Cov Ixayees Hla Tus Dej Yaladees

1 Yahshua thiab cov Ixayees sawvdaws sawv ntxov tawm ntawm Sithis mus txog tus dej Yaladees mas lawv tsuam chaw nyob qhov ntawd ua ntej uas lawv yuav hla mus.

2 Thaum dhau peb hnub lawd cov ua thawj ncig thoob plaws hauv lub yeej,

3 thiab hais rau cov pejxeem tias, thaum nej pom cov pov thawj uas yog xeem Levis kwv (יחוח)Yahweh uas yog nej Tus Tswv lub phij xab sib cog lus mus, nej cia li sawv kev raws lawv mus,

4 nej thiaj pom qab kev mus, rau qhov nej tsis tau mus dua txojkev ntawd.  Nej yuav ua qab deb ntawm lub phij xab kwvlam ob txhiab tshim, tsis txhob txav mus ze lub phij xab ntawd.

5 Yahshua thiaj hais rau cov pejxeem tias, cia li tu kom nej dawb huv, rau qhov tagkis (יחוח)Yahweh yuav ua txujci tseem ceeb rau hauv nej nruab nrab. 

6 Thiab Yahshua hais rau cov pov thawj tias, cia li kwv lub phij xab sib cog lus ua cov pejxeem ntej mus. Lawv txawm kwv lub phij xab sib cog lus mus ua cov pejxeem ntej.  

7 (יחוח)Yahweh hais rau Yahshua tias, hnub no kuv yuav pib tsa koj ua loj rau hauv cov Ixayees sawvdaws kom lawv saib taus, kom lawv thiaj paub tias kuv nrog nraim Mauxes li cas, kuv yuav nrog nraim koj li ntawd.

8 Thiab koj cia li hais rau cov pov thawj uas kwv lub phij xab sib cog lus tias, thaum nej los txog ntawm ntug dej Yaladees, nej cia li sawv nres rau hauv nruab nrab tus dej Yaladees.

9 Thiab Yahshua hais rau cov Ixayees tias, cia li los ntawm no, thiab tig ntsej mloog (יחוח)Yahweh uas yog nej Tus Tswv tej lus.  

10 Yahshua hais tias, vim tej no nej yuav paub tias (יחוח)Yahweh uas muaj txojsia nyob yeej nrog nraim nej nyob, thiab nws yuav ntiab cov Khana‑as, cov Hithais, cov Hivais, cov Pelixais, cov Kawkasis, cov Amaulais thiab cov Yenpus tawm ntawm nej hauv ntej mus tiag tiag li.

11 Saib maj, Tus Tswv uas kav tag nrho lub qab ntuj no lub phij xab sib cog lus yuav ua nej ntej mus rau hauv tus dej Yaladees.

12 Vim li no cia li xaiv kaum ob leeg tawm hauv kaum ob xeem Ixayees los, ib xeem ib leeg.

13 Thaum cov pov thawj uas kwv (יחוח)Yahweh uas yog Tus Tswv uas kav tag nrho lub qab ntuj lub phij xab lawv txhais xib taws nqis rau hauv tus dej Yaladees, ces tus dej Yaladees yuav tsis ntws los. Cov dej uas ntws sab ped los yuav tauv nkaus ua ib phab.

14 Thaum cov pejxeem tawm ntawm lawv lub chaw tsuam mus hla tus dej Yaladees, cov pov thawj kwv lub phij xab sib cog lus mus ua lawv ntej.

15 Lub caij sau qoob ntawd, tus dej Yaladees pheej nyab rau ob sab ntug. Thaum cov pov thawj uas kwv lub phij xab los txog ntawm ntug dej Yaladees thiab lawv txhais kotaw nqis rau hauv tus dej,

16 mas cov dej uas ntws sab ped los txawm tauv nkaus ua ib phab ntawm lub moos Adas uas nyob ze lub moos Xalethas, hos cov dej sab nrad uas ntws mus rau Hiavtxwv Alanpas uas yog Hiavtxwv Ntsev tu nrho lawm.  Mas cov Ixayees kuj hla ncaj ntawm lub moos Yelikhaus.  

17 Lub sijhawm uas cov Ixayees sawvdaws hla kev qhuav qhawv mus, cov pov thawj uas kwv (יחוח)Yahweh lub phij xab sib cog lus kuj sawv nres av qhuav qhawv hauv nruab nrab tus dej Yaladees mus txog thaum cov pejxeem sawvdaws hla tus dej Yaladees dhau tag huvsi.