Pub Cov Tub Hlob Ua (יחוח)Yahweh Tug

1 (יחוח)Yahweh hais rau Mauxes tias,

2 Cia li muab txhua tus tub hlob pub ua kuv tug. Txhua tus Ixayees thawj plab menyuam tsis hais tibneeg lossis tsiaj txhu los yog puavleej yog kuv li.

3 Mauxes hais rau cov pejxeem tias, cia li nco txog hnub no uas nej tawm hauv Iziv tebchaws, hauv txojkev ua qhev los, rau qhov (יחוח)Yahweh siv nws txhais tes uas muaj hwjchim coj nej tawm los. Mas tsis txhob noj tej ncuav xyaw keeb.

4 Hnub no nej yuav tawm mus, yog lub hli Anpis. 

5 Thaum (יחוח)Yahweh coj nej mus txog cov Khana‑as, cov Hithais, cov Amaulais, cov Hivais thiab cov Yenpus lub tebchaws, yog lub tebchaws uas (יחוח)Yahweh cog lus ruaj rau nej tej poj koob yawm txwv tias, yuav muab rau nej, yog lub tebchaws uas muaj kua mis thiab zib ntab ntws nto, mas nej yuav coj txoj kevcai no rau lub hli Anpis no.

6 Yuav tau noj ncuav tsis xyaw keeb xya hnub, mas hnub uas xya, yuav ua kevcai noj haus xyeem rau (יחוח)Yahweh.

7 Yuav noj ncuav tsis xyaw keeb kom puv xya hnub. Tsis txhob kheev kom muaj ib qho ncuav xyaw keeb nyob hauv nej lossis muaj ib qho keeb nyob hauv nej lub tebchaws kiag li.

8 Hnub ntawd nej yuav tau hais rau nej tej tub tias, qhov uas kuv ua li no, yog vim tej xwm txheej uas (יחוח)Yahweh uas pab kuv rau thaum kuv tawm hauv Iziv tebchaws.

9 Txoj kevcai no yuav zoo li lub hom thawj uas nyob hauv nej txhais tes thiab ua lub chaw nco rau ntawm nej hauv pliaj, kom (יחוח)Yahweh txoj kevcai thiaj nyob hauv nej qhov ncauj, rau qhov (יחוח)Yahweh siv nws txhais tes uas muaj hwjchim coj nej tawm hauv Iziv tebchaws los.

10 Vim li no, nej yuav tau ua raws li tej kab ke no rau lub sijhawm uas teem cia rau txhua xyoo.

11 Thaum (יחוח)Yahweh coj nej mus txog cov Khana‑as lub tebchaws thiab muab lub tebchaws rau nej raws li nws cog lus tseg rau nej thiab nej tej poj koob yawm txwv lawd,

12 mas txhua tus uas yug thawj plab los, yuav muab cais pub ua (יחוח)Yahweh tug. Nej tej tsiaj txhu thawj tug menyuam uas yog txiv txhua tus yeej yog (יחוח)Yahweh li.

13 Mas yuav muab ib tug menyuam yaj txhiv thawj tug menyuam nees luav. Yog tsis txhiv mas muab lov caj pas pov tseg. Nej yuav tau txhiv tibneeg thawj tug tub hlob huvsi thiab.

14 Yav tom hauv ntej, thaum nej tej tub nug nej tias, ua cas yuav ua li no? Cia li hais rau nws tias, (יחוח)Yahweh siv nws txhais tes uas muaj hwjchim coj peb tawm hauv Iziv tebchaws, hauv txojkev ua qhev los.

15 Thaum Falaus ua lub siab tawv tsis kheev tso peb mus, (יחוח)Yahweh thiaj tua txhua tus tub hlob hauv Iziv tebchaws, tsis hais tibneeg thiab tsiaj txhu. Vim li no, kuv thiaj muab thawj plab menyuam tsiaj uas yog txiv, xyeem rau (יחוח)Yahweh, tiamsis txhua tus tub hlob kuv muab txhiv cia.

16 Txoj kevcai no yuav zoo li lub hom thawj uas nyob hauv nej txhais tes thiab ua lub chaw nco rau ntawm nej hauv pliaj, rau qhov (יחוח)Yahweh siv nws txhais tes uas muaj hwjchim coj peb tawm hauv Iziv tebchaws los.

​

Ncej Huab Thiab Ncej Hluavtaws

17 Thaum Falaus tso cov Ixayees tawm mus lawm, txawm yog txojkev hauv Filixatees tebchaws ze dua los, (יחוח)Yahweh tsis coj lawv taug txojkev ntawd, rau qhov (יחוח)Yahweh hais tias, ntshai tsam thaum kuv haiv neeg ntsib kev ua rog, lawv yuav ntxeev siab thim rov qab mus Iziv tebchaws.

18 (יחוח)Yahweh thiaj coj lawv lug mus hauv tebchaws moj sab qhua rau Hiavtxwv Liab. Cov Ixayees tawm hauv Iziv tebchaws muaj cuab yeej ua rog txhij zog.

19 Mauxes coj Yahxej cov pob txha mus thiab, vim yog Yahxej kom cov Ixayees cog lus ruaj hais tias, (יחוח)Yahweh yuav los saib nej, mas nej yuav tau coj kuv cov pob txha tawm ntawm no mus thiab.

20 Lawv tawm ntawm Xukhaus mus tsuam chaw rau ntawm Ethas uas npuas ntug tebchaws moj sab qhua.

21 Thaum nruab hnub, (יחוח)Yahweh nyob hauv ib tug ncej huab coj lawv kev, thaum hmo ntuj, (יחוח)Yahweh nyob hauv ib tug ncej hluavtaws ci rau lawv pom kev, xwv lawv thiaj mus tau kev nruab hnub hmo ntuj.

22 Tus ncej huab tuaj nruab hnub thiab tus ncej hluavtaws tuaj hmo ntuj tsis ncaim ntawm cov Ixayees hauv ntej kiag li.