Kaum Txoj Kevcai

(Kevcai 5:1-21)

1 (יחוח)Yahweh hais tej lus no huvsi tias,

2 Kuv yog (יחוח)Yahweh uas yog koj Tus Tswv, uas coj koj tawm hauv Iziv tebchaws, hauv txojkev ua qhev los.

3 Koj tsis txhob pe dua lwm Tus Tswv uas tsis yog kuv kiag li.

4 Koj tsis txhob ua dab mlom rau koj pe, tsis hais tej uas muaj yam ntxwv zoo li tej uas nyob saum nruab ntug, lossis tej uas nyob hauv ntiajteb, lossis tej uas nyob hauv dej, hauv nruab tiv txwv.

5 Tsis txhob pe thiab tsis txhob ua koom tu tej dab mlom ntawd, rau qhov kuv yog (יחוח)Yahweh, uas yog koj Tus Tswv, yog Tus Tswv uas khib xeeb heev, mas kuv yuav rau txim rau nej cov uas yog leej txiv uas ntxub kuv, thiab yuav poob mus rau nws cov tub ki mus txog peb plaub tiam.

6 Tiamsis kuv yuav ua txojkev hlub uas ruaj khov tshwm rau cov uas hlub kuv thiab ua raws li kuv tej kevcai ntau txhiab tiam tibneeg.

7 Tsis txhob lam hais saib tsis taus (יחוח)Yahweh uas yog koj Tus Tswv lub npe, rau qhov tus uas lam hais saib tsis taus nws lub npe, mas (יחוח)Yahweh yuav tsis zam txim. 

8 Koj yuav tau nco ntsoov hwm hnub Sabbath ua hnub uas dawb huv.

9 Koj yuav tau khwv thiab ua koj tej haujlwm huvsi rau hnub.

10 Tiamsis hnub xya, yog hnub Sabbath uas caiv rau (יחוח)Yahweh uas yog koj Tus Tswv. Hnub ntawd tsis txhob ua ib yam haujlwm abtsi li, tsis hais koj tus kheej thiab koj tej tub, tej ntxhais, thiab koj cov tub qhe, nkauj qhe, thiab koj tej tsiaj txhu, thiab lwm haiv neeg uas tuaj nyob hauv koj lub moos.

11 Vim tias rau hnub xwb, (יחוח)Yahweh tau tsim lub ntuj lub teb thiab hiavtxwv, thiab txhua yam uas muaj nyob rau hauv, mas hnub uas xya, (יחוח)Yahweh so. Vim li no, (יחוח)Yahweh thiaj foom koob hmoov rau hnub Sabbath thiab muab hnub ntawd teem ua hnub uas dawb huv.

12 Koj yuav tau hwm koj niam koj txiv kom koj thiaj muaj txojsia nyob ntev rau hauv lub tebchaws uas (יחוח)Yahweh uas yog koj Tus Tswv pub rau koj.

13 Tsis txhob tua tibneeg.

14 Tsis txhob deev luag poj luag txiv.

15 Tsis txhob ua tub sab.

16 Tsis txhob ua cuav timkhawv iab liam luag lwm tus.

17 Tsis txhob ua siab hlob xav tau luag vaj luag tsev, tsis txhob ua siab hlob xav tau luag tus pojniam thiab luag tus tub qhe nkauj qhe, luag tej nyuj, tej nees luav lossis ib yam abtsi uas yog luag li.

​

Cov Pejxeem Ntshai Heev

(Kevcai 5:22-33)

18 Thaum cov pejxeem sawvdaws hnov xob nthe, pom xob laim liab vog thiab hnov lub suab raj kub yaj nrov thiab pom pa ncho hlob saum lub roob, lawv nyob deb deb thiab ntshai heev tshee hnyo.

19 Thiab lawv hais rau Mauxes tias, koj cia li hais rau peb xwb, peb yuav mloog. Tsis txhob cia (יחוח)Yahweh hais rau peb tsam ces peb tuag.

20 Mauxes thiaj hais rau cov pejxeem tias, tsis txhob ntshai, rau qhov (יחוח)Yahweh nqis los sim nej lub siab xwb, kom nej thiaj li paub ntshai nws tsis tu ncua li thiab nej thiaj tsis ua txhaum.

21 Cov pejxeem nyob deb deb, tiamsis Mauxes txav mus ze qhov uas tsaus ntuj nti uas (יחוח)Yahweh nyob.

​

Kevcai Hais Txog Lub Thaj Xyeem

22 (יחוח)Yahweh hais rau Mauxes tias, cia li hais rau cov Ixayees li no tias, nej twb pom lawm tias, kuv hais lus saum ntuj los rau nej.

23 Nej muaj kuv lawm mas tsis txhob ua dab mlom nyiaj lossis dab mlom kub rau nej pe.

24 Koj yuav tau xuas av ua lub thaj xyeem rau kuv, thiab saum lub thaj ntawd, koj yuav tau muab koj tej yaj, tej nyuj tua ua kevcai hlawv xyeem thiab ua kevcai xyeem sib raug zoo. Hauv txhua lub chaw uas kuv tu kom nco txog kuv lub npe, mas kuv yuav los ntsib koj thiab foom koob hmoov rau koj.

25 Yog koj xuas pob zeb ua lub thaj xyeem rau kuv, tsis txhob muab tej pob zeb uas twb txua lawm los ua. Yog koj siv cuab yeej txua pob zeb mas koj ua rau lub thaj qias tsis huv lawm.

26 Thiab tsis txhob nce tus ntaiv mus rau saum kuv lub thaj, kom luag thiaj tsis pom koj chaw txaj muag.