Kevcai Hla Dhau

1 (יחוח)Yahweh hais rau Mauxes thiab Aloos hauv Iziv teb chaws tias,

2 Muab lub hli no ua lub ib hlis rau nej, yuav ua thawj lub hli rau xyoo tshiab rau nej.

3 Cia li qhia rau ib tsoom Ixayees sawvdaws tias, hnub xiab kaum, lub hli no, kom txhua tus txivneej muab ib tug menyuam yaj rau nws tsev neeg, ib yig ib tug.

4 Yog yim twg tibneeg tsawg, noj tsis tag ib tug menyuam yaj, kuj koom nrog lwm yim uas nyob sib ti npaj raws li cov tibneeg muaj coob, muaj tsawg, thiab lawv yuav ntsuas saib lawv noj tag ntau los tsawg.

5 Nej tus menyuam yaj yuav tau yog ib tug txiv thiab tsis muaj chaw thuam li, thiab hnub nyoog ib xyoos, txawm yog menyuam yaj lossis menyuam tshis los kuj tau.

6 Nej yuav muab yug cia txog hnub xiab kaum plaub, lub hli no, mas thaum tsaus ntuj, cov Ixayees sawvdaws yuav tua lawv tus menyuam yaj.

7 Mas lawv yuav tau muab cov ntshav pleev ob tug npuab rooj thiab saum hau qhov rooj rau lub tsev uas lawv noj ntawd.

8 Hmo ntawd, lawv yuav noj nqaij ci, ntxuag cov ncuav tsis xyaw keeb, thiab ntxuag tej txuj lom iab. 

9 Tsis txhob noj nqaij nyoos thiab nqaij hau kiag li, cia li muab ci kiag ib tug kheej nrog taubhau thiab tes taw, thiab plab nyhuv, siab, ntsws.

10 Tsis txhob tseg ib qho seem txog kaj ntug. Tej uas tshuav rau kaj ntug, cia li muab hlawv pov tseg.

11 Nej sawvdaws yuav noj li no, yuav sia siv khov kho ntawm duav thiab rau khau rawv ntawm taw, thiab tuav rawv pas nrig ntawm tes.  Nej yuav noj nrawm nroos.  No yog (יחוח)Yahweh kevcai hla dhau.

12 Rau qhov hmo ntawd, kuv yuav hla mus hauv Iziv tebchaws, mas kuv yuav tua txhua tus menyuam uas yog tus tub hlob hauv Iziv tebchaws huvsi, tsis hais tibneeg thiab tsiaj txhu. Thiab yuav rau txim rau Iziv tej dab huvsi. Kuv yog (יחוח)Yahweh.

13 Cov ntshav uas nyob ntawm lub tsev uas nej nyob, yuav ua chaw ntaus cim rau nej. Thaum kuv pom cov ntshav ntawd, kuv yuav hla dhau nej mus, yuav tsis muaj xwm txheej phem tshwm los raug nej rau thaum kuv ntaus Iziv tebchaws.

​

Rooj Kevcai Noj Ncuav Tsis Xyaw Keeb

14 Hnub no yuav ua hnub uas nej nco ntsoov thiab nej yuav nco muab hnub no ua kevcai noj haus hwm (יחוח)Yahweh. Nej yuav coj kevcai npaj noj haus li no ib tiam dhau ib tiam mus ib txhis.

15 Nej yuav noj ncuav tsis xyaw keeb kom puv xya hnub. Thawj hnub, nej yuav muab tej keeb ncuav hauv nej tej tsev, rho pov tseg huvsi. Yog leejtwg noj tej ncuav uas xyaw keeb hnub ib txog hnub xya, mas yuav muab tus ntawd txiav tawm hauv cov Ixayees.

16 Thawj hnub yuav tuaj txoos ua ke ua kevcai dawb huv thiab hnub uas xya kuj tuaj txoos ua ke ua kevcai dawb huv. Ob hnub ntawd, tsis txhob ua haujlwm abtsi kiag li, tsuas yog ua pluas noj pluas haus xwb.

17 Nej yuav coj kevcai noj ncuav tsis xyaw keeb, rau qhov hnub no ntag, yog hnub uas kuv tau coj nej cov tibneeg tawm hauv Iziv tebchaws. Vim li no, nej yuav nco muab hnub no los ua kevcai noj haus ib tiam dhau ib tiam, mus ib txhis li.

18 Lub ib hlis, hnub xiab kaum plaub, thaum tsaus ntuj, nej yuav noj ncuav tsis xyaw keeb mus txog hnub tim nees nkaum ib, thaum tsaus ntuj.

19 Hauv xya hnub ntawd, tsis kheev kom muaj ib qho keeb nyob hauv nej tej tsev kiag li. Yog leejtwg tuaj ua qhua nyob lossis yug hauv lub tebchaws kuj xij, noj ncuav xyaw keeb mas tus ntawd yuav raug muab txiav tawm hauv cov Ixayees.

20 Nej tsis txhob noj ib yam abtsi uas xyaw keeb rau hauv txhua lub chaw uas nej nyob, tsuas noj tej ncuav uas tsis xyaw keeb xwb.

21 Ces Mauxes txawm hu Ixayees tej kev txwj laug sawvdaws tuaj ua ke thiab hais rau lawv tias, nej sawvdaws txhua yim cia li xaiv ib tug menyuam yaj los tua ua kevcai hla dhau.

22 Muab ib re nplooj zaub txig theem raus cov ntshav uas nyob hauv lub phaj, coj mus pleev rau ob tug npuab rooj thiab saum hau qhov rooj. Tsis txhob kheev nej ib tug tawm hauv nws lub tsev txog kaj ntug.

23 Rau qhov (יחוח)Yahweh yuav hla tuaj mus tua cov Iziv. Thaum (יחוח)Yahweh pom cov ntshav saum hau qhov rooj thiab ntawm ob tug npuab rooj, nws yuav hla lub qhov rooj ntawd mus, nws yuav tsis kheev tus uas tua nkag mus tua nej rau hauv nej lub tsev.

24 Nej yuav coj txoj kevcai no rau nej thiab nej tej tub ki mus ib txhis.

25 Thaum nej mus txog lub tebchaws uas (יחוח)Yahweh yuav pub rau nej raws li uas nws tau cog lus tseg lawm, nej cia li coj txoj kevcai no.

26 Thaum nej tej tub ki nug nej tias, txoj kevcai no lub ntsiab yog abtsi?

27 Nej yuav teb tias, yog ua kevcai xyeem tsiaj hla dhau rau

(יחוח)Yahweh, rau qhov (יחוח)Yahweh tau hla cov Ixayees tej tsev hauv Iziv tebchaws, rau thaum nws tua cov tibneeg Iziv, tiamsis tseg peb txhua tsev neeg. Cov pejxeem kuj nyo hau pe hawm (יחוח)Yahweh.

28 Mas cov Ixayees kuj mus ua tej no raws li (יחוח)Yahweh tau hais rau Mauxes thiab Aloos lawd.

​

Cov Iziv Tej Tub Hlob Tuag

29 Thaum ib tag hmo, (יחוח)Yahweh tua tej tub hlob txhua tus hauv Iziv tebchaws, txij ntua Falaus tus tub hlob uas nyob saum lub zwm txwv mus txog tus uas raug kaw hauv tsev lojfaj tus tub hlob, thiab tej tsiaj txhu thawj tug menyuam txhua tus. 

30 Mas Falaus thiab nws cov tub teg tub taws sawvdaws thiab cov Iziv sawvdaws sawv tsaus ntuj nti los. Muaj suab quaj nyiav nrov thoob plaws Iziv tebchaws, vim yog tsis tshuav ib yig uas tsis muaj tibneeg tuag li.

31 Falaus thiaj hu Mauxes thiab Aloos tuaj cuag nws hmo ntawd, thiab hais tias, neb thiab cov Ixayees cia li sawv tsees tsiv ntawm kuv haiv neeg mus lauj. Cia li mus pe hawm (יחוח)Yahweh raws li neb twb hais cia lawd. 

32 Cia li coj nej tej yaj, tej tshis thiab nej tej nyuj mus raws li neb twb hais cia lawd. Thiab foom koob hmoov rau kuv. 

33 Cov Iziv kuj txhib kom cov Ixayees khiav tawm hauv lawv lub tebchaws sai sai. Lawv hais tias, peb tuag tag lawm lauj!

34 Cov Ixayees thiaj muab khaubncaws qhwv tej hmoov uas tsis tau xyaw keeb thiab tej phaj uas zuaj ncuav kwv kiag saum xub pwg mus.

35 Cov Ixayees twb ua raws li Mauxes tau hais lawd, yog thov tej npauj nyiag, npauj kub thiab tej tsoos tsho ntawm cov Iziv.

36 Thiab (יחוח)Yahweh ua rau cov Iziv hlub cov Ixayees, thiaj muab txhua yam uas cov Ixayees thov pub rau lawv. Ua li no, lawv thiaj lwg tau cov Iziv.

​

Cov Ixayees Tawm Hauv Iziv Tebchaws

37 Cov Ixayees sawv taw tawm ntawm lub moos Lamexes mus txog lub moos Xukhaus. Suav cov txivneej kwvlam muaj 600,000 leej tsis suav cov pojniam menyuam.

38 Muaj lwm haiv neeg coob coob nrog lawv mus thiab. Sawvdaws raws tsiaj txhu coob coob mus, tsis hais yaj, tshis, thiab nyuj.

39 Lawv muab tej hmoov uas zuaj lawm, coj tawm hauv Iziv tebchaws mus ci ua ncuav tsis xyaw keeb. Lawv tsis xyaw keeb, rau qhov lawv raug txhib tawm hauv Iziv tebchaws thiab tos tsis taus thiaj npaj tsis yeej zaub mov.

40 Cov Ixayees nyob hauv Iziv tebchaws tau plaub puas peb caug xyoo.

41 Thaum dhau plaub puas peb caug xyoo lawd, hnub ntawd ntag, (יחוח)Yahweh haiv neeg sawvdaws tawm hauv Iziv tebchaws mus.

42 Hmo ntawd, yog hmo uas (יחוח)Yahweh zov rawv yuav coj lawv tawm hauv Iziv tebchaws. Yog li ntawd, hmo ntawd kuj yog hmo uas cov Ixayees sawvdaws yuav zov rawv nco txog (יחוח)Yahweh, ib tiam dhau ib tiam mus li.

​

(יחוח)Yahweh Qhia Ua Kevcai Hla Dhau

43 Yahweh hais rau Mauxes thiab Aloos tias, kevcai hla dhau yuav tau ua li no. Tsis txhob kheev lwm haiv neeg noj li.

44 Tiamsis tus qhev twg uas nej rho nyiaj yuav los thiab muab nws ua kevcai txiav lawm, nws thiaj noj tau.

45 Lwm haiv neeg uas nrog nej nyob thiab tej tub zog mas tsis txhob cia noj.

46 Yuav tau noj hauv tsev xwb, tsis txhob coj tej nqaij ib qho tawm rau nraum zoov kiag li, thiab tsis txhob muab tej pob txha lov. 

47 Cov Ixayees sawvdaws yuav tau ua txoj kevcai no. 

48 Thaum muaj lwm haiv neeg los nrog nej nyob thiab xav ua kevcai hla dhau xyeem rau (יחוח)Yahweh, kuj kom nws cov txivneej sawvdaws ua kevcai txiav tso, nws li tuaj ze thiab ua kevcai tau. Nws thiaj zoo ib yam li cov uas yug rau hauv lub tebchaws. Tiamsis cov uas tsis tau ua kevcai txiav mas tsis txhob noj kiag li. 

49 Cov Ixayees uas yug hauv lub tebchaws thiab lwm haiv neeg uas los nrog nej nyob yuav tau coj txoj kevcai no ib yam nkaus.

50 Mas cov Ixayees sawvdaws kuj ua tej no raws li (יחוח)Yahweh tau hais rau Mauxes thiab Aloos lawm.

51 Hnub ntawd ntag, (יחוח)Yahweh coj cov Ixayees txhua xeem tawm hauv Iziv tebchaws mus raws li lawv tej pab tej pawg.