Kooj Txig

1 (יחוח)Yahweh hais rau Mauxes tias, cia li mus cuag Falaus. Kuv ua Falaus lub siab thiab nws cov tub teg tub taws lub siab tawv, xwv kuv thiaj tau ua kuv tej txujci tseem ceeb no tshwm rau hauv lawv nruab nrab.

2 Mas koj thiaj tau qhia rau koj tej tub ki xeeb ntxwv mloog txog qhov uas kuv tawb cov Iziv li cas, thiab mloog txog tej txujci tseem ceeb uas kuv ua hauv lawv nruab nrab, kom nej thiaj paub tias kuv yog (יחוח)Yahweh.

3 Mauxes thiab Aloos nkag mus cuag Falaus thiab hais rau nws tias, (יחוח)Yahweh uas yog cov Hinplus Tus Tswv hais li no tias, koj yuav kwv yuav tawv tsis txo koj lub hwjchim rau ntawm kuv mus ntev li cas? Cia li tso kuv haiv neeg mus kom lawv thiaj tau mus pe hawm kuv.

4 Yog koj tsis yeem tso kuv haiv neeg mus, mas tagkis kuv yuav coj kooj txig los rau hauv koj lub tebchaws.

5 Tej kooj txig ntawd yuav laum nkaus lub tebchaws tsis pom av li. Tej uas tshuav tsis raug lawg ntaus, kooj txig yuav muab noj, thiab nej txhua tsob ntoo tom teb, kooj yuav muab noj tag huvsi.

6 Kooj yuav los puv nkaus koj tsev thiab puv nkaus koj cov tub teg tub taws, thiab cov Iziv sawvdaws tej tsev. Txij thaum nej niam nej txiv nej pog nej yawg nyob lub tebchaws no los txog niaj hnub nimno, lawv tsis tau pom dua li no kiag li. Ces Mauxes txawm tig hlo tawm ntawm Falaus mus lawm.

7 Falaus cov tub teg tub taws hais rau Falaus tias, tus yawg no yuav ua hmab ua hlua cuab peb mus ntev li cas? Cia li tso cov tibneeg ntawd mus pe hawm (יחוח)Yahweh uas yog lawv Tus Tswv los maj. Koj tseem tsis paub tias Iziv tebchaws puam tsuaj tag lawm lov?

8 Mauxes thiab Aloos thiaj raug coj tuaj cuag

Falaus dua, mas Falaus hais rau nkawv tias, cia li mus pe hawm (יחוח)Yahweh uas yog nej Tus Tswv. Tiamsis leejtwg yuav mus thiab?

9 Mauxes teb tias, peb yuav mus tag nrho cov laus cov hluas, peb yuav coj peb tej tub tej ntxhais thiab peb tej yaj, tej tshis, tej nyuj mus, rau qhov peb yuav ua kevcai noj haus xyeem rau (יחוח)Yahweh.

10 Falaus hais rau nkawv tias, yog kuv kheev tso nej thiab nej cov menyuam mus, kuj cia (יחוח)Yahweh nrog nraim nej lauj! Nej ntaus tswvyim ua phem xwb.

11 Kuv tsis kheev. Cia cov txivneej mus pe hawm (יחוח)Yahweh xwb, rau qhov nej yeej xav ua li ntawd. Ces Falaus txawm muab nkawv ntiab tawm ntawm nws mus lawm.

12 (יחוח)Yahweh txawm hais rau Mau-xes tias, cia li tsa koj txhais tes rau saum Iziv tebchaws kom tej kooj txig thiaj nqis los rau hauv Iziv tebchaws thiab noj tej zaub tej nroj tsuag huvsi uas tseem tshuav tsis raug lawg ntaus.

13 Mauxes thiaj tsa tus pas nrig rau saum Iziv tebchaws mas (יחוח)Yahweh ua kom cua ntsawj sab hnub tuaj los rau lub tebchaws ib hnub ib hmos, mas tagkis sawv ntxov cua sab hnub tuaj ntsawj tau tej kooj txig tuaj lawm.

14 Kooj txig nqis los puv nkaus Iziv tebchaws tsaws thoob plaws Iziv tebchaws. Yav thaum ub tsis tau muaj tej pab kooj txig coob npaum li zaum no, thiab yuav tsis muaj dua li lawm.

15 Kooj laum nkaus lub tebchaws huvsi tsaus nti. Kooj noj tej zaub, nroj tsuag thiab tej txiv ntoo huvsi uas lawg ntaus tsis tag. Tsis tshuav ib daim nplooj ntsuab kiag li, tsis hais nplooj ntoo nplooj zaub hauv tej liaj teb thoob plaws Iziv tebchaws.

16 Falaus maj nroos hu Mauxes thiab Aloos tuaj thiab hais tias, kuv tau ua txhaum rau (יחוח)Yahweh uas yog nej Tus Tswv thiab neb ob leeg lawm.

17 Nimno thov koj zam txim rau kuv ib zaug thiab, thiab thov (יחוח)Yahweh uas yog nej Tus Tswv muab txojkev tuag no rho mus.

18 Mauxes tawm ntawm Falaus mus thiab thov (יחוח)Yahweh.

19 (יחוח)Yahweh thiaj ua cua ntsawj hlob hlob sab hnub poob tuaj yaws kiag cov kooj ntawd mus rau hauv Hiavtxwv Liab, tsis tshuav ib tug nyob hauv Iziv tebchaws kiag li.

20 Tiamsis (יחוח)Yahweh tseem ua rau Falaus lub siab tawv, Falaus tsis kam tso cov Ixayees mus.

​

Kev Tsaus Ntuj

21 (יחוח)Yahweh hais rau Mauxes tias, cia li tsa koj txhais tes rau saum ntuj kom thiaj tsaus ntuj nti thoob plaws Iziv tebchaws, yuav tsaus

tsaus xuas tes kov tau qhov tsaus ntawd.

22 Mauxes thiaj tsa nws txhais tes rau saum ntuj, ces txawm tsaus ntuj nti dub nciab thoob plaws Iziv tebchaws tau peb hnub.

23 Cov Iziv ib leeg saib tsis pom ib leeg, tsis muaj ib tug sawv tau ntawm nws lub chaw tau peb hnub, tiamsis qhov chaw uas cov Ixayees sawvdaws nyob mas pom kev kaj lug.

24 Falaus thiaj hu Mauxes tuaj thiab hais tias, nej cia li mus pe hawm (יחוח)Yahweh lauj. Kheev nej tej menyuam nrog nej mus, tsuas yog tseg nej tej yaj, tej tshis, tej nyuj nyob xwb.

25 Tiamsis Mauxes hais tias, koj yuav tau kheev peb coj tej tsiaj uas xyeem thiab tej uas hlawv xyeem mus thiab, xwv peb thiaj tau xyeem rau (יחוח)Yahweh uas yog peb Tus Tswv.

26 Peb tej tsiaj txhu yuav tau nrog peb mus thiab tsis tseg ib tug rau tes rau taw kiag li, rau qhov peb yuav tau muab qee tus tsiaj hauv tej pab tsiaj ntawd, xyeem pe hawm (יחוח)Yahweh uas yog peb Tus Tswv. Peb twb tsis paub tias yuav muab tus tsiaj twg xyeem rau (יחוח)Yahweh, yuav yog mus txog qhov chaw ntawd tso li paub.

27 Tiamsis (יחוח)Yahweh ua rau Falaus lub siab tawv, Falaus tsis kam tso lawv mus.

28 Falaus thiaj hais rau Mauxes tias, cia li khiav ntawm kuv xubntiag mus, ceev faj tib zoo tsis txhob tuaj pom kuv lub ntsej muag dua li lawm. Yog koj pom kuv ntsej muag hnub twg, koj yuav tuag hnub ntawd.

29 Mauxes teb tias, ua li uas koj hais los maj. Kuv yuav tsis pom koj lub ntsej muag dua li lawm.