Kevcai Saib Cov Qhev

(Kevcai 15:12-18)

1 Ntawm no mus yog tej kevcai uas koj yuav tau qhia rau lawv paub.

2 Yog nej yuav ib tug tibneeg Hinplus ua qhev, nws yuav ua koj qhev rau xyoo xwb, xyoo uas xya, nws yuav dim tsis txog txhiv.

3 Yog tus qhev ntawd los ib leeg xwb, nws kuj dim ib leeg mus, yog nws muaj pojniam los thiab, tus pojniam kuj nrog nws dim thiab.

4 Yog tus lospav yuav pojniam rau nws thiab yug tau tub lossis ntxhais, tus pojniam thiab cov menyuam ntawd tseem ua tus lospav li qhev, nws dim ib leeg xwb.

5 Tiamsis yog tus qhev hais tseeb tias, kuv nyiam tus lospav thiab kuv pojniam menyuam, kuv tsis xav tawm mus nyob ywj pheej.

6 Mas tus lospav yuav coj nws mus cuag (יחוח)Yahweh, coj nws mus rau ntawm lub qhov rooj lossis ntawm ob tug npuab rooj, mas tus lospav yuav xuas koob laum nws taub ntsej qhov ntawd mas nws yuav ua tus lospav qhev mus tag nws sim neej.

7 Yog leejtwg muab nws tus ntxhais muag ua qhev, mas tus ntxhais ntawd yuav tsis dim yam li lwm tus tub qhe.

8 Yog nws tsis haum tus lospav uas xaiv nws los ua niam yau ntawd lub siab, mas tus lospav yuav cia leej txiv txhiv nws. Tus lospav tsis muaj cai muab nws muag rau lwm haiv neeg, rau qhov nws ua tsis ncaj rau tus ntxhais ntawd.

9 Yog tus lospav yuav tus ntxhais ntawd rau nws tus tub ua pojniam, nws yuav tau ua zoo rau tus ntxhais ntawd ib yam li ua rau nws tej ntxhais.

10 Yog nws yuav lwm tus los ua niam yau, nws yuav tau pub niam hlob noj sib luag, hnav sib luag, thiab pw ua ke sib luag ib yam li qub.

11 Yog nws tsis ua peb yam no mas tus ntxhais ntawd yuav dim dawb tsis txog muab nyiaj txhiv.

​

Kevcai Rau Tus Uas Ua Lim Hiam

12 Leejtwg ntaus tibneeg tuag, mas nws yuav raug lub txim tuag.

13 Tiamsis tsis yog nws txhob txwm tua, tiamsis yog (יחוח)Yahweh cia tus ntawd tuag rau hauv nws txhais tes, mas kuv yuav npaj ib lub chaw cia rau nws

khiav mus nyob.

14 Tiamsis yog nws txhob txwm xav tswvyim phem mus ntaus tibneeg tuag, mas koj yuav muab nws rub ntawm kuv lub thaj mus, rau txim kom tuag.

15 Leejtwg ntaus nws niam nws txiv, tus ntawd yuav raug txim tuag.

16 Leejtwg nyiag tibneeg mus muag lossis tseem cia nyob ntawm nws txhais tes kuj xij, nws yuav raug txim tuag.

17 Leejtwg cem foom nws niam nws txiv tsis zoo, yuav raug txim tuag.

18 Yog muaj ob leeg sib cav sib ceg es ib tug xuas pob zeb ntaus lossis nkaug nrig raug ib tug, tiamsis tsis tuag, tsuas yog mob pw hauv txaj xwb.

19 Yog tus uas raug mob ntawd sawv taus tuav tus pas nrig mus tau nraum zoov, hauv tsev, mas tus uas ntaus ntawd kuj dim nws lub txim, tsuas yog nws yuav them tej nqi sijhawm uas raug mob, thiab tu tus mob ntawd kom zoo kiag.

20 Yog leejtwg xuas qws ntaus nws tej tub qhe nkauj qhe es tus qhev ntawd tuag, tus ntawd yuav tau raug txiav txim.

21 Yog tus qhev ntawd nyob tau ib hnub lossis ob hnub, tus lospav yuav tsis raug txiav txim, rau qhov tus qhev ntawd yog nws teej tug.

22 Yog ob tug txivneej sib ntaus es ho ntaus raug ib tug pojniam uas suab menyuam, ua rau nchuav menyuam tiamsis tus pojniam tsis muaj li cas, mas yuav nplua tus uas ntaus ntawd npaum li nws tus txiv hu nqi thiab nws yuav them npaum li cov uas tu plaub tu.

23 Tiamsis yog puas xwm li cas, kuj yuav muab siav pauj siav,

24 qhov muag pauj qhov muag, kaus hniav pauj kaus hniav, tes pauj tes, taw pauj taw,

25 qhov kub nyhiab pauj qhov kub nyhiab, qhov txhab pauj qhov txhab, qhov doog pauj qhov doog.

26 Yog leejtwg ntaus nws tus tub, qhe nkauj qhe, qhov muag nws thiaj dig lawm, nws yuav tau muab tus qhev ntawd tso dim dawb, vim tim lub qhov muag dig lawm.

27 Yog nws ntaus nws tus tub qhe, nkauj qhe, ua rau lov hniav, nws yuav tau muab tus qhev ntawd tso dim dawb, vim tim tus hniav ntawd lov lawm.

​

Kevcai Rau Tus Tswv Tsiaj 

28 Yog nyuj nrau tus txivneej twg los tus pojniam twg tuag, yuav tau muab pob zeb ntaus tus nyuj ntawd kom tuag, thiab tsis txhob noj cov nqaij nyuj kiag li. Tiamsis tus tswv nyuj ntawd tsis txhaum.

29 Tiamsis yog tus nyuj ntawd twb yeej nrau lwm tus tibneeg lawm thiab muaj tibneeg tuaj qhia rau tus tswv paub lawm, tiamsis tus tswv tsis muab kaw cia, tus nyuj thiaj li nrau pojniam lossis txivneej tuag, mas tus nyuj yuav tau raug pob zeb ntaus tuag thiab tus tswv kuj yuav raug txim tuag.

30 Yog luag hu nqi txhiv tus tswv nyuj, nws yuav tau them nqi txhiv nws txojsia npaum li luag hu.

31 Yog tus nyuj ntawd nrau leejtwg tus tub los ntxhais, kuj yuav txiav txim rau tus tswv raws li tib txoj kevcai no.

32 Yog tus nyuj ntawd nrau ib tug tub qhe lossis nkauj qhe, tus tswv nyuj yuav them peb caug sekhees nyiaj rau tus lospav, thiab tus nyuj yuav raug pob zeb ntaus tuag.

33 Yog leejtwg qheb qhov cia lossis khawb qhov tsis muab faus, es nyuj lossis nees luav poob rau hauv,

34 Mas tus tswv uas khawb qhov, yuav tau them tus tsiaj ntawd nqi. Nws yuav them nqi rau tus tswv tsiaj, es nws yuav tus tsiaj tuag ntawd.

35 Yog leejtwg tus nyuj nrau lwm tus li nyuj tuag, yuav tau muab tus nyuj uas nrau ntawd muag thiab muab cov nqi faib rau ob tog, thiab muab tus nyuj uas tuag faib rau ob tog thiab.

36 Yog paub tias tus nyuj ntawd twb nrau lwm tus los lawm uas tus tswv tsis muab kaw, tus tswv nyuj yuav tau them ib tug nyuj pauj tus nyuj uas tuag, es nws yuav tus nyuj uas tuag ntawd.