(יחוח)Yahweh Hu Mauxes

1 Mauxes yug nws yawm txiv Yethoos uas yog cov Midees tus pov thawj tej yaj tej tshis. Nws coj nws tej yaj, tej tshis mus rau tebchaws moj sab qhua sab hnub poob mus txog lub roob Haules, uas yog (יחוח)Yahweh lub roob.

2 (יחוח)Yahweh tus tubtxib saum ntuj los tshwm hauv cov nplaim taws uas cig hauv ib tsob ntoo rau Mauxes pom. Mauxes saib mas pom tsob ntoo cig liab ploog tiamsis tsis kub nyhiab li.

3 Mauxes thiaj hais tias, kuv yuav mus saib yam uas txawv txawv no saib

yog ua cas tsob ntoo tsis kub nyhiab li.

4 Thaum (יחוח)Yahweh pom nws txav los saib, (יחוח)Yahweh txawm hu hauv tsob ntoo tuaj tias, Mauxes, Mauxes es. Mauxes teb tias, kuv nyob ntawm no os.

5 (יחוח)Yahweh thiaj hais tias, tsis txhob txav los ze. Hle koj nkawm khau tseg, vim tias qhov chaw uas koj sawv no yog lub chaw dawb huv.

6 Thiab (יחוח)Yahweh hais rau nws tias, kuv yog (יחוח)Yahweh, uas yog Anplaham, Ixaj, thiab Yakhauj lawv Tus Tswv. Mauxes pos nkaus ntsej muag, vim yog nws ntshai tsis kav saib (יחוח)Yahweh.

7 (יחוח)Yahweh txawm hais tias, kuv twb pom kuv haiv neeg uas nyob hauv Iziv tebchaws txojkev txom nyem lwj siab lawm, thiab twb hnov lawv lub suab quaj lawm, vim yog raug cov uas saib xyuas lawv quab yuam ua haujlwm nyhav. Kuv paub lawv tej kev txom nyem.

8 Kuv nqis los yuav cawm lawv dim hauv cov Iziv txhais tes thiab coj lawv tawm hauv lub tebchaws ntawd mus rau lub tebchaws uas zoo thiab dav, yog lub tebchaws uas muaj kua mis thiab zib ntab ntws nto, yog mus rau lub chaw uas cov Khana‑as, cov Hithais, cov Amaulais, cov Pelixais, cov Hivais thiab cov Yenpus nyob.

9 Nimno cov Ixayees lub suab quaj tuaj txog kuv lawm, thiab kuv twb pom qhov uas cov Iziv quab yuam lawv lawm.

10 Mas nimno kuv yuav txib koj mus cuag Falaus xwv koj thiaj coj tau kuv haiv neeg uas yog Ixayees cov tub ki tawm hauv Iziv tebchaws mus.

11 Tiamsis Mauxes hais rau (יחוח)Yahweh tias, kuv yog leejtwg es yuav mus cuag tau Falaus thiab coj cov Ixayees tawm hauv Iziv tebchaws mus?

12 (יחוח)Yahweh hais tias, kuv yuav nrog nraim koj. No yog tus txujci tseem ceeb uas qhia rau koj paub tias kuv txib koj mus, yog thaum koj coj cov pejxeem tawm hauv Iziv tebchaws mus lawm, nej yuav los pe hawm

(יחוח)Yahweh saum lub roob no.

13 Tiamsis Mauxes hais rau (יחוח)Yahweh tias, yog kuv mus cuag cov Ixayees thiab hais rau lawv tias, nej tej poj koob yawm txwv Tus Tswv txib kuv los cuag nej, thiab lawv nug kuv tias, nws lub npe hu li cas? Mas kuv yuav teb lawv li cas?

14 (יחוח)Yahweh hais rau Mauxes tias, KUV YEEJ YOG KUV. Thiab nws hais rau Mauxes tias, cia li hais rau cov Ixayees tias, KUV YOG, yog tus uas txib kuv los cuag nej.

15 (יחוח)Yahweh hais dua rau Mauxes tias, koj cia li hais rau cov Ixayees li no tias, (יחוח)Yahweh uas yog nej tej poj koob yawm txwv Tus Tswv, yog Anplaham, Ixaj, thiab Yakhauj lawv Tus Tswv, txib kuv los cuag nej. No yog kuv lub npe mus ib txhis, mas txhua tiam tibneeg cia li nco hu li no mus.

16 Koj cia li mus hu Ixayees cov kev txwj laug tuaj sablaj ua ke, thiab hais rau lawv tias, (יחוח)Yahweh uas yog nej tej poj koob yawm txwv Tus Tswv, yog Anplaham, Ixaj, thiab Yakhauj lawv Tus Tswv, tau tshwm rau kuv pom thiab hais tias, kuv saib ntsoov nej thiab pom tej uas nej raug hauv Iziv tebchaws lawm.

17 Kuv cog lus tseg tias kuv yuav coj nej tawm hauv Iziv tebchaws uas nej raug kev txom nyem lwj siab mus rau hauv cov Khana‑as, cov Hithais, cov Amaulais, cov Pelixais, cov Hivais, thiab cov Yenpus lub tebchaws uas muaj kua mis thiab zib ntab ntws nto.

18 Lawv yuav mloog koj tej lus, mas koj thiab Ixayees cov kev txwj laug yuav mus cuag vajntxwv Iziv thiab hais rau nws tias, (יחוח)Yahweh uas yog cov Hinplus Tus Tswv tau ntsib peb, mas nimno peb thov koj tso peb mus hauv tebchaws moj sab qhua peb hnub ke kom peb thiaj tau mus xyeem tsiaj rau (יחוח)Yahweh uas yog peb Tus Tswv.

19 Kuv yeej paub tias vajntxwv Iziv yuav tsis kheev nej mus yog nws tsis raug tus uas muaj hwjchim txhais tes yuam nws.

20 Kuv yuav tsa kuv txhais tes ua txhua yam txujci tseem ceeb tshwm los ntaus Iziv tebchaws. Dhau ntawd, Falaus yuav tso nej mus.

21 Kuv yuav ua kom cov Iziv hlub kuv haiv neeg no mas thaum nej tawm mus, nej yuav tsis mus tes dawb tes npliag.  

22 Txhua tus pojniam yuav thov npauj nyiag, npauj kub, thiab tej tsoos tsho ntawm cov Iziv uas nrog lawv nyob ua ib zog thiab ntawm tej pojniam uas nrog lawv nyob ua ib tse, coj tej no mus rau nej tej tub tej ntxhais hnav. Ua li no nej thiaj lwg tau cov Iziv tej qhov txhia chaw.