(יחוח)Yahweh Pub Hwjchim Rau Mauxes

1 Mauxes teb tias, ntshai lawv yuav tsis ntseeg kuv thiab tsis quav ntsej tej uas kuv hais, rau qhov lawv yuav hais tias, (יחוח)Yahweh tsis tau tshwm rau koj pom li.

2 (יחוח)Yahweh txawm hais rau nws tias, abtsi nyob hauv koj txhais tes? Mauxes teb tias, ib tug pas nrig.

3 (יחוח)Yahweh hais tias, cia li muab pov rau hauv pem teb nawj. Nws thiaj muab pov rau hauv pem teb, tus pas nrig ntawd txawm txia kiag ua ib tug nab, Mauxes txawm tig loo khiav tus nab.

4 Tiamsis (יחוח)Yahweh hais rau Mauxes tias, cia li cev tes ntsiab nab tus kotw. Mauxes thiaj cev tes ntsiab nkaus tus kotw, txawm txia kiag rov ua tus pas nrig rau hauv nws txhais tes lawm.

5 Ua li no lawv thiaj ntseeg tias (יחוח)Yahweh uas yog lawv tej poj koob yawm txwv Tus Tswv, yog Anplaham thiab Ixaj thiab Yakhauj lawv Tus Tswv tshwm rau koj pom lawm tiag. 

6 (יחוח)Yahweh hais dua rau Mauxes tias, cia li muab koj txhais tes ntxig rau hauv koj hauv siab. Nws thiaj muab txhais tes ntxig rau hauv nws hauv siab. Thaum rho txhais tes los ua ciav nws txhais tes mob ruas dawb paug li tej daus.

7 (יחוח)Yahweh hais tias, cia li muab txhais tes ntxig rov rau hauv koj hauv siab dua ib zaug. Nws kuj muab nws txhais tes ntxig rau hauv nws hauv siab dua. Thaum nws rho tes los ua ciav txhais tes twb rov zoo kiag li nws lub cev huvsi.

8 (יחוח)Yahweh hais tias, yog lawv tsis ntseeg koj thiab tsis quav ntsej tus txujci tseem ceeb zaum ib, nyaj lawv yuav ntseeg tus txujci tseem ceeb zaum ob.

9 Yog lawv tseem tsis ntseeg ob zaug txujci tseem ceeb no thiab tsis quav ntsej koj tej lus, cia li nqa dej hauv tus dej Nais ib qho los hliv rau saum npoo av qhuav. Mas cov dej uas koj nqa hauv tus dej Nais los yuav txia ua ntshav rau saum npoo av qhuav ntawd.

10 Tiamsis Mauxes hais rau (יחוח)Yahweh tias, Au Tus Tswv, kuv ib txwm yeej tsis txawj hais lus, tsis hais yav thaum ub los yog tamsim no uas koj hais lus rau kuv uas yog koj tus qhev los yog, kuv yog ib tug uas ncauj lus tsawg hais tsis tau npliag.

11 (יחוח)Yahweh hais rau Mauxes tias, leejtwg tsim tibneeg lub qhov ncauj? Leejtwg ua rau tibneeg hais tsis tau lus, thiab ua rau lag ntseg, thiab ua rau pom kev, thiab ua rau dig muag? Kuv uas yog (יחוח)Yahweh ua los tsis yog?

12 Yog li no cia li mus, kuv yuav nyob ntawm koj qhov ncauj thiab kuv yuav qhia los rau koj hais.

13 Tiamsis Mauxes hais tias, Au Tus Tswv, thov txib dua lwm tus mus lauj!

14 Mas (יחוח)Yahweh npau taws rau Mauxes thiab hais tias, koj tus tijlaug uas yog xeem Levis nev? Kuv paub tias nws txawj hais lus. Saib maj, nws tab tom taug kev tuaj ntsib koj. Thaum nws pom koj nws yuav zoo siab heev.

15 Koj yuav piav rau nws, muab lus rau nws hais. Kuv yuav nyob ntawm koj qhov ncauj thiab ntawm nws qhov ncauj, thiab kuv yuav qhia rau neb ob leeg paub tias yuav ua li cas.

16 Nws yuav nyob koj chaw hais rau cov pejxeem, nws yuav ua koj lub qhov ncauj thiab koj yuav ua zoo li (יחוח)Yahweh rau nws.

17 Koj yuav tuav rawv tus pas nrig no siv ua txujci tseem ceeb.

​

Mauxes Rov Mus Iziv Tebchaws.

18 Mauxes thiaj rov mus cuag nws yawm txiv Yethoos thiab hais tias, thov cia kuv rov qab mus saib kuv cov kwvtij hauv Iziv tebchaws saib lawv tseem muaj txojsia nyob los tsis muaj. Yethoos hais rau Mauxes tias, cia li mus zoo nawj.

19 (יחוח)Yahweh hais rau Mauxes hauv Midees tebchaws tias, cia li rov mus nram Iziv tebchaws, rau qhov cov tibneeg uas nrhiav txov koj txojsia sawvdaws twb tuag tag lawm.

20 Mauxes thiaj muab nws pojniam thiab cov tub caij nees luav rov qab mus nram Iziv tebchaws. Mauxes tuav rawv (יחוח)Yahweh tus pas nrig hauv nws txhais tes mus thiab.

21 (יחוח)Yahweh hais rau Mauxes tias, thaum koj rov mus txog Iziv tebchaws, koj cia li ua tib zoo ua tej txujci tseem ceeb huvsi uas kuv muab cob rau koj lawm tab meeg Falaus. Tiamsis kuv yuav ua rau Falaus lub siab tawv, nws yuav tsis kheev tso kuv cov tibneeg mus.

22 Thiab koj yuav hais rau Falaus tias, (יחוח)Yahweh hais li no tias, Ixayees yog kuv tus tub hlob.

23 Kuv hais rau koj tias, cia li tso kuv tus tub mus xwv nws thiaj tau kev pe hawm kuv. Tiamsis koj tsis yeem tso nws mus, kuv thiaj yuav muab koj tus tub hlob tua pov tseg.

24 Thaum Mauxes lawv so ntawm ib tog kev, (יחוח)Yahweh los ntsib Mauxes yuav muab nws tua pov tseg.

25 Mas Xipaulas muab zeb hauvswm los hlais nws tus tub daim tawv noov mas coj mus tib txhuam Mauxes txhais kotaw, thiab hais tias, koj yog tus nraug vauv ntshav rau kuv tiag tiag li lawm.

26 Mas (יחוח)Yahweh thiaj tsis tua nws. Tus pojniam tau hais tias, koj yog tus nraug vauv ntshav yog tim qhov uas ua kevcai txiav.

27 (יחוח)Yahweh hais rau Aloos tias, cia li mus ntsib Mauxes tom tebchaws moj sab qhua. Aloos txawm mus mas ntsib Mauxes ntawm (יחוח)Yahweh lub roob thiab nwj nws.

28 Mauxes thiaj piav tej lus uas (יחוח)Yahweh hais thiab txib nws mus huvsi rau Aloos mloog thiab hais txog tej txujci tseem ceeb huvsi uas (יחוח)Yahweh kom nws ua. 

29 Mauxes thiab Aloos txawm mus hu Ixayees cov kev txwj laug sawvdaws tuaj sablaj ua ke. 

30 Aloos thiaj hais tej lus uas (יחוח)Yahweh tau hais rau Mauxes lawm huvsi rau cov pejxeem mloog, thiab Mauxes ua tej txujci tseem ceeb tab meeg rau lawv saib.

31 Cov pejxeem kuj ntseeg. Thaum lawv hnov tias (יחוח)Yahweh los saib cov Ixayees thiab pom lawv tej kev txom nyem lwj siab lawm, lawv kuj nyo hau pe hawm (יחוח)Yahweh.