Kevcai Nplua

1 Yog leejtwg nyiag nyuj lossis yaj mus tua lossis muab muag, nws yuav tau them tsib tug nyuj pauj ib tug nyuj, thiab them plaub tug yaj pauj ib tug yaj.

2 Yog leejtwg pom tub sab tab tom tho qhov vaj qhov tsev es txawm ntaus tus tub sab ntawd tuag, mas nws yuav tsis muaj txim.

3 Yog lub hnub tawm lawm tus uas ntaus ntawd yuav muaj lub txim uas tua tibneeg. Tus tub sab yuav tau them pauj. Yog nws tsis muaj abtsi them, yuav tau muab nws muag los them tej uas nws nyiag lawm.

4 Yog nrhiav tau tej tsiaj uas nyiag hauv nws txhais tes tseem ciaj sia, tsis hais nyuj, nees luav, los yaj, tub sab yuav them ob npaug.

5 Yog leejtwg tso tsiaj mus noj zaub hauv teb lossis hauv vaj txiv hmab, es nws cia tej tsiaj ntawd khiav los noj qoob loo hauv lwm tus li liaj teb, nws yuav tau muab nws tej qoob loo uas zoo kawg hauv nws liaj teb thiab nws vaj txiv hmab coj mus them.

6 Yog leejtwg zes taws es kub rau tej xyuv pos, kub mus kis rau luag tej pawg qoob thiab tej qoob uas tsis tau hlais thiab tej teb kub nyhiab tag, tus uas zes taws ntawd yuav tau them puv npo rau luag.

7 Yog leejtwg muab tej khoom tseem ceeb qhov txhia chaw rau kwvtij zej zog khaws cia, es tej khoom ntawd raug tub sab nyiag hauv tsev lawm, yog ntes tau tub sab, tub sab yuav them ob npaug.

8 Yog ntes tsis tau tub sab, tus tswv tsev yuav mus cuag (יחוח)Yahweh, yuav tshuaj saib nws txhais tes tau nyiag tus kwvtij ntawd li qhov txhia chaw los tsis tau.

9 Txhua tshaj plaub uas muaj tibneeg tuaj hais, tsis hais nyuj, nees luav, yaj, los ris tsho, lossis ib yam abtsi uas ploj lawm, yog muaj ib tug tuaj hais tias, yam no yog kuv li, mas ob tog yuav coj tshaj plaub ntawd mus cuag (יחוח)Yahweh.

(יחוח)Yahweh yuav txiav cai tias leejtwg txhaum mas tus ntawd yuav tau them ob npaug.

10 Yog leejtwg muab nws li nees luav los nyuj los yaj lossis lwm yam tsiaj rau kwvtij zej zog saib, es tus tsiaj ntawd tuag lossis raug mob lossis muaj tibneeg muab raws mus lawm tsis muaj leejtwg pom,

11 Mas tus uas txais saib tus tsiaj ntawd yuav tau twv rau tus tswv tsiaj tab meeg (יחוח)Yahweh xubntiag saib nws txhais tes puas tau nyiag tus kwvtij ntawd li qhov txhia chaw. Mas tus tswv tsiaj yuav tau yeem thiab tus uas txais saib ntawd tsis txog them abtsi li.

12 Tiamsis yog tus tsiaj raug tub sab nyiag mas tus uas saib yuav tau them rau tus tswv tsiaj.

13 Yog tias raug tsiaj nyaum muab tom dua tag lawm mas nws yuav tau coj lub cev tuag ntawd los rau tus tswv pom. Tus uas saib tsis txog them tus tsiaj uas raug muab dua tag lawm.

14 Yog leejtwg qev kwvtij zej zog li tsiaj txhu es tus tsiaj ntawd raug mob lossis tuag rau thaum tus tswv tsis nyob ntawd, tus uas qev yuav tau them puv npo.

15 Yog tus tswv nyob ntawd thiab, tus uas qev tsis txog them. Yog ntiav los siv kuj yuav them nqi ntiav xwb.

​

Kevcai Ncaj Ncees Thiab Kev Ntseeg

16 Yog leejtwg mus dag ntxias tus hluas nkauj uas tsis tau deev dua hluas nraug thiab tsis tau muaj leejtwg qhaib, thiab nrog tus ntxhais ntawd pw lawm, mas nws yuav tau them cov nqi mis nqi hno thiab yuav tus ntxhais ntawd ua nws pojniam.

17 Yog leej txiv tsis yeem muab tus ntxhais ntawd qua rau nws, tus uas dag ntawd yuav tau them npaum li uas nqi mis nqi hno uas yuav tus ntxhais tsis tau deev dua hluas nraug.

18 Tus pojniam uas ua txiv neeb txiv yaig tsis txhob tseg nws muaj txojsia nyob.

19 Leejtwg deev tsiaj txhu yuav tau raug txim tuag.

20 Leej twg tua tsiaj xyeem rau tej timtswv uas tsis yog (יחוח)Yahweh, yuav raug muab ua kom puam tsuaj tag.

21 Nej tsis txhob tsim txom thiab quab yuam lwm haiv neeg, rau qhov nej twb ua lwm haiv neeg nyob hauv Iziv tebchaws lawm.

22 Tsis txhob tsuj yuam tej poj ntsuam thiab tej menyuam ntsuag.

23 Yog nej tsuj yuam lawv es lawv quaj thov txog kuv, kuv yeej yuav mloog lawv lub suab quaj. 

24 Mas kuv txojkev npau taws yuav npau vog tuaj thiab kuv yuav xuas ntaj tua nej. Nej tej pojniam kuj yuav ua poj ntsuam thiab nej tej menyuam yuav ua menyuam tsis muaj txiv.

25 Yog nej muab nyiaj txais rau kuv haiv neeg tus twg uas pluag thiab nrog nej nyob, tsis txhob ua li tus uas muab tso txhawb thiab tsis txhob xam paj nyiag rau nws.

26 Yog nej tau txais kwvtij zej zog lub tsho ntev yuam nqi rau nej, nej yuav xa lub tsho rov qab ua ntej uas hnub tsis tau poob qho,

27 Rau qhov nws muaj tib lub tsho ntawd hnav npog nws lub cev. Yog tsis ua li ntawd, thaum nws mus pw nws yuav muaj abtsi npua? Yog nws quaj thov txog kuv, kuv yuav mloog, rau qhov kuv muaj lub siab hlub txhua tus.

28 Nej tsis txhob thuam (יחוח)Yahweh lossis tsawm foom cov uas kav nej cov tibneeg.

29 Tsis txhob sej ntev, cia li coj nej tej qoob loo zoo zoo thiab txhua yam kua txiv ntawm lub chaw tsuam tuaj xyeem rau (יחוח)Yahweh. Thiab yuav muab nej tus tub hlob pub rau kuv.

30 Nej tej nyuj thiab nej tej yaj, kuj ua ib yam li ntawd. Cia nrog leej niam nyob xya hnub. Mas hnub uas yim, coj tuaj pub rau kuv.

31 Nej yuav ua tibneeg dawb huv rau kuv. Yog li no, tej tsiaj uas raug tsiaj nyaum muab tom tuag tom tshav zaub, nej tsis txhob noj, cia li muab pov tseg rau dev noj.