1 (יחוח)Yahweh hais rau Mauxes tias, cia li nkag mus cuag Falaus thiab hais rau nws tias, (יחוח)Yahweh hais li no tias, cia li tso kuv haiv neeg mus xwv lawv thiaj tau mus pe hawm kuv.

2 Tiamsis yog koj tsis kam tso lawv mus, kuv yuav tso qav nce thoob plaws koj lub tebchaws ua rau koj raug txom nyem.

3 Qav yuav puv nkaus tus dej Nais, thiab yuav nce los rau hauv koj lub vaj lub tsev, los rau hauv koj lub txaj thiab nce rau saum koj lub chaw pw, thiab los rau hauv koj cov tub teg tub taws, thiab koj cov pejxeem tej tsev, thiab los rau hauv koj tej qhov cub, qhov txos, thiab los rau hauv koj tej phaj zuaj ncuav.

4 Tej qav yuav nce koj thiab koj cov pejxeem, thiab koj cov tub teg tub taws lub cev huvsi.

5 (יחוח)Yahweh hais rau Mauxes tias, koj cia li hais rau Aloos tias, tsa koj txhais tes uas tuav tus pas nrig rau saum tej niag dej, tej kwj deg, tej pas dej, ua kom tej qav nce los rau saum Iziv tebchaws.

6 Aloos txawm tsa kiag tes rau saum tej dej hauv Iziv tebchaws, mas qav txawm nce los laum nkaus Iziv tebchaws.

7 Tiamsis cov uas txawj ua yees siv mas lawv siv lawv tej khawv koob ua kom qav nce los rau saum Iziv tebchaws ib yam nkaus thiab.

8 Falaus txawm hu Mauxes thiab Aloos tuaj thiab hais tias, neb thov (יחוח)Yahweh coj tej qav no tawm ntawm kuv thiab kuv cov pejxeem mus, mas kuv yuav tso neb cov tibneeg mus xyeem tsiaj rau (יחוח)Yahweh.

9 Mauxes thiaj hais rau Falaus tias, nyob ntawm koj pom zoo teem rau lub sijhawm twg rau kuv thov (יחוח)Yahweh pab koj thiab koj cov tub teg tub taws, thiab koj cov pejxeem kom tej qav no puam tsuaj tag ntawm koj thiab koj tej vaj tse, tsuas yog tseg cov uas nyob hauv tus dej Nais xwb.

10 Falaus teb tias, cia tagkis. Mauxes thiaj hais tias, yuav muaj raws li koj hais, mas koj thiaj paub tias, tsis muaj ib tug twg zoo cuag li (יחוח)Yahweh uas yog peb Tus Tswv. 

11 Tej qav yuav khiav ntawm koj thiab koj tej vaj tse, thiab koj cov tub teg tub taws, thiab koj cov pejxeem mus, tsuas yog tseg cov uas nyob hauv tus dej Nais xwb.

12 Mauxes thiab Aloos thiaj tawm ntawm Falaus mus lawm. Mas Mauxes thov (יחוח)Yahweh txog tej qav uas (יחוח)Yahweh tso los rau Falaus.

13 (יחוח)Yahweh ua raws li Mauxes thov. Mas tej qav thiaj tuag tag rau hauv tej vaj tse thiab tej tshav puam, thiab tom tej liaj teb.

14 Lawv khaws tej qav tuag ntawd, ua tej niag pawg, mas lub tebchaws tsw lwj ntxiag.

15 Tiamsis thaum Falaus pom tias tej kev txom nyem ntawd ploj lawm, nws txawm ua lub siab tawv, tsis kam mloog Mauxes thiab Aloos hais, ib yam li (יחוח)Yahweh twb hais cia lawd.

​

Yoov Qaib

16 (יחוח)Yahweh hais rau Mauxes tias, cia li hais rau Aloos tias, tsa kiag koj tus pas nrig nplawm hmoov av kom txia ua yoov qaib thoob plaws Iziv tebchaws.

17 Nkawv kuj ua li ntawd. Aloos tsa kiag nws txhais tes, xuas nws tus pas nrig nplawm hmoov av, ces txawm muaj yoov qaib los ntsauv tibneeg thiab tej tsiaj txhu. Tej hmoov av huvsi txia ua yoov qaib thoob plaws Iziv tebchaws.

18 Cov uas txawj ua yees siv kuj siv lawv tej khawv koob ua kom muaj yoov qaib tiamsis lawv ua tsis tau. Yoov qaib los ntsauv tibneeg thiab tej tsiaj txhu huvsi.

19 Cov uas txawj ua yees siv thiaj hais rau Falaus tias, tej no yog (יחוח)Yahweh tus ntiv tes ua. Tiamsis Falaus lub siab tseem tawv tsis mloog lawv hais, ib yam li (יחוח)Yahweh twb hais cia lawd.

​

Yoov Mos Ntsuab

20 (יחוח)Yahweh hais rau Mauxes tias, cia li sawv ntxov mus tos Falaus rau thaum nws mus nram ntug dej, mas hais rau nws tias, (יחוח)Yahweh hais li no tias, cia li tso kuv haiv neeg mus xwv lawv thiaj tau mus pe hawm kuv.

21 Yog koj tsis tso kuv haiv neeg mus, mas kuv yuav tso tej pab yoov mos ntsuab los ntsauv koj thiab koj cov tub teg tub taws, thiab koj cov pejxeem, thiab los rau hauv koj tej vaj tse. Hauv cov Iziv tej vaj tse, thiab hauv tej av uas lawv nyob, yuav muaj tej pab yoov mos ntsuab puv nkaus.

22 Hnub ntawd kuv yuav cais Kausees tebchaws uas kuv haiv neeg nyob rau ib cag, tsis pub muaj tej pab yoov mos ntsuab rau hauv, kom koj thiaj paub tias kuv yog (יחוח)Yahweh, uas nyob hauv nruab nrab lub tebchaws no.

23 Kuv yuav cais kuv haiv neeg thiab koj cov tibneeg. Qhov txujci no yuav tshwm rau tag kis.

24 (יחוח)Yahweh kuj ua raws li ntawd. Ces txawm muaj yoov mos ntsuab coob kawg los rau hauv Falaus lub vaj tse thiab los rau hauv nws cov tub teg tub taws tej vaj tse, ua rau muaj kev liamsim thoob plaws Iziv tebchaws.

25 Falaus txawm hu Mauxes thiab Aloos tuaj thiab hais tias, cia li mus tua tsiaj xyeem rau neb tus (יחוח)Yahweh rau hauv lub tebchaws no.

26 Tiamsis Mauxes teb tias, ua tsis tau li ntawd, rau qhov peb yuav muab tej tsiaj uas cov Iziv caiv tua xyeem rau (יחוח)Yahweh uas yog peb Tus Tswv. Yog peb tua tej tsiaj xyeem tab meeg cov Iziv uas lawv caiv tias yog yam uas qias vuab tsuab, lawv yuav tsis xuas pob zeb ntaus peb lov?

27 Peb yuav tau mus rau hauv tebchaws moj sab qhua peb hnub ke, tua tsiaj xyeem rau (יחוח)Yahweh uas yog peb Tus Tswv raws li nws hais rau peb.

28 Falaus thiaj hais tias, kuv yuav tso nej mus kom nej thiaj tau mus xyeem tsiaj rau (יחוח)Yahweh uas yog nej Tus Tswv hauv tebchaws moj sab qhua, tiamsis tsis txhob mus deb deb. Koj cia li thov ((יחוח)Yahweh pab kuv.

29 Mauxes thiaj hais tias, thaum kuv tawm ntawm koj mus lawd, kuv yuav thov (יחוח)Yahweh ua rau tej yoov mos ntsuab khiav ntawm koj thiab ntawm koj cov tub teg tub taws, thiab ntawm koj cov pejxeem mus rau tagkis. Tiamsis koj tsis txhob ntxeev dua lus es tsis tso peb haiv neeg mus xyeem tsiaj rau (יחוח)Yahweh.

30 Mauxes txawm tawm ntawm Falaus mus lawm, nws

kuj thov (יחוח)Yahweh.

31 (יחוח)Yahweh ua raws li Mauxes tej lus thov thiaj ua rau tej yoov mos ntsuab khiav ntawm Falaus thiab ntawm nws cov tub teg tub taws, thiab ntawm nws cov pejxeem mus, tsis tshuav ib tug li.

32 Tiamsis zaum no, Falaus tseem ua lub siab tawv thiab, tsis kam tso cov Ixayees mus.