xyeem tso rau saum koj lub thaj.

11 Au (יחוח)Yahweh, thov foom koob hmoov rau nws tej qhov txhia chaw, thiab lees yuav tej haujlwm uas nws txhais tes ua. Thov koj tsoo nws cov yeeb ncuab lub duav, yog cov uas ntxub nws, ua kom sawv tsis taus dua li.

12 Mauxes hais txog Npeeyamees tias, tus uas (יחוח)Yahweh hlub nyob tso siab plhuav rau hauv nws. (יחוח)Yahweh tsom kwm nws tas hnub tas hmo, nws nyob saum (יחוח)Yahweh xub pwg.

13 Mauxes hais txog Yahxej tias, thov (יחוח)Yahweh foom koob hmoov rau nws lub tebchaws, cia nws tau dej lwg uas zoo kawg nkaus saum ntuj, thiab tau tej dej uas nyob hauv qab ntuj,

14 thiab tau tej qoob loo zoo kawg nkaus ntawm lub hnub, thiab tau tej qoob loo nplua mias raws lub hli,

15 thiab tau tej yam uas zoo kawg saum tej roob uas ib txwm muaj nyob, thiab tau tej uas zoo nplua mias saum tej ncov roob uas nyob mus ib txhis,

16 thiab tau tej kev tsim txiaj hauv ntiajteb thiab txhua yam uas nyob hauv, thiab tau txojkev hlub ntawm tus uas nyob hauv tsob ntoo cig plaws ntawd. Thov kom tej koob hmoov no los rau saum Yahxej lub taubhau, thiab los rau saum tus uas ua nws cov kwvtij tus thawj lub tiaj taubhau.

17 Nws yog thawj tug menyuam txiv nyuj uas muaj meej mom, nws txwm kub zoo yam li kub nyuj qus. Txwm kub ntawd yuav laub txhua haiv neeg mus txog qab ntuj kawg. Efa‑is kaum txhiab leej kuj zoo li no, Manaxes ib txhiab leej kuj zoo ib yam nkaus.

18 Mauxes hais txog Xenpu-loos tias, Xenpuloos, cia li zoo siab kawg rau thaum koj tawm mus, thiab Ixakhas cia li zoo siab rau hauv koj lub tsev ntaub.  

19 Nkawv yuav hu tibneeg tuaj rau ntawm nkawv lub roob, thiab yuav xyeem tsiaj raug cai qhov ntawd. Nkawv rub tej uas zoo nplua mias hauv hiavtxwv los, thiab tau tej qhov txhia chaw tsim txiaj uas muab zais rau hauv xuab zeb.

20 Mauxes hais txog Nkas tias, qhuas (יחוח)Yahweh uas nthuav Nkas lub teb chaws dav. Nkas nyob zoo yam li tsov ntxhuav, dua luag npab dua luag tiaj taubhau.  

21 Nws xaiv lub tebchaws uas zoo kawg nkaus rau nws, vim yog qhov ntawd tseg cia rau tus thawj uas kav. Thaum pejxeem cov thawj tuaj txoos ua ke, nws ua raws li (יחוח)Yahweh txojkev ncaj ncees, thiab ua raws li tej kevcai uas muab rau cov Ixayees.   

22 Mauxes hais txog Daj tias, Daj yog ib tug menyuam tsov ntxhuav uas dhia caws qia hauv Npasas tebchaws tuaj.

23 Mauxes hais txog Nathalis tias, Nathalis es, koj yog tus uas tau (יחוח)Yahweh txoj kev hlub puv npo, thiab tau (יחוח)Yahweh li koob hmoov puv nkaus, cia li txeeb dej hiavtxwv thiab yav qab teb ua koj tug.

24 Mauxes hais txog Asaws tias, thov kom Asaws tau koob hmoov ntau dua cov tub huvsi, thov kom nws cov kwvtij hlub nws, thiab cia nws raus kotaw rau hauv thoob roj.

25 Koj tej las rooj yog hlau thiab tooj liab, koj txojsia ntev li cas, koj lub zog yuav muaj ntev li ntawd.

26 Yesulus es, tsis muaj leejtwg zoo cuag li (יחוח)Yahweh. Nws taug txojkev saum ntuj los pab koj thiab muaj meej mom caij huab cua los.

27 (יחוח)Yahweh uas ib txwm muaj nyob yog nej lub chaw nyob, nws txhais npab uas nyob mus ib txhis cug rawv nej. Nws ntiab yeeb ncuab khiav ntawm nej xub ntiag mus, thiab hais tias, ua kom puam tsuaj lauj!

28 Ua li no Ixayees thiaj li nyob tso siab plhuav, Yakhauj caj ces kuj nyob thaj yeeb rau hauv lub tebchaws uas muaj qoob loo, muaj cawv txiv hmab, thiab lub ntuj tso dej lwg nqis los.

29 Ixayees es, nej tau hmoov zoo tiag tiag li. Leejtwg zoo thooj li nej, yog haiv neeg uas (יחוח)Yahweh cawm kom dim?  Nws yog daim hlau uas pab nej, nws yog rab ntaj uas ua kom nej kov yeej. Nej cov yeeb ncuab yuav nkag tuaj hawm nej, nej yuav tsuj pes ntiag saum lawv tej chaw siab.