YAHSHUA 1

Npaj Mus Txeeb Khana‑as Tebchaws

1 Thaum (יחוח)Yahweh tus tub qhe Mauxes tuag lawm, (יחוח)Yahweh hais rau Noos tus tub Yahshua uas pab Mauxes tias,

 2kuv tus tub qhe Mauxes tuag lawm, mas nimno koj thiab haiv neeg no sawvdaws cia li sawv kev hla tus dej Yaladees no mus rau hauv lub tebchaws uas kuv muab pub rau cov Ixayees.

3 Txhua thaj uas nej txhais kotaw mus tsuj, kuv muab pub rau nej raws li kuv tau cog lus rau Mauxes lawd.

4 Txij ntawm tebchaws moj sab qhua mus rau lub roob Lenpanoos, thiab mus txog tus niag dej Yufetis, tag nrho cov Hithais lub tebchaws mus txog Hiavtxwv Loj sab hnub poob yuav ua nej li tebchaws.

5 Tsis muaj leejtwg tawm tsam tau koj mus tag koj sim neej.  Kuv nrog nraim Mauxes li cas, kuv yuav nrog nraim koj li ntawd.  Kuv yuav tsis ncaim koj, tsis tso koj tseg.

6 Koj cia li ua khov kho thiab ua siab loj siab tuab, rau qhov koj yuav ua rau haiv neeg no tau lub tebchaws ntawd ua qub txeeg qub teg, yog lub tebchaws uas kuv cog lus ruaj rau lawv tej poj koob yawm txwv tias yuav pub rau lawv.

7 Tsuav yog koj ua khov kho thiab ua siab loj siab tuab, ceev faj ua raws li tej kevcai huvsi uas kuv tus tub qhe Mauxes tau hais rau koj lawm. Tsis txhob tig ntawm txoj kevcai no mus rau sab xis lossis sab laug, kom koj mus rau qhovtwg, koj thiaj ua tau txhua yam tiav zoo.

8 Tsis txhob cia phau ntawv kevcai no ncaim ntawm koj lub qhov ncauj mus.  Koj yuav tau niaj hnub niaj hmo tshawb nrhiav kom koj thiaj paub ceev faj ua raws li txhua yam uas sau rau hauv thiab koj thiaj li vam meej thiab ua tau txhua yam tiav zoo.   

9 Kuv twb hais rau koj lawm los tsis yog?  Cia li ua khov kho thiab ua siab loj siab tuab, tsis txhob ntshai tsis txhob poob siab kiag li, rau qhov koj mus rau qhovtwg, (יחוח)Yahweh uas yog koj Tus Tswv yeej nrog nraim koj.  

10 Yahshua hais rau cov thawj uas kav pej xeem tias,

11 Nej cia li mus hais rau cov pej xeem thoob plaws hauv lub zos tias, hwb xwm mov noj cia peb hnub xwb, nej yuav tau hla tus dej Yaladees no mus txeeb lub teb chaws uas (יחוח)Yahweh uas yog nej Tus Tswv pub rau nej ua nej tug.

12 Thiab Yahshua hais rau xeem Lunpees thiab xeem Nkas thiab ib nrab xeem Manaxes tias,

13 nej cia li nco ntsoov tej lus uas (יחוח)Yahweh tus tub qhe Mauxes hais rau nej tias, (יחוח)Yahweh uas yog nej Tus Tswv tu chaw rau nej so thiab pub lub tebchaws no rau nej.

14 Cia nej cov poj niam menyuam thiab nej tej tsiaj txhu nyob hauv lub tebchaws uas Mauxes muab rau nej uas yog ntawm tus dej Yaladees sab hnub tuaj. Tiamsis nej cov txivneej uas txawj ua rog sawvdaws yuav tau tuav rawv cuab yeej ua rog hla ua nej cov kwvtij ntej mus pab lawv,

15 mus txog thaum (יחוח)Yahweh pub chaw rau nej cov kwvtij so ib yam li pub rau nej lawd, thiab mus txog thaum lawv txeeb tau lub tebchaws uas (יחוח)Yahweh uas yog nej Tus Tswv pub rau lawv. Ces nej li rov qab los nyob rau hauv lub tebchaws uas yog nej teej nej tug, yog lub tebchaws uas (יחוח)Yahweh tus tub qhe Mauxes muab rau nej ntawm tus dej Yaladees sab hnub tuaj.

16 Lawv teb Yahshua tias, txhua yam uas koj hais rau peb, peb yuav ua, thiab koj kom peb mus qhovtwg peb kuj mus.

17 Peb mloog Mauxes lus txhua yam li cas, peb yuav mloog koj lus ib yam li ntawd. Tsuas yog thov kom (יחוח)Yahweh uas yog koj Tus Tswv nrog nraim koj ib yam li nrog nraim Mauxes xwb.

18 Leejtwg tawv nyom koj tej lus tsis mloog tej lus uas koj hais, txawm yog koj hais kom ua abtsi kuj xij, tus ntawd yuav raug muab tua pov tseg. Koj cia li ua khov kho thiab ua siab loj siab tuab.