(יחוח)Yahweh Pub Manas Thiab Noog Ws

1 Lawv sawv kev ntawm Elees mas hnub tim kaum tsib, lub ob hlis, suav txij thaum lawv tawm hauv Iziv tebchaws los, ib tsoom Ixayees sawvdaws los txog hauv tebchaws moj sab qhua Xis, uas nyob ntawm Elees thiab Xinais ntu nruab nrab.

2 Ib tsoom Ixayees sawvdaws yws yws Mauxes thiab Aloos hauv tebchaws moj sab qhua. 

3 Lawv hais rau nkawv tias, peb yeem tuag rau (יחוח)Yahweh tes hauv Iziv teb chaws rau thaum peb nyob ntawm tej laujkaub nqaij thiab noj tej zaub mov tsau npo zoo dua. Koj coj peb sawvdaws los yoo tshaib tuag tag rau hauv tebchaws moj sab qhua no xwb.

4 Mas (יחוח)Yahweh hais rau Mauxes tias, kuv yuav tso zaub mov saum ntuj los rau nej ib yam li tso nag los. Cov pejxeem yuav tau niaj tagkis tawm mus khaws kom txaus noj ib hnub ntawd, kuv thiaj tau sim lawv lub siab saib lawv yuav ua raws li kuv tej lus los tsis ua. 

5 Hnub rau, thaum lawv khaws tej uas yuav coj los tsev, lawv yuav tau khaws kom tshaj ib npaug rau saud li uas niaj hnub khaws.

6 Mauxes thiab Aloos thiaj hais rau cov Ixayees sawvdaws tias, thaum tsaus ntuj, nej yuav paub tias, (יחוח)Yahweh yog tus uas coj nej tawm hauv Iziv tebchaws los.

7 Thaum kaj ntug, nej yuav pom (יחוח)Yahweh lub hwjchim ci ntsa iab, rau qhov (יחוח)Yahweh twb hnov tej lus uas nej yws nws lawm. Wb ob leeg yog leejtwg es nej yuav yws wb?

8 Mauxes hais tias, thaum yuav tsaus ntuj, (יחוח)Yahweh yuav pub nqaij rau nej noj thiab thaum kaj ntug, yuav pub mov rau nej noj tsau npo, rau qhov nws twb hnov tej lus uas nej yws nws lawm. Wb ob leeg yog leejtwg? Nej tsis yws wb tiamsis yog nej yws (יחוח)Yahweh. 

9 Mauxes hais rau Aloos tias, cia li hais rau ib tsoom Ixayees sawvdaws tias, txav los ze (יחוח)Yahweh, rau qhov nws twb hnov tej lus uas nej yws lawm.

10 Thaum Aloos tab tom hais rau ib tsoom Ixayees sawvdaws mloog ntawd, lawv tsa muag saib rau tebchaws moj sab qhua mas pom (יחוח)Yahweh lub hwj chim ci ntsa iab tshwm rau hauv tus ncej huab.

11 (יחוח)Yahweh hais rau Mauxes tias,

12 Kuv twb hnov tej lus uas cov Ixayees yws lawm. Cia li hais rau lawv tias, thaum tsaus ntuj zuag, nej yuav tau nqaij noj, thiab thaum kaj ntug, nej yuav tau mov noj tsau npo. Mas nej yuav paub tias kuv yog (יחוח)Yahweh uas yog nej Tus Tswv. 

13 Thaum yuav tsaus ntuj, tej pab noog ws ya los puv nkaus lawv tej chaw nyob, thiab thaum kaj ntug, kuj muaj lwg ntsu ib ncig lawv tej chaw tsuam.

14 Thaum tej lwg ntawd qhuav tag lawm, kuj muaj tej nyuag nplai nyias nyias zoo li te nyob saum npoo av hauv tebchaws moj sab qhua.

15 Thaum cov Ixayees pom mas lawv sib nug tias, no yog abtsi ne? Rau qhov lawv tsis paub tias yog abtsi. Mauxes hais rau lawv tias, no yog tej mov uas (יחוח)Yahweh pub rau nej noj.

16 (יחוח)Yahweh kom nej ua li no. Nej txhua tus khaws npaum li uas txaus nej noj tsau, ib leeg khaws ib aumaws raws li muaj tibneeg coob los tsawg nyob hauv nws lub tsev ntaub.

17 Cov Ixayees ua raws li ntawd. Ib txhia khaws ntau, ib txhia khaws tsawg.

18 Tiamsis thaum lawv muab lub aumaws luj, tus uas khaws tau ntau, kuj tsis muaj seem, tus uas khaws tau tsawg, kuj muaj txaus. Txhua tus khaws npaum li uas txaus nws noj.

19 Mauxes hais rau lawv tias, tsis pub leejtwg khaws ib qho cia rau tagkis.

20 Tiamsis lawv tsis mloog Mauxes hais. Muaj qee leej khaws ib qho cia rau tagkis, mas cov uas khaws ntawd, kuj lwj kas thiab tsw lwj tag huvsi. Mauxes thiaj chim rau lawv.

21 Lawv niaj tagkis nyias khaws txaus nyias noj tsau xwb. Thaum tshav ntuj kub, tej mov uas lawv tsis khaws txawm yaj tag lawm.

22 Thaum txog hnub rau, lawv khaws ob npaug, ib leeg khaws ob aumaws. Thaum Ixayees cov thawj tuaj hais rau Mauxes paub,

23 Mauxes hais rau lawv tias, no yog tej uas (יחוח)Yahweh hais kom nej ua, tagkis yog hnub uas caiv so tiag tiag, yog hnub Sabbath dawb huv rau ()Yahweh. Hnub no yuav ci abtsi, kuj cia li ci, yuav hau abtsi, kuj cia li hau, tej uas tshuav kuj khaws cia rau tagkis.

24 Lawv khaws cia rau tagkis raws li Mauxes hais rau lawv, mas tej mov ntawd kuj zoo tsis lwj tsis ua kas. 

25 Mauxes hais tias, hnub no cia li noj tej mov ntawd, rau qhov hnub no yog (יחוח)Yahweh hnub Sabbath. Hnub no nej yuav tsis pom tej mov ntawd tom tshav puam kiag li.

26 Nej yuav khaws rau hnub xwb, mas hnub xya uas yog hnub Sabbath, yuav tsis muaj lawm. 

27 Thaum txog hnub xya, muaj qee leej mus khaws, tiamsis nrhiav tsis muaj li.

28 (יחוח)Yahweh hais rau Mauxes tias, nej yuav tsis kam ua raws li kuv tej lus cob qhia thiab kuv tej kevcai ntev li cas?

29 Saib maj, (יחוח)Yahweh twb muab hnub Sabbath rau nej, vim li no, hnub rau, nws pub mov txaus nej noj ob hnub. Nej txhua tus yuav tau so nyob hauv tsev, tsis kheev leejtwg tawm hauv nws lub tsev rau hnub xya.

30 Yog li no, cov pejxeem thiaj li so rau hnub xya.

31 Cov Ixayees hu cov mov ntawd ua Manas. Tej lub dawb paug zoo li noob zaub txhwb qaib, thiab qab yam nkaus li tej ncuav nyias nyias uas xyaw zib ntab.

32 Mauxes hais tias, no yog tej uas (יחוח)Yahweh hais kom ua, luj ib aumaws Manas muab khaws cia ib tiam dhau ib tiam mus li, kom lawv thiaj tau pom cov mov uas kuv yug nej hauv tebchaws moj sab qhua rau thaum kuv coj nej tawm hauv Iziv tebchaws los.

33 Mauxes hais rau Aloos tias, muab ib lub me hub los ntim ib aumaws Manas khaws cia rau ntawm (יחוח)Yahweh lub xubntiag, ib tiam dhau ib tiam mus li.\

34 Aloos thiaj muab cov Manas ntawd tso rau ntawm lub phij xab uas muaj (יחוח)Yahweh tej lus, muab khaws cia raws li (יחוח)Yahweh hais rau Mauxes.

35 Cov Ixayees noj Manas tau plaub caug xyoo los txog thaum lawv mus txog lub tebchaws uas nyob tau. Lawv noj Manas los txog ntawm Khana‑as ciam teb.

36 (Ib efas muaj kaum aumaws).