Qhia Txog Tej Tub Hlob Tuag

1 (יחוח)Yahweh hais rau Mauxes tias, tshuav ib zaug xwm txheej phem uas kuv yuav tso rau Falaus thiab cov Iziv lawm xwb, dhau ntawd, nws yuav tso nej tawm mus. Thaum nws tso nej tawm mus, nws yuav ntiab kiag nej sawvdaws mus.

2 Nimno koj cia li hais rau koj cov tibneeg kom txhua tus pojniam, txivneej, thov tej npauj nyiag, npauj kub, ntawm cov Iziv uas nrog lawv nyob koom zej koom zos.

3 (יחוח)Yahweh ua rau cov Iziv hlub nws haiv neeg. Thiab Falaus cov tub teg tub taws thiab cov pejxeem hauv Iziv tebchaws pom tias Mauxes yog ib tug tibneeg tseem ceeb heev.

4 Mauxes hais tias, (יחוח)Yahweh hais li no tias, kwvlam ib tag hmo, kuv yuav mus thoob plaws Iziv tebchaws.

5 Mas tej menyuam tub uas yog tus hlob tag nrho hauv Iziv tebchaws, txij ntua Falaus tus tub hlob uas nyob saum nws lub zwm txwv mus txog tus poj qhe uas zom zeb tus tub hlob, thiab tag nrho rau tej tsiaj txhu thawj tug menyuam yuav tuag.

6 Mas yuav muaj suab quaj qw nrov thoob plaws Iziv tebchaws, ib txwm tsis tau muaj dua li no thiab yuav tsis muaj dua li lawm.

7 Tiamsis yuav tsis muaj ib tug dev tsem cov Ixayees thiab lawv tej tsiaj txhu kiag li, kom nej thiaj paub tias (יחוח)Yahweh cais cov Iziv thiab cov Ixayees.

8 Mas koj cov tub teg tub taws sawvdaws no yuav tuaj cuag kuv thiab pe ntawm kuv xubntiag hais tias, koj thiab koj cov tibneeg sawvdaws cia li tawm mus. Dhau ntawd, kuv li tawm mus. Mauxes txawm tawm plaws ntawm Falaus mus ua npau taws heev.

9 Mas (יחוח)Yahweh hais rau Mauxes tias, Falaus yuav tsis mloog koj hais, xwv kuv thiaj tau ua txujci tsav ntxiv rau hauv Iziv tebchaws thiab.

10 Mauxes thiab Aloos tau ua tej txujci tseem ceeb huvsi ntawd tab meeg Falaus, thiab (יחוח)Yahweh ua rau Falaus lub siab tawv, nws thiaj tsis kam tso cov Ixayees tawm hauv nws lub tebchaws mus.