Cov Ixayees Nyob Ntawm Lub Roob Xinais

1 Lub peb hlis, hnub xiab ib, suav txij thaum cov Ixayees tawm hauv Iziv tebchaws los hnub ntawd, lawv los txog hauv tebchaws moj sab qhua Xinais.

2 Thaum lawv sawv kev tawm ntawm Lefidees, lawv los txog hauv tebchaws moj sab qhua Xinais, lawv kuj tsuam chaw nyob hauv tebchaws moj sab qhua. Cov Ixayees tsuam chaw nyob ntawm taw roob Xinais.

3 Mauxes nce mus cuag (יחוח)Yahweh, mas (יחוח)Yahweh hu saum lub roob tuaj rau nws tias, cia li hais li no rau Yakhauj caj ces uas yog haiv neeg Ixayees tias,

4 nej twb pom tej uas kuv ua rau cov Iziv lawm, thiab qhov uas kuv kwv kiag nej yam nkaus li tus dav kwv menyuam saum nws phab tis, thiab coj nej los cuag kuv.

5 Nimno yog nej mloog kuv lus thiab ua raws li kuv tej lus cog tseg, mas nej yuav ua kuv teej kuv tug hauv ib tsoom tibneeg sawvdaws. Tag nrho lub ntiajteb huvsi yog kuv li.

6 Tiamsis nej yuav ua ib lub tebchaws pov thawj rau kuv thiab ua haiv neeg dawb huv. Koj yuav hais tej lus no rau cov Ixayees mloog.

7 Mauxes thiaj rov los hu cov kev txwj laug hauv cov pejxeem tuaj ua ke mas piav txhua lo lus uas (יחוח)Yahweh hais rau nws lawm, rau lawv mloog.

8 Mas cov pejxeem sawvdaws ib txhij teb hais tias, peb yuav ua txhua yam uas (יחוח)Yahweh hais ntawd. Mauxes thiaj coj cov pejxeem tej lus mus hais rau (יחוח)Yahweh.

9 (יחוח)Yahweh hais rau Mauxes tias, kuv yuav los rau ntawm koj, hauv tauv huab uas tsaus nti, kom cov pejxeem thiaj li hnov thaum kuv hais lus rau koj, mas lawv thiaj li tso siab rau koj mus ib txhis. Mauxes coj cov pejxeem tej lus mus hais rau (יחוח)Yahweh,

10 mas (יחוח)Yahweh hais rau Mauxes tias, cia li mus thiab tu kom cov pejxeem dawb huv rau kuv, rau hnub no thiab tagkis, thiab kom lawv ntxhua lawv tej tsoos tsho.

11 Cia li npaj kom txhij rau hnub uas peb, rau qhov hnub uas peb ntawd (יחוח)Yahweh yuav nqis los rau saum lub roob Xinais tab meeg cov pejxeem sawvdaws.

12 Koj yuav tau kem ciam thaiv cov Pejxeem nyob puag ncig lub roob, thiab hais tias, nej yuav tau ceev faj tsis txhob nce mus rau saum lub roob thiab tsis txhob kov lub taw roob ntawd kiag li. Yog leejtwg kov lub roob ntawd, nws yuav raug muab tua pov tseg.

13 Tsis txhob xuas tes kov tus ntawd kiag li, cia li xuas pob zeb ntaus nws tuag lossis xuas hneev tua nws. Tsis hais tsiaj txhu thiab tibneeg los xij, tsis txhob tseg ciaj sia kiag li. Thaum hnov raj kub yaj nrov ntev mas lawv mus tau rau saum lub roob.

14 Mauxes nqis saum roob los rau ntawm cov pejxeem, thiab tu kom cov pejxeem dawb huv rau (יחוח)Yahweh. Mas lawv ntxhua lawv tej tsoos tsho.

15 Mauxes hais rau cov pejxeem tias, nej yuav npaj kom txhij rau hnub uas peb. Nej tsis txhob mus ze pojniam kiag li.

16 Thaum txog hnub peb, thaum sawv ntxov, kuj muaj xob nthe, xob laim liab vog, thiab muaj huab tsaus nti saum lub roob, thiab muaj suab raj kub yaj nrov heev, ua rau cov pejxeem sawvdaws uas tsuam chaw nyob ntawd ntshai tshee hnyo.

17 Mauxes thiaj coj cov pejxeem tawm hauv lub chaw nyob mus ntsib ()Yahweh, lawv tuaj sawv ntsug ntawm taw roob.

18 Muaj pa ncho laum nkaus lub roob Xinais, rau qhov (יחוח)Yahweh nyob hauv cov nplaim taws nqis los. Muaj pa ncho hlob hlob ib yam li ib cub tawg loj, lub roob kuj ntseeg nkaws.

19 Thaum raj kub yaj nrov heev zuj zus, Mauxes kuj hais thiab (יחוח)Yahweh ua xob nthe teb nws.

20 (יחוח)Yahweh nqis los rau saum lub ncov roob Xinais. (יחוח)Yahweh hu Mauxes nce mus rau saum lub ncov roob, mas Mauxes thiaj li nce mus.

21 (יחוח)Yahweh hais rau Mauxes tias, cia li rov qab nqis mus ntuas cov pejxeem, ntshai tsam lawv hla los txog ntawm ()Yahweh, vim yog xav saib, ces lawv yuav puam tsuaj coob coob.

22 Thiab cov pov thawj uas los ze (יחוח)Yahweh yuav tau tu lawv tus kheej kom dawb huv rau (יחוח)Yahweh, ntshai tsam (יחוח)Yahweh ua rau lawv puam tsuaj.

23 Mauxes hais rau (יחוח)Yahweh tias, cov pejxeem tuaj tsis tau rau ntawm lub roob Xinais, rau qhov koj twb hais tawv rau peb tias, kem ciam puag ncig lub roob thiab tu kom lub roob dawb huv.

24 (יחוח)Yahweh hais rau Mauxes tias, cia li nqis mus thiab coj Aloos nrog koj nce rov qab tuaj. Tiamsis tsis txhob kheev cov pov thawj thiab cov pejxeem hla tuaj txog ntawm (יחוח)Yahweh, tsam ces nws ua rau lawv puam tsuaj.

25 Mauxes thiaj nqis rov mus hais rau cov pejxeem raws li

ntawd.