Mauxes Thiab Aloos Mus Cuag Falaus

1 Dhau ntawd, Mauxes thiab Aloos mus cuag Falaus thiab hais tias, (יחוח)Yahweh uas yog cov Ixayees Tus Tswv hais li no tias, cia li tso kuv haiv neeg mus xwv lawv thiaj tau mus ua kevcai noj haus pe hawm kuv hauv tebchaws moj sab qhua.

2 Tiamsis Falaus hais tias, tus (יחוח)Yahweh ntawd yog leejtwg es kuv thiaj yuav mloog nws lus thiab tso cov Ixayees mus? Kuv tsis paub (יחוח)Yahweh, thiab kuv yeej yuav tsis tso cov Ixayees mus kiag li. 

3 Nkawv txawm hais tias, cov Hinplus Tus Tswv los ntsib wb lawm. Thov cia peb mus rau hauv tebchaws moj sab qhua peb hnub ke kom thiaj tau tua tsiaj xyeem rau (יחוח)Yahweh uas yog peb Tus Tswv. Yog tsis ua li ntawd, (יחוח)Yahweh yuav tso mob kis los sis hniav ntaj hniav riam los raug peb.

4 Iziv tus vajntxwv hais rau nkawv tias, Mauxes thiab Aloos, ua cas neb yuav ua rau cov pejxeem tso lawv tej haujlwm tseg? Nej cia li rov qab mus ua nej tej haujlwm los maj.

5 Falaus hais dua tias, saib maj, nimno cov pejxeem hauv lub tebchaws coob heev mas neb yuav ua rau lawv tso lawv tej haujlwm tseg.

6 Mas hnub ntawd Falaus hais tawv rau cov nom tswv uas saib xyuas cov qhev thiab hais rau cov thawj coj ua haujlwm tias,

7 txij hnub no mus, nej tsis txhob pub tej quav nyab rau cov tibneeg ua thwv cib yam li yav tag los lawm. Cia lawv mus khaws lawv quav nyab.

8 Tiamsis cov thwv cib mas yuav tau kom lawv ua tau npaum li qub, tsis tseev kom ua tau tsawg kiag li. Vim lawv tub nkeeg, lawv thiaj quaj hais tias, thov cia peb mus xyeem tsiaj rau peb tus (יחוח)Yahweh. 

9 Nej cia li yuam kom lawv ua haujlwm nyhav dua qub xwv lawv thiaj ua haujlwm khwv, thiab tsis quav ntsej tej lus dag ntawd.

10 Cov nom tswv uas saib xyuas cov qhev thiab cov thawj coj ua haujlwm kuj mus hais rau cov pejxeem tias, Falaus hais li no tias, kuv yuav tsis pub quav nyab rau nej lawm.

11 Nej mus khaws nej quav nyab raws li uas nrhiav tau. Tiamsis nej tej haujlwm yuav tsis tseev kom ua tau tsawg kiag li.

12 Cov pejxeem thiaj mus ri sua thoob plaws Iziv tebchaws khaws tej hauv paus quav nyab.

13 Cov nom tswv uas saib xyuas cov qhev kuj txhib hais tias, nej yuav tau ua kom ib hnub tau npaum li uas teem cia, yam li thaum tseem muaj quav nyab. 

14 Ixayees cov thawj coj ua haujlwm uas Falaus cov nom tswv uas saib xyuas cov qhev tau tsa los saib xyuas lawv ntawd, kuj raug nplawm thiab raug nug tias, ua cas hnub no nej ua tsis tau thwv cib npaum li uas teem cia yam li yav tag los? 15 Ixayees cov thawj uas coj ua haujlwm thiaj tuaj quaj rau Falaus tias, ua cas koj ua li no rau peb uas yog koj cov qhev?

16 Lawv tsis pub quav nyab rau peb uas yog koj cov qhev, tiamsis lawv tseem hais tias, ua thwv cib los maj. saib maj, peb uas yog koj cov qhev raug nplawm yog tim koj cov tub teg tub taws ua txhaum.

17 Falaus hais tias, nej tub nkeeg, tub nkeeg tiag tiag li, nej thiaj hais tias, cia peb mus xyeem tsiaj rau (יחוח)Yahweh.

18 Nej cia li mus ua haujlwm tamsim no. Yuav tsis pub quav nyab rau nej li lawm, tiamsis nej tseem yuav tau ua kom tau thwv cib npaum nkaus li qub.

19 Ixayees cov thawj coj ua haujlwm thiaj pom tias, lawv raug ceeblaj lawm, rau qhov luag hais tias, tsis tseev ib hnub ntawd, nej ua tau thwv cib tsawg dua li teem tseg.

20 Thaum lawv tawm hauv Falaus los, lawv ntsib Mauxes thiab Aloos tseem tos lawv.

21 Lawv hais rau nkawv tias, thov (יחוח)Yahweh tshuaj saib neb thiab txiav txim rau neb, vim yog neb ua rau peb raug Falaus thiab nws cov tub teg tub taws ntxub heev, thiab neb muab ntaj muab riam rau hauv lawv txhais tes tua peb ntag.

22 Mauxes txawm rov mus cuag (יחוח)Yahweh hais tias, Au Tus Tswv, ua cas koj coj kev ceeblaj los rau haiv neeg no? Ua cas koj txib kuv los?  

23 Txij thaum kuv mus cuag Falaus thiab tuav koj lub npe hais rau nws, Falaus ua nruj ua tsiv rau haiv neeg no, thiab koj twb tsis cawm koj haiv neeg dim li.