1 (יחוח)Yahweh hais rau Mauxes tias, cia li nkag mus cuag Falaus thiab hais rau nws tias, (יחוח)Yahweh uas yog cov Hinplus Tus Tswv hais li no tias, koj cia li tso kuv haiv neeg mus kom lawv thiaj tau mus pe hawm kuv.

2 Tiamsis yog koj tsis kam tso lawv mus, tseem tav lawv cia,

3 mas (יחוח)Yahweh txhais tes yuav tso mob kis loj heev los rau nej tej tsiaj txhu hauv tej tshav zaub, tsis hais nees, nees luav, ntxhuav, nyuj, yaj, thiab tshis, huvsi.

4 Tiamsis (יחוח)Yahweh yuav cais cov Ixayees tej tsiaj txhu thiab cov Iziv tej tsiaj txhu, mas cov Ixayees tej tsiaj txhu yuav tsis tuag ib tug li.

5 (יחוח)Yahweh teem sijhawm cia hais tias, tagkis (יחוח)Yahweh yuav ua tej no rau hauv lub tebchaws.

6 Mas hnub tom qab (יחוח)Yahweh txawm ua ntag. Cov Iziv tej tsiaj txhu tuag tag nrho huvsi, tiamsis cov Ixayees tej tsiaj txhu tsis tuag ib tug li.

7 Falaus thiaj txib tibneeg mus saib ua ciav cov Ixayees tej tsiaj txhu tsis tuag ib tug li. Tiamsis Falaus lub siab tseem tawv heev, tsis kam tso cov Ixayees mus.

​

Mob Rwj.

8 (יחוח)Yahweh hais rau Mauxes thiab Aloos tias, cia li tsuab ob peb taus tes tshauv hauv qhov cub los, cia Mauxes muab w rau saum nruab ntug tab meeg Falaus.

9 Cov tshauv ntawd yuav txia ua hmoov av ya mus thoob plaws Iziv tebchaws, ua rau tibneeg thiab tsiaj txhu mob rwj ua kiav txhab thoob plaws Iziv tebchaws.

10 Nkawv thiaj tsuab tshauv hauv qhov cub mus sawv ntawm Falaus xubntiag. Mauxes txawm muab cov tshauv ntawd w rau saum nruab ntug, mas cov tshauv ntawd ua rau tibneeg thiab tsiaj txhu mob rwj ua kiav txhab.

11 Cov uas txawj ua yees siv kuj nyob tsis taus ntawm Mauxes xubntiag, vim yog tim tej rwj, rau qhov lawv thiab cov Iziv sawvdaws mob rwj.

12 Tiamsis (יחוח)Yahweh ua rau Falaus lub siab tawv, tsis mloog nkawv hais, ib yam li (יחוח)Yahweh hais cia rau Mauxes lawd.

​

Los Lawg

13 (יחוח)Yahweh hais rau Mauxes tias, cia li sawv ntxov mus cuag Falaus thiab hais rau nws tias, (יחוח)Yahweh uas yog cov Hinplus Tus Tswv hais li no tias, cia li tso kuv haiv neeg mus kom lawv thiaj tau mus pe hawm kuv.

14 Mas zaum no, kuv yuav tso kuv tej xwm txheej phem huvsi los raug koj thiab koj cov tub teg tub taws, thiab koj cov pejxeem, xwv koj thiaj paub tias, thoob plaws lub ntiajteb tsis muaj ib tug twg yuav zoo cuag li kuv.

15 Yog kuv tsa kiag tes ua rau koj thiab koj cov pejxeem raug mob kis thiaj ua rau nej ploj ntais hauv lub ntiajteb, los kuv yeej ua tau.

16 Tiamsis qhov uas kuv tseem tseg koj txojsia cia, kuj yog kuv yuav ua kuv lub hwjchim tshwm rau koj pom, xwv thiaj tshaj tawm kuv lub npe mus thoob ntiajteb.

17 Koj tseem tsab ua loj tawm tsam kuv haiv neeg thiab tsis kam tso lawv mus.

18 Saib nawj, tagkis lub sijhawm no, kuv yuav tso lawg los hlob heev kawg. Txij thaum rhawv Iziv teb chaws los txog niaj hnub nimno, tsis tau muaj dua ib zaug uas lawg hlob li no.

19 Vim li no, cia li hais kom coj koj tej nyuj thiab txhua yam uas koj muaj tom tej tshav zaub mus rau hauv tej chaw nraim, rau qhov lawg yuav los ntaus txhua tus tibneeg thiab txhua tus tsiaj txhu uas tseem nyob tom tshav zaub es tsis los rau hauv tej chaw nkaum kom tuag tag huvsi.

20 Falaus cov tub teg tub taws uas ntshai (יחוח)Yahweh tej lus thiaj li kom lawv tej qhev thiab lawv tej tsiaj txhu maj los nkaum hauv tsev.

21 Tiamsis cov uas tsis quav ntsej (יחוח)Yahweh tej lus, tseem tso lawv tej qhev thiab lawv tej tsiaj txhu nyob hauv tshav zaub.

22 (יחוח)Yahweh hais rau Mauxes tias, cia li tsa tes rau saum ntuj, kom lawg thiaj li poob los thoob plaws Iziv tebchaws, ntaus tej tibneeg thiab tsiaj txhu thiab ntaus tej txhiam liaj, txhiam xwm hauv tej teb thoob plaws Iziv tebchaws.

23 Mauxes txawm tsa kiag nws tus pas nrig rau saum ntuj. Ces (יחוח)Yahweh txawm ua rau xob nroo nrov ntwg thiab los lawg, thiab nplaim taws liab pes vog los rau hauv av.  (יחוח)Yahweh tso lawg los rau hauv Iziv tebchaws.

24 Muaj lawg thiab nplaim taws laim pes lias hauv cov lawg ntawd tsis tu li. Los lawg hlob heev thoob plaws Iziv tebchaws, txij thaum muaj lub tebchaws los tsis tau muaj hlob li ntawd ib zaug li.

25 Lawg ntaus txhua yam uas nyob hauv tej tshav zaub thoob plaws Iziv tebchaws, tsis hais tibneeg thiab tsiaj txhu piam tag. Lawg ntaus tej zaub huvsi ntsoog tag thiab ntaus tej xyoob ntoo lov tag huvsi.

26 Tsuas yog tshuav hauv Kausees uas cov Ixayees nyob thiaj tsis los lawg xwb.

27 Falaus thiaj hu Mauxes thiab Aloos tuaj thiab hais rau nkawv tias, zaum no kuv ua txhaum lawm tiag. (יחוח)Yahweh yeej ua raug lawm, kuv thiab kuv cov tibneeg ua txhaum.

28 Thov koj thov (יחוח)Yahweh lauj! Kuv dhuav xob nroo thiab cov lawg no hwv lawm. Kuv yuav tso nej mus, tsis txog nej nyob no lawm.

29 Mauxes hais rau nws tias, thaum kuv tawm hauv lub nroog no lawm, kuv yuav tsa tes thov (יחוח)Yahweh. Mas xob yuav ntsiag lawg yuav tu, kom koj thiaj paub tias lub ntiajteb yog (יחוח)Yahweh li.

30 Tiamsis kuv paub tias koj thiab koj cov tub teg tub taws tseem tsis ntshai (יחוח)Yahweh li thiab.

31 Maj thiab qeb raug lawg puam tsuaj tag, rau qhov qeb tab tom txhawv thiab maj tab tom tawg paj.

32 Tiamsis mog thiab txhuv daj tsis raug puam tsuaj, rau qhov tseem tsis tau tuaj kaus.

33 Mauxes txawm tawm ntawm Falaus hauv lub nroog mus, nws kuj tsa kiag tes thov (יחוח)Yahweh. Xob txawm ntsiag, lawg thiab nag txawm tu tsis los rau hauv lub tebchaws lawm.

34 Tiamsis thaum Falaus pom tias nag thiab lawg tsis los, xob tsis nroo lawm, nws thiab nws cov tub teg tub taws rov ua txhaum dua thiab ua lub siab tawv.

35 Falaus lub siab tawv tsis kam tso cov Ixayees mus ib yam li (יחוח)Yahweh hais cia rau Mauxes lawd.