Hla Hiavtxwv Liab

1 (יחוח)Yahweh hais rau Mauxes tias,

2 Cia li hais rau cov Ixayees kom thim rov qab mus tsuam chaw rau ntawm Pihahilaus uas nyob ntawm Midoos thiab hiavtxwv ntu nruab nrab, uas nyob ntawm Npa‑as Xefoos ib sab. Mas tsuam chaw ze ntug hiav txwv rau qhov ntawd.

3 Rau qhov Falaus yuav hais txog cov Ixayees tias, lawv mus khuab rau ntawm ntug nqhuab, tebchaws moj sab qhua thaiv lawv kev lawm. 

4 Mas kuv yuav ua rau Falaus lub siab tawv, nws thiaj yuav raws qab tuaj, mas kuv yuav tau koob meej ntawm Falaus thiab nws cov tub rog huvsi. Mas cov Iziv yuav paub tias kuv yog (יחוח)Yahweh. Lawv thiaj ua raws li ntawd.

5 Thaum muaj tibneeg hais rau vajntxwv Iziv tias, cov Ixayees khiav tag mus lawm, Falaus thiab nws cov tub teg tub taws txawm ntxeev siab rau qhov uas tso cov Ixayees mus, thiab hais tias, ua cas peb ua li no es thiaj tso cov Ixayees khiav tawm ntawm qhov uas ua peb qhev mus lawm?

6 Falaus txawm npaj nws li tsheb ua rog thiab coj nws pab tub rog nrog nws mus.

7 Nws coj rau pua lub tsheb ua rog uas zoo tshaj plaws thiab coj cov tsheb ua rog tag nrho hauv Iziv tebchaws mus, muaj thawj tub rog kav txhua lub tsheb huvsi.

8 (יחוח)Yahweh ua rau Iziv tus vajntxwv Falaus lub siab tawv, nws thiaj caum cov Ixayees uas twb khiav mus ua muaj plhus ntxiag qab.

9 Cov Iziv uas caum lawv mus yog tag nrho Falaus tej nees thiab tsheb ua rog thiab nws tej tub rog caij nees thiab nws pab tub rog huvsi, mas lawv caum cuag cov Ixayees tseem tsuam chaw nyob ntawm ntug hiavtxwv ze Pihahilaus uas nyob ntawm Npa‑as Xefoos ib sab.

10 Thaum Falaus tuaj ze, cov Ixayees tsa muag saib pom cov Iziv caum tuaj yuav cuag lawv mas lawv ntshai kawg li. Cov Ixayees thiaj quaj qw rau (יחוח)Yahweh.

11 Lawv hais rau Mauxes tias, koj coj peb los tuag rau hauv tebchaws moj sab qhua, vim tsis muaj qhov ntxa rau hauv Iziv tebchaws lov? Koj coj peb tawm hauv Iziv tebchaws los ua abtsi?

12 Peb twb hais rau koj hauv Iziv tebchaws lawm los tsis yog? Tso peb nyob peb, cia peb ua cov Iziv qhev. Qhov uas ua cov Iziv qhev ntawd kuj zoo dua li uas los tuag rau hauv tebchaws moj sab qhua no.

13 Mauxes hais rau cov pejxeem tias, tsis txhob ntshai, yeej meem nyob ruaj, saib (יחוח)Yahweh txojkev cawm dim uas nws yuav ua rau nej pom hnub no. Cov Iziv uas hnub no nej pom, nej yuav tsis pom dua li lawm.

14 (יחוח)Yahweh yuav nyob nej chaw ua rog, nej tsuas nyob twjywm xwb.

15 (יחוח)Yahweh hais rau Mauxes tias, ua cas koj quaj qw rau kuv? Koj cia li hais kom cov Ixayees mus lawm tom hauv ntej.

16 Koj cia li tsa koj tus pas nrig, thiab tsa koj txhais tes rau saum hiavtxwv, ua rau dej hiavtxwv faib rau ob sab, kom cov Ixayees thiaj mus tau saum cov av qhuav hauv nruab nrab hiavtxwv hla mus. 

17 Kuv yuav ua rau cov Iziv siab tawv kom lawv thiaj raws qab tuaj. Mas kuv yuav tau koob meej ntawm Falaus thiab nws tej tub rog thiab nws tej tsheb nees thiab nws cov tub rog caij nees huvsi.

18 Thaum kuv tau koob meej ntawm Falaus thiab nws tej tsheb nees thiab nws cov tub rog caij nees, cov Iziv yuav paub tias kuv yog (יחוח)Yahweh.

19 (יחוח)Yahweh tus tubtxib saum ntuj uas ua cov Ixayees ntej ntawd, txawm rov mus nyob tom lawv qub qab, thiab tus ncej huab uas ua lawv ntej kuj rov mus nyob tom lawv qub qab.

20 Yog los nyob ntawm cov Iziv cov tub rog thiab cov Ixayees ntu nruab nrab. Tus ncej huab ua rau sab uas npuas cov Iziv tsaus ntuj, ua rau sab uas npuas cov Ixayees pom kev, mas ib hmos kaj ntug, ob tog tuaj tsis tau sib ze.

21 Ces Mauxes txawm tsa nws txhais tes rau saum hiavtxwv mas (יחוח)Yahweh ua rau cua ntsawj hlob hlob sab hnub tuaj tuaj ntsawj dej hiavtxwv ib hmos ua rau hiavtxwv qhuav qhawv muab dej faib rau ob sab.

22 Cov Ixayees thiaj mus taug kev qhuav qhawv hauv nruab nrab hiavtxwv, cov dej faib kiag rau sab xis thiab sab laug ua ntsa loog rau lawv.

23 Cov Iziv kuj raws lawv qab rau hauv nruab nrab hiavtxwv, tag nrho Falaus tej nees thiab tej tsheb ua rog thiab cov tub rog caij nees huvsi.

24 Thaum yuav kaj ntug, (יחוח)Yahweh tsa muag saib hauv tus ncej hluavtaws thiab tus ncej huab tuaj pom Iziv cov tub rog, mas nws ua rau cov Iziv ceeb zom zaws.

25 Nws ua rau lawv tej log tsheb cam pes nkaus mus tsis tshua taus. Cov Iziv thiaj sib hais tias, peb cia li khiav ntawm cov Ixayees rov qab, rau qhov (יחוח)Yahweh nyob lawv chaw ua rog rau cov Iziv.

26 Thaum ntawd, (יחוח)Yahweh txawm hais rau Mauxes tias, cia li tsa koj txhais tes rau saum hiavtxwv, ua rau cov dej hiavtxwv nphau rov los nyab cov Iziv thiab lawv tej tsheb ua rog thiab cov tub rog caij nees.

27 Mauxes txawm tsa tes rau saum hiavtxwv mas thaum kaj ntug, dej hiavtxwv thiaj nphau los yam nkaus li qub. Cov Iziv khiav tej dej nphau ntawd, tiamsis (יחוח)Yahweh muab cov Iziv xyeeb rau hauv nruab nrab hiavtxwv.

28 Dej nphau rov los nyab kiag tej tsheb thiab cov tub rog caij nees thiab Falaus cov tub rog huvsi uas caum lawv mus rau hauv hiavtxwv, tsis tshuav ib tug li.

29 Tiamsis cov Ixayees taug kev qhuav qhawv hauv nruab nrab hiavtxwv, cov dej faib kiag rau sab xis thiab sab laug ua ntsa loog rau lawv. 

30 Yog li no, hnub ntawd (יחוח)Yahweh cawm cov Ixayees dim hauv cov Iziv txhais tes, mas cov Ixayees pom cov Iziv tej cev tuag ntawm ntug hiavtxwv.

31 Cov Ixayees pom tej haujlwm loj uas (יחוח)Yahweh tau ua rau cov Iziv, lawv kuj ntshai (יחוח)Yahweh thiab lawv ntseeg (יחוח)Yahweh thiab ntseeg nws tus qhev Mauxes.