1 (יחוח)Yahweh hais rau Mauxes tias, ua li no nawj, kuv tsa koj ua zoo li (יחוח)Yahweh rau Falaus, mas koj tus tijlaug Aloos yuav ua tus uas cev koj li lus.

2 Koj cia li hais tej lus huvsi uas kuv hais rau koj mas koj tus tijlaug Aloos yuav hais rau Falaus kom nws tso cov Ixayees tawm hauv nws lub tebchaws mus.

3 Tiamsis kuv yuav ua rau Falaus lub siab tawv. Txawm yog kuv ua kuv tej txujci tseem ceeb thiab tej txujci txaus ntshai tshwm rau hauv Iziv tebchaws ntau zuj zus,

4 los Falaus yuav tsis mloog neb hais. Mas kuv yuav tsa kuv txhais tes ntaus Iziv tebchaws thiab rau txim nyhav thiaj coj tau kuv cov tibneeg Ixayees tawm hauv Iziv tebchaws mus raws li lawv tej pab tej pawg.

5 Cov Iziv yuav paub tias kuv yog (יחוח)Yahweh rau thaum kuv tsa kuv txhais tes tawm tsam Iziv tebchaws thiab coj cov Ixayees tawm hauv lawv mus.

6 Mauxes thiab Aloos ua raws li ntawd. Nkawv ua raws nraim li uas (יחוח)Yahweh hais.

7 Thaum nkawv mus hais rau Falaus, Mauxes hnub nyoog muaj yim caum xyoo, Aloos hnub nyoog muaj yim caum peb xyoo.

​

Aloos Tus Pas Nrig

8 (יחוח)Yahweh hais rau Mauxes thiab Aloos tias,

9 thaum Falaus hais rau neb tias, cia li ua txujci tseem ceeb rau kuv saib, mas koj cia li hais rau Aloos tias, muab tus pas nrig pov rau ntawm Falaus xubntiag, tus pas nrig yuav txia kiag ua ib tug nab.

10 Mauxes thiab Aloos thiaj mus cuag Falaus thiab ua raws nraim li (יחוח)Yahweh hais. Aloos muab nws tus pas nrig pov rhees rau ntawm Falaus thiab nws cov tub teg tub taws xubntiag, mas tus pas nrig txia kiag ua ib tug nab.

11 Falaus txawm hu cov uas txawj ntse thiab cov uas txawj ua khawv koob yees siv tuaj. Lawv yog Iziv cov uas txawj ua yees siv, mas lawv siv lawv tej khawv koob ua tau zoo ib yam li ntawd thiab.

12 Thaum lawv nyias taus nyias pov pas nrig ces tej pas nrig ntawd kuj txia ua nab huvsi thiab, tiamsis Aloos tus pas nrig muab lawv cov pas nrig nqos tag huvsi lawm.

13 Txawm li ntawd los, Falaus lub siab tseem tawv, tsis yeem mloog nkawv hais, ib yam li (יחוח)Yahweh hais cia lawd.

​

Dej Txia Ua Ntshav

14 (יחוח)Yahweh hais rau Mauxes tias, Falaus lub siab tawv, tsis kam tso cov Ixayees mus.

15 Thaum sawv ntxov, koj cia li mus cuag Falaus rau thaum nws mus nram tus dej. Koj mus sawv ntawm ntug dej tos nws, tuav rawv tus pas nrig uas txia ua nab mus thiab.

16 Koj yuav hais rau nws tias, (יחוח)Yahweh uas yog cov Hinplus Tus Tswv, txib kuv tuaj cuag koj hais tias, cia li tso kuv haiv neeg mus xwv lawv thiaj tau mus pe hawm kuv hauv tebchaws moj sab qhua. Txog tav no koj kuj tsis mloog hais kiag li.

17 (יחוח)Yahweh hais li no tias, koj yuav paub tias kuv yog (יחוח)Yahweh, rau qhov uas ua li no. saib maj, kuv yuav xuas tus pas nrig uas nyob hauv kuv txhais tes nplawm tus dej Nais, mas dej yuav txia ua ntshav.

18 Tej ntses hauv tus dej Nais yuav tuag, thiab tus dej Nais yuav tsw lwj ntxiag, thiab cov Iziv yuav haus tsis taus tus dej ntawd.

19 (יחוח)Yahweh hais dua rau Mauxes tias, cia li hais rau Aloos tias, tuav koj tus pas nrig hauv koj txhais tes, tsa rau saum tej dej hauv Iziv tebchaws, tsis hais lawv tej niag dej, tej kwj deg, tej pas dej, tej qhov dej, huvsi mas tej dej yuav txia ua ntshav. Yuav muaj ntshav thoob plaws Iziv tebchaws tsis hais hauv tej thoob ntoo thiab tej hub.

20 Mauxes thiab Aloos kuj ua raws nraim li uas (יחוח)Yahweh hais. Nws tsa tus pas nrig nplawm tus dej Nais tab meeg Falaus thiab nws cov tub teg tub taws, mas tej dej hauv tus dej Nais txia ua ntshav huvsi.

21 Tej ntses hauv tus dej Nais kuj tuag. Tus dej Nais tsw lwj ntxiag, cov Iziv thiaj haus tsis taus tus dej ntawd. Muaj ntshav thoob plaws Iziv tebchaws.

22 Tiamsis Iziv cov uas txawj ua yees siv mas lawv siv lawv tej khawv koob ua tau ib yam li ntawd thiab. Tiamsis Falaus lub siab tseem tawv, tsis yeem mloog nkawv hais, ib yam li (יחוח)Yahweh hais cia lawd.

23 Falaus tig hlo rov qab mus rau hauv tsev, tsis khaws tej xwm txheej no cia rau hauv lub siab.

24 Cov Iziv sawvdaws thiaj khawb qhov dej raws ntug dej Nais nrhiav dej haus, rau qhov haus tsis taus tej dej hauv tus dej Nais.

​

Qav

25 Suav txij (יחוח)Yahweh nplawm tus dej Nais tau xya hnub.