Dej Txhawv Hauv Phab Zeb Los

1 Ib tsoom Ixayees sawvdaws tshais chaw ntawm tebchaws moj sab qhua Xis, mus ib qho rau ib qho, ua ntu zus raws li (יחוח)Yahweh hais. Lawv los tsuam chaw nyob rau ntawm Lefidees, tiamsis tsis muaj dej rau cov pejxeem haus. 

2 Vim li no, lawv thiaj nrhiav txim rau Mauxes thiab hais rau nws tias, muab dej rau peb haus maj. Mauxes hais rau lawv tias, nej nrhiav txim rau kuv ua abtsi? Ua cas nej yuav sim (יחוח)Yahweh?

3 Tiamsis cov pejxeem nqhis dej heev ntawm lub chaw ntawd, lawv thiaj yws Mauxes tias, ua cas koj coj peb tawm hauv Iziv tebchaws los ua rau peb thiab peb tej menyuam thiab tej tsiaj txhu nqhis dej tuag?

4 Mauxes thiaj quaj thov (יחוח)Yahweh tias, kuv yuav ua li cas rau cov pejxeem no? Lawv twb yuav xuas pob zeb muab kuv ntaus tuag.

5 (יחוח)Yahweh hais rau Mauxes tias, cia li ua cov pejxeem ntej mus thiab coj Ixayees tej kev txwj laug qee leej nrog koj mus. Thiab tuav rawv tus pas nrig uas koj nplawm tus dej Nais mus thiab.

6 Kuv yuav sawv tab meeg ntawm koj xubntiag saum phab zeb ntawm lub roob Haules. Koj cia li ntaus phab zeb, dej yuav txhawv los rau cov pejxeem haus. Mauxes ua raws li ntawd tab meeg Ixayees cov kev txwj laug.

7 Mauxes hu qhov chaw ntawd tias Maxas thiab Melinpas, vim yog cov Ixayees nrhiav txim rau nws thiab sim (יחוח)Yahweh hais tias, (יחוח)Yahweh nrog peb nyob los tsis nyob lawm?

​

Ua Rog Rau Cov Amalej

8 Thaum ntawd cov Amalej tuaj ua rog rau cov Ixayees ntawm Lefidees.

9 Mauxes hais rau Yahshua tias, cia li xaiv cov txivneej tawm mus ua rog rau cov Amalej. Tagkis kuv yuav sawv ntsug tuav rawv (יחוח)Yahweh tus pas nrig hauv kuv txhais tes saum lub hauv roob.

10 Yahshua kuj ua raws li Mauxes hais, nws mus ua rog rau cov Amalej. Mauxes thiab Aloos thiab Hawj kuj nce mus saum lub hauv roob.

11 Mauxes tsa tes thaum twg, cov Ixayees kov yeej thaum ntawd, qhau tes thaum twg, cov Amalej txawm kov yeej thaum ntawd.

12 Tiamsis Mauxes tes tsaug leeg. Aloos thiab Hawj thiaj coj ib lub pob zeb los rau Mauxes zaum, mas nkawv thiaj pab tsa Mauxes ob txhais tes ib leeg ib sab, nws txhais tes thiaj tsa khov kho mus txog hnub poob qho.

13 Yahshua thiaj xuas ntaj tua yeej cov Amalej swb kiag.

14 ()Yahweh hais rau Mauxes tias, cia li sau tej no rau hauv ntawv kom thiaj nco tau thiab qhia rau Yahshua mloog tias kuv yuav muab cov Amalej ntxuav kom ploj tag tsis muaj leejtwg nco tau lawv rau hauv qab ntuj no.

15 Mauxes thiaj ua ib lub thaj xyeem rau (יחוח)Yahweh thiab tis npe hu tias, (יחוח)Yahweh yog kuv tus chij.

16 Thiab nws hais tias, rau qhov muaj txhais tes tsa rau saum ()Yahweh lub zwm txwv. Mas (יחוח)Yahweh yuav ua rog rau cov Amalej ib tiam dhau ib tiam mus li.