Txib Ob Leeg Mus Tshuaj Lub Moos Yelikhaus

1 Mas Noos tus tub Yahshua txib ob leeg tawm hauv lub moos Sithis twjywm mus tshuaj lub tebchaws, hais rau ob tug tias, mus tshuaj lub tebchaws ntawd ua tib zoo tshuaj lub moos Yelikhaus. Nkawv thiaj mus, nkag mus rau hauv ib tug poj muag cev uas hu ua Lahaj lub tsev thiab so qhov ntawd.

2 Muaj tibneeg hais rau vajntxwv hauv lub moos Yelikhaus tias, hmo no muaj cov txivneej Ixayees qee leej tuaj rau hauv no, yog tuaj tshuaj tebchaws.

3 Mas vajntxwv hauv lub moos Yelikhaus txib tibneeg mus hais rau Lahaj tias, cia li coj cov txivneej uas tuaj nkag rau hauv koj lub tsev tawm los, vim lawv tuaj tshuaj peb lub tebchaws xwb.

4 Tiamsis tus pojniam ntawd muab ob tug txivneej ntawd zais lawm mas hais rau lawv tias, muaj txivneej tuaj nrhiav kuv tiag tiamsis xyov tuaj qhovtwg tuaj kuv tsis paub.

5 Thaum tsaus ntuj zuag yuav kaw rooj loog lawv twb tawm mus lawm. Xyov lawv mus qhovtwg kuv tsis paub.  Cia li maj nroos caum lawv qab mus nej thiaj caum cuag.

6 Tiamsis tus pojniam ntawd twb coj nkawv nce rau txheej tsev saud lawm thiab muab nkawv zais rau hauv cov teg qab maj uas nws muab tso saum tsev lawm.

7 Lawv txawm caum nkawv qab mus txog ntawm lub chaw hla tus dej Yaladees.  Thaum cov uas caum qab ntawd tawm mus lawm, luag txawm kaw rooj loog.

8 Thaum nkawv tseem tsis tau pw, tus pojniam ntawd nce mus cuag nkawv rau txheej saud, 

9 thiab hais rau nkawv tias, kuv paub tseeb tias (יחוח)Yahweh pub lub tebchaws no rau nej, thiab peb ntshai nej kawg nkaus li, thiab tag nrho tej tibneeg hauv lub tebchaws los ntshai nej ua siab ntsws yaj tag.

10 Rau qhov peb twb hnov txog qhov uas (יחוח)Yahweh ua rau dej Hiavtxwv Liab qhuav rau ntawm nej xubntiag rau thaum nej tawm hauv Iziv tebchaws los, thiab hnov txog tej uas nej ua rau cov Amaulais ob tug vajntxwv uas nyob sab ntug dej Yaladees hnub tuaj, yog Xihoos thiab Aus uas nej muab ua puam tsuaj tag.

11 Thaum peb hnov txog tej no peb lub siab yaj tag tamsim ntawd thiab tsis muaj ib tug muaj siab tuab li lawm vim yog tim nej. (יחוח)Yahweh uas yog nej Tus Tswv yeej yog Tus Tswv uas kav saum ntuj thiab hauv ntiajteb.

12 Mas nimno thov neb tuav (יחוח)Yahweh lub npe cog lus twv rau kuv tias kuv hlub neb li cas, neb yuav hlub kuv tsev neeg ib yam li ntawd, thiab muab ib yam abtsi los ua puav pheej rau kuv tso siab tau.

13 Thiab thov neb tseg kuv niam, kuv txiv, kuv tej neej nus, tej niam hluas, niam laus, thiab lawv tsev neeg txhua tus cia thiab cawm peb dim txojkev tuag.

14 Nkawv teb tias, muab wb txojsia pauv nej txojsia lauj! Yog nej tsis qhia tej no rau leejtwg, wb yuav hlub thiab ua ncaj rau koj rau thaum (יחוח)Yahweh pub lub tebchaws no rau peb.

15 Ces tus pojniam ntawd txawm muab hlua tso dauv ntawm qhov rais rau nkawv nqis mus, rau qhov nws lub tsev koom kiag phab ntsa loog, nws nyob hauv lub ntsa loog ntag.

16 Nws hais rau nkawv tias, cia li nce mus lawm pem roob tsam cov uas caum neb qab ho ntsib neb. Cia li mus khiav nkaum peb hnub txog thaum cov uas caum neb qab rov los tso neb mam li tawm mus.

17 Nkawv thiaj hais rau nws tias, wb yuav ua raws nraim li tej lus uas koj kom wb twv cia no.

18 Thaum peb txeem los rau hauv lub tebchaws no, koj cia li muab txoj xov liab no khi rau ntawm lub qhov rais uas koj tso wb nqis ntawd.  Thiab koj hu koj niam koj txiv koj tej neej nus thiab koj txiv tsev neeg sawvdaws tuaj nyob hauv koj tsev.

19 Yog leejtwg tawm mus tom tej kev dhau nraum lub qhov rooj lawm, nws yuav ris nws cov ntshav, wb tsis txhaum. Tiamsis yog leejtwg tsa tes ntaus ib tug twg uas nrog koj nyob hauv tsev, mas wb yuav ris nws cov ntshav.

20 Tiamsis yog koj qhia zaj no rau leejtwg lawm, wb yuav dim tej lus uas koj kom wb twv no.

21 Tus pojniam ntawd hais tias, cia yuav raws li neb tej lus lauj! Nws txawm xa nkawv mus, nkawv thiaj tawm mus lawm. Nws txawm muab txoj xov liab khi rau ntawm lub qhov rais.

22 Nkawv tawm mus ces nce mus rau pem roob so tau peb hnub mus txog thaum cov uas caum nkawv rov qab los.  Lawv xawb nrhiav taug kev txhua nrho kuj tsis pom.

23 Nkawv thiaj nqis pem roob los thiab hla mus cuag Yahshua uas yog Noos tus tub, thiab piav tej uas nkawv mus ntsib huvsi rau Yahshua mloog.

24 Nkawv hais rau Yahshua tias, (יחוח)Yahweh muab lub tebchaws ntawd huvsi cob rau hauv peb txhais tes tiag tiag li lawm. Dua li ntawd cov tibneeg uas nyob hauv lub tebchaws kuj ntshai peb ua siab ntsws yaj tag.