Mauxes Txoj Nkauj

1 Thaum ntawd Mauxes thiab cov Ixayees hu txoj nkauj no rau (יחוח)Yahweh hais tias, kuv yuav hu nkauj qhuas (יחוח)Yahweh, rau qhov nws twb kov yeej loj

 kawg nkaus, nws muab tej nees thiab tej tub rog caij nees laim kiag rau hauv hiavtxwv.

2 (יחוח)Yahweh yog kuv lub zog thiab yog kuv txoj nkauj, thiab nws yog tus uas cawm kuv dim. Nws yog kuv Tus Tswv ntag, kuv yuav qhuas nws, nws yog kuv txiv Tus Tswv, kuv yuav qhuas ntxhias nws.

3 (יחוח)Yahweh yog tus txawj ua rog, nws lub npe hu ua (יחוח)Yahweh.

4 (יחוח)Yahweh muab Falaus tej tsheb ua rog thiab nws tej tub rog laim kiag rau hauv hiavtxwv, nws cov thawj rog uas txawj heev, kuj tog kiag rau hauv Hiavtxwv Liab.

5 Dej nphau los nyab kiag lawv, lawv tog rau hauv qab thu yam li lub pob zeb.

6 Au (יחוח)Yahweh, koj txhais tes xis muaj hwjchim loj kawg. Au (יחוח)Yahweh, koj txhais tes xis tsoo yeeb ncuab tawg ntsoog tag.

7 Koj siv koj lub hwjchim meej mom loj kawg, muab cov uas tawm tsam koj, ntxeev kiag pov tseg, koj tso koj txojkev npau taws muab lawv hlawv kub nyhiab tag yam nkaus li quav nyab.

8 Koj lub qhov ntswg ua pa ntsawj dej sawv siab zuj zus, tej dej sawv siab ua ib phab, tej dej hauv hiavtxwv kuj nkoog khov kho.

9 Cov yeeb ncuab hais tias, kuv yuav raws qab, kuv yuav caum cuag, kuv yuav muab tej uas txeeb tau los faib. Kuv yuav ua txhua yam rau lawv raws li kuv lub siab xav kom pov khawv nkaus. Kuv yuav rho ntaj, kuv txhais tes yuav ua kom lawv puam tsuaj.

10 Koj tshuab koj li cua ntsawj tuaj, dej hiavtxwv nyab kiag lawv. Lawv tog rau hauv cov dej uas nphau nyab kiag los ib yam li txhuas.

11 Au (יחוח)Yahweh, tej timtswv huv si tus twg zoo cuag li koj? Tus twg zoo cuag li koj, uas dawb huv kawg nkaus thiab muaj lub koob meej uas txaus hwm kawg, thiab ua tej txujci tseem ceeb?

12 Koj tsa kiag koj txhais tes xis, lub ntiajteb kuj muab lawv nqos tag nrho.

13 Koj muaj txojkev hlub ruaj khov es coj haiv neeg uas koj txhiv dim lawm. Koj siv koj lub zog coj lawv txoj hauv kev mus txog koj lub chaw nyob uas dawb huv.

14 Ib tsoom tibneeg tau hnov, mas lawv tshee hnyo. Cov tibneeg uas nyob hauv Filixatees tebchaws poob siab kawg.

15 Nimno Edoos cov thawj kuj ntshai kawg, Mau‑as cov nom tswv kuj ntshai ib ce tshee hnyo, cov tibneeg hauv Khana‑as tebchaws sawvdaws siab ntsws yaj tag.

16 Lawv raug kev txhawj kev ntshai ua siab puas tsus. Au (יחוח)Yahweh, vim yog koj txhais tes uas muaj hwjchim loj kawg, lawv thiaj li nyob twjywm tsis ua zog yam li pob zeb mus txog thaum koj haiv neeg hla dhau tag lawm, mus txog thaum cov neeg uas koj twb txhiv dim lawm hla dhau mus.

17 Koj yuav coj lawv los thiab muab lawv txawb rau saum koj lub roob, Au (יחוח)Yahweh, yog lub chaw uas koj ua cia rau koj nyob, thiab yog lub chaw pe hawm koj uas koj txhais tes tsim cia.

18 (יחוח)Yahweh yuav kav mus ib txhis tsis kawg.

​

Mili‑as Txoj Nkauj

19 Thaum Falaus tej nees thiab tej tsheb ua rog thiab nws tej tub rog caij nees nqis mus rau hauv hiavtxwv, (יחוח)Yahweh kuj ua kom dej hiavtxwv nphau los nyab kiag, tiamsis cov Ixayees mas taug kev qhuav qhawv hauv nruab nrab hiavtxwv.

20 Aloos tus muam Mili‑as uas ua tus cev (יחוח)Yahweh lus txawm coj ib lub nruas npuaj hauv nws txhais tes thiab cov pojniam sawvdaws npuaj nruas seev cev raws nws qab.

21 Mili‑as hu nkauj rau lawv tias, cia li hu nkauj qhuas (יחוח)Yahweh, rau qhov nws twb kov yeej loj kawg nkaus. Nws muab tej nees thiab tej tub rog caij nees laim kiag rau hauv hiavtxwv.

​

Dej Iab Ntawm Malas

22 Dhau ntawd, Mauxes coj cov Ixayees tawm ntawm Hiavtxwv Liab mus rau hauv tebchaws moj sab qhua Saws. Lawv mus tau peb hnub ke hauv tebchaws moj sab qhua, nrhiav tsis tau dej haus kiag li. 

23 Thaum lawv los txog ntawm Malas, lawv kuj haus tsis tau cov dej ntawm Malas, rau qhov cov dej ntawd iab heev. Vim li no, thiaj hu ua Malas. 

24 Cov pejxeem thiaj li yws yws Mauxes tias, peb yuav haus abtsi?

25 Mauxes txawm tsa suab thov (יחוח)Yahweh. (יחוח)Yahweh thiaj qhia ib tog ntoo rau Mauxes pom, mas nws muab pov rau hauv dej, dej txawm qab lawm. Thaum nyob qhov chaw ntawd, (יחוח)Yahweh thiaj qhia nws tej kab ke thiab nws tej kevcai rau lawv thiab sim lawv lub siab.

26 (יחוח)Yahweh hais tias, yog nej ua tib zoo mloog (יחוח)Yahweh uas yog nej Tus Tswv tej lus thiab ua tej uas haum nws lub siab, thiab tig ntsej mloog nws tej lus cob qhia thiab ua raws li nws tej kab ke txhua qhov, mas tej mob nkeeg uas kuv ua rau cov Iziv ntawd, kuv yuav tsis tso rau saum nej kiag li, rau qhov kuv yog (יחוח)Yahweh, yog tus uas kho nej.

27 Dhau ntawd, lawv txawm los txog ntawm Elees uas muaj kaum ob lub qhov dej txhawv thiab muaj xya caum tsob toov laj. Lawv txawm tsuam chaw nyob ntawm cov qhov dej ntawd.