Yethoos Tuaj Saib Mauxes

1 Yethoos uas yog cov Midees tus pov thawj thiab yog Mauxes yawm txiv, tau hnov txog tej haujlwm uas (יחוח)Yahweh ua pab Mauxes thiab pab (יחוח)Yahweh haiv neeg Ixayees rau thaum (יחוח)Yahweh coj lawv tawm hauv Iziv tebchaws los.

2 Mauxes yawm txiv Yethoos tau txais Mauxes tus pojniam Xipaulas rau thaum Mauxes xa Xipaulas mus,

3 thiab nws ob tug tub. Ib tug hu ua Nkawsoos, rau qhov nws hais tias, kuv yog ib tug uas ua qhua nyob rau hauv luag teb chaws.

4 Thiab ib tug hu ua Eliyexaws, rau qhov nws hais tias, kuv txiv Tus Tswv (יחוח)Yahweh yog tus uas pab kuv thiab cawm kuv dim hauv Falaus rab ntaj.

5 Mauxes yawm txiv Yethoos coj Mauxes ob tug tub thiab Mauxes tus pojniam tuaj rau Mauxes hauv tebchaws moj sab qhua uas lawv tsuam chaw nyob ntawm (יחוח)Yahweh lub roob.

6 Nws txib tibneeg mus hais rau Mauxes tias, koj yawm txiv Yethoos coj koj pojniam thiab ob tug tub tuaj rau koj.

7 Mauxes thiaj tawm mus tos yawm txiv thiab pe thiab nwj nws. Nkawv sib tham txog kev noj qab nyob zoo thiab nkag los rau hauv tsev ntaub.

8 Mauxes piav rau nws yawm txiv mloog txog txhua yam uas (יחוח)Yahweh ua rau Falaus thiab ua rau cov Iziv, vim yog saib rau cov Ixayees, thiab tej kev ceeblaj huvsi uas raug cov Ixayees ntawm ib tog kev thiab (יחוח)Yahweh tau cawm lawv dim li cas.

9 Yethoos kuj zoo siab heev rau txhua yam zoo uas (יחוח)Yahweh tau ua pab cov Ixayees rau thaum nws cawm lawv dim hauv cov Iziv txhais tes.

10 Yethoos thiaj hais tias, qhuas (יחוח)Yahweh uas tau cawm nej dim hauv cov Iziv txhais tes thiab hauv Falaus txhais tes, yog cawm cov Ixayees sawvdaws dim hauv cov Iziv txhais tes.

11 Nimno kuv paub tias (יחוח)Yahweh loj dua tej timtswv huvsi, rau qhov nws ua tej no rau thaum cov Iziv tsuj yuam cov Ixayees ua khav ntxhias.

12 Mauxes yawm txiv Yethoos kuj muab tsiaj ua kevcai hlawv xyeem thiab tua tsiaj xyeem rau (יחוח)Yahweh. Aloos thiab Ixayees cov kev txwj laug sawvdaws tuaj nrog Mauxes yawm txiv noj ib pluag mov ntawm (יחוח)Yahweh xubntiag.

​

Tsa Cov Uas Tu Plaub

13 Tagkis tom qab, Mauxes zaum tu plaub rau cov pejxeem. Lawv sawv vij vog Mauxes thaum sawv ntxov mus txog tsaus ntuj.

14 Thaum Mauxes yawm txiv pom txhua yam haujlwm uas Mauxes ua rau cov pejxeem ntawd, nws hais tias, koj ua abtsi li no rau cov pejxeem? Ua cas koj tib leeg nyob tu plaub li no, thiab cov pejxeem sawvdaws yuav sawv vij koj, sawv ntxov txog tsaus ntuj?

15 Mauxes teb yawm txiv tias, yog cov pejxeem tuaj cuag kuv kom kuv ua nug rau (יחוח)Yahweh.

16 Thaum lawv muaj plaub muaj ntug, lawv tuaj cuag kuv, kuv thiaj tu tau rau ob tog, thiab kuv qhia rau lawv paub txog (יחוח)Yahweh tej kab ke thiab tej uas (יחוח)Yahweh phua cai.

17 Mauxes yawm txiv thiaj hais rau nws tias, koj ua li no tsis zoo.

18 Koj thiab cov pejxeem uas tuaj no yuav qaug zog tag, rau qhov tej uas koj ua no nyhav dhau koj lub zog lawm, thiab koj tib leeg xwb ua tsis taus.

19 Koj mloog kuv hais, kuv yuav taw qhia koj thiab thov (יחוח)Yahweh nrog nraim koj. Koj ua tus uas sawv cev ntawm cov pejxeem rau (יחוח)Yahweh, coj lawv tej plaub mus ua nug rau (יחוח)Yahweh.

20 Koj yuav qhuab qhia kom lawv paub tej kab ke thiab tej uas phua cai rau lawv, thiab qhia lawv paub ua lawv lub neej li cas thiab paub tej uas lawv yuav tau ua.

21 Tsis tag li ntawd xwb, koj cia li xaiv cov txivneej hauv cov Ixayees uas muaj peevxwm thiab paub ntshai (יחוח)Yahweh thiab tso siab tau thiab ntxub noj nyiaj xiab. Tsa lawv cov no los ua cov uas kav pejxeem, kav ib txhiab leej thiab kav ib puas leej thiab kav tsib caug leej thiab kav kaum leej.

22 Cia lawv tu cov pejxeem tej plaub txhua lub sijhawm. Tej tshaj plaub loj, cia lawv coj tuaj cuag koj, hos tej plaub me, cia lawv tu lawv xwb. Ua li no thiaj yoojyim rau koj thiab lawv thiaj nrog koj ris lub nra nyhav.

23 Yog koj ua li no thiab (יחוח)Yahweh qhia koj ua, mas koj thiaj thev taus thiab cov pejxeem sawvdaws no thiaj tau rov mus tsev kaj siab lug.

24 Mauxes kuj mloog nws yawm txiv tej lus thiab ua raws li nws qhia txhua yam.

25 Mauxes xaiv cov txivneej uas muaj peev xwm hauv cov Ixayees ua cov pejxeem cov thawj, tsa kav ib txhiab leej, kav ib puas leej, kav tsib caug leej, thiab kav kaum leej.

26 Mas lawv cov no tu cov pejxeem tej plaub txhua lub sijhawm. Tej plaub uas ceeblaj, lawv li coj mus cuag Mauxes, tej plaub me me lawv tu lawv xwb.

27 Ces Mauxes txawm xa nws yawm txiv rov mus, yawm txiv thiaj rov qab mus rau nws lub tebchaws lawm.