KEVCAI 34

Mauxes Tuag

1Mauxes nce ntawm lub tiaj Mau‑as mus rau saum lub roob Nenpaus, txog lub ncov roob Pixakas, uas nyob ncaj lub moos Yelikhaus. Mas (יחוח)Yahweh qhia

nws pom tag nrho lub tebchaws huvsi, yog Kile‑as mus txog lub moos Daj,

2 thiab tag nrho Nathalis thiab Efa‑is thiab Manaxes teb chaws, thiab tag nrho Yahdah tebchaws mus txog hiavtxwv uas nyob sab hnub poob,

3 thiab Nekes thiab nras tiaj uas yog txij ntua Yelikhaus uas yog lub moos toov laj mus txog lub moos Xau‑as.

4 Mas (יחוח)Yahweh hais rau Mauxes tias, no yog lub tebchaws uas kuv cog lus ruaj rau Anplaham, Ixaj thiab Yakhauj tias, kuv yuav muab pub rau nej caj ces. Kuv pub koj lub qhov muag pom tiamsis koj yuav tsis tau hla mus rau hauv lub tebchaws ntawd.

5 Ces (יחוח)Yahweh tus tub qhe Mauxes thiaj li tuag rau qhov ntawd rau hauv Mau‑as tebchaws, raws li (יחוח)Yahweh tau hais lawd.

6 (יחוח)Yahweh muab nws faus rau hauv lub hav uas ncaj lub moos Npepe‑aus hauv Mau‑as tebchaws. Mas los txog niaj hnub nimno, tsis muaj leejtwg paub lub chaw uas faus Mauxes.

7 Thaum Mauxes tuag ntawd, nws hnub nyoog muaj ib puas nees nkaum xyoo. Nws qhov muag tseem pom kev zoo, nws lub zog kuj tsis ntaug.

8 Mas cov Ixayees quaj Mauxes tau peb caug hnub hauv lub tiaj Mau‑as, mam li tag lub sijhawm uas quaj ntsuag Mauxes.

9 Yahshua uas yog Noos tus tub muaj lajlim tswvyim plab plaws puv npo, vim yog Mauxes twb tsa tes npuab saum nws lawm. Yog li ntawd cov Ixayees thiaj li mloog nws lus thiab ua raws li (יחוח)Yahweh hais rau Mauxes lawd.

10 Txij hnub ntawd los, tsis muaj ib tug xibhwb cev (יחוח)Yahweh lus twg tshwm rau hauv cov Ixayees zoo ib yam li Mauxes uas (יחוח)Yahweh nrog nraim tim ntsej tim muag lawm.

11 Tsis muaj ib tug twg zoo li Mauxes uas ua tej txujci tseem ceeb thiab txujci loj huvsi uas (יחוח)Yahweh txib nws ua rau hauv Iziv tebchaws rau Falaus thiab nws cov tub teg tub taws sawvdaws thiab tag nrho nws lub tebchaws huvsi lawm.

12 Tsis muaj ib tug twg ua tau txhua yam haujlwm uas muaj hwjchim thiab txhua yam haujlwm loj uas txaus ntshai heev yam li Mauxes ua tab meeg cov Ixayees sawvdaws pom lawm.