(יחוח)Yahweh Rov Hu Mauxes

1 (יחוח)Yahweh hais rau Mauxes tias, nimno koj yuav pom tej uas kuv yuav ua rau Falaus. Vim kuv txhais tes uas muaj hwjchim, Falaus yuav tso kuv haiv neeg mus, yog kuv txhais tes uas muaj hwjchim ntag mas nws yuav ntiab lawv tawm hauv nws lub tebchaws mus. 

2 (יחוח)Yahweh hais dua rau Mauxes tias, kuv yog (יחוח)Yahweh.

3 Kuv los tshwm rau Anplaham, Ixaj, thiab Yakhauj lawv hauv lub npe uas hu tias (יחוח)Yi-Sas-Dais uas muaj hwjchim loj kawg nkaus, tiamsis tsis tau qhia lawv paub kuv hauv lub npe uas yog (יחוח)Yahweh.

4 Dua ib qho, kuv cog lus ruaj khov rau lawv tias, kuv yuav muab lub tebchaws Khana‑as rau lawv, yog lub tebchaws uas lawv los ua qhua nyob hauv.

5 Tsis tag li ntawd, kuv tau hnov cov Ixayees uas cov Iziv muab yuam ua qhev lub suab ntsaj laws lawm thiab kuv nco txog kuv tej lus cog tseg.

6 Vim li no, cia li hais rau cov Ixayees tias, kuv yog (יחוח)Yahweh, kuv yuav coj nej tawm hauv tej haujlwm nyhav uas cov Iziv yuam nej ua thiab kuv yuav cawm nej dim qhov uas ua lawv qhev, thiab kuv yuav tsa kiag kuv txhais tes thiab txiav txim loj kawg txhiv nej dim.

7 Kuv yuav txais nej ua kuv haiv neeg thiab kuv yuav ua nej Tus Tswv, mas nej yuav paub tias kuv yog (יחוח)Yahweh, yog nej Tus Tswv uas coj nej dim hauv tej haujlwm nyhav uas cov Iziv yuam nej ua.

8 Kuv yuav coj nej mus rau hauv lub tebchaws uas kuv tau cog lus ruaj khov tias kuv yuav muab rau Anplaham, Ixaj, thiab Yakhauj. Kuv yuav muab rau nej ua nej teej nej tug. Kuv yog (יחוח)Yahweh.

9 Mauxes thiaj coj tej lus no mus qhia rau cov Ixayees mloog, tiamsis lawv tsis mloog Mauxes, vim lawv siab ntsws puas tag thiab raug yuam ua qhev txom nyem kawg li.

10 (יחוח)Yahweh hais rau Mauxes tias,

11 cia li nkag mus hais rau Iziv tus vajntxwv Falaus kom nws tso cov Ixayees tawm hauv nws lub tebchaws mus.

12 Tiamsis Mauxes hais rau (יחוח)Yahweh tias, cov Ixayees los kuj tsis mloog kuv hais, Falaus yuav mloog kuv li cas? Kuv hais lus tsis npliag kiag li.

13 (יחוח)Yahweh thiaj hais rau Mauxes thiab Aloos kom hais rau cov Ixayees thiab Iziv tus vajntxwv Falaus tias, yog (יחוח)Yahweh hais kom nkawv coj cov Ixayees tawm hauv Iziv tebchaws mus.

​

Mauxes Thiab Aloos Caj Ces

14 Ntawm no mus yog hais txog cov thawj hauv txhua xeem Ixayees. Ixayees tus tub hlob Lunpees cov tub yog Hanaus, Palus, Hexaloos thiab Khamis. Cov no yog xeem Lunpees tej cum.

15 Xime‑oos cov tub yog Yemu‑ees, Yamis, Auhas, Yakhis, Xauhas, thiab Sha-ul uas yog tus pojniam Khana‑as yug. Cov no yog xeem Xime‑oos tej cum.

16 Ntawm no mus yog Levis cov tub ki tej npe raws li uas twb muab sau cia lawm, yog Nkawsoos, Khauhas thiab Melalis. Levis hnub nyoog muaj ib puas peb caug xya xyoo li tuag.

17 Nkawsoos cov tub yog Linis thiab Sime‑is. Ob tug ntawd yog lawv ob cum ntawd lub hauv paus.

18 Khauhas cov tub yog Alav, Ixahas, Henploos thiab Uxi‑ees. Khauhas hnub nyoog muaj ib puas peb caug peb xyoo li tuag.

19 Melalis cov tub yog Malis thiab Musis. Cov no yog xeem Levis tej cum raws li twb muab sau cia lawm.

20 Alav yuav nws txiv tus muam Yaukhenpes ua pojniam mas yug tau Aloos thiab Mauxes. Alav hnub nyoog muaj ib puas peb caug xya xyoo li tuag.

21 Ixahas cov tub yog Khaulas, Nefes thiab Xikhis.

22 Uxi‑ees cov tub yog Misa‑ees, Eexafas thiab Xithis.

23 Aloos yuav Aminadas tus ntxhais Elisenpas uas yog Nasoos tus muam ua pojniam, mas Elisenpas yug tau Nadas, Anpihus, Ele‑axas thiab Ithamas.

24 Khaulas cov tub yog Axis, Eekhanas thiab Anpiyaxas. Cov no yog Khaulas tej cum.

25 Aloos tus tub Ele‑axas yuav Puti‑ees ib tug ntxhais ua pojniam mas yug tau Finehas. Cov tibneeg no yog xeem Levis tej cum cov thawj.

26 Aloos thiab Mauxes ob tug no ntag, yog ob tug uas (יחוח)Yahweh hais tias, neb cia li coj cov Ixayees tawm hauv Iziv tebchaws mus raws li lawv tej pab tej pawg.

27 Ob tug no yog ob tug uas thov Iziv tus vajntxwv Falaus txog qhov uas coj cov Ixayees tawm hauv Iziv tebchaws, yog tus Mauxes no thiab tus Aloos no ntag.

​

(יחוח)Yahweh Qhia Mauxes Thiab Aloos

28 Hnub uas (יחוח)Yahweh hais rau Mauxes hauv Iziv tebchaws ntawd.

29 (יחוח)Yahweh hais rau nws tias, kuv yog (יחוח)Yahweh. Koj cia li hais txhua yam uas kuv qhia koj rau Iziv tus vajntxwv Falaus mloog. 

30 Tiamsis Mauxes hais rau (יחוח)Yahweh tias, kuv yeej hais lus tsis npliag, Falaus yuav ua cas mloog kuv hais?