Yug Mauxes

1 Muaj ib tug tub xeem Levis, nws yuav ib tug ntxhais xeem Levis ua pojniam.

2 Tus pojniam ntawd xeeb tub thiab yug tau ib tug tub. Thaum nws pom tias tus tub zoo nraug heev, nws thiaj muab zais tau peb lub hlis.

3 Thaum nws muab zais tsis tau ntxiv lawm, nws thiaj muab ib lub tawb tauj deg luam roj av thiab roj ntoo. Nws muab tus menyuam tso rau hauv tawb coj mus tso rau hauv nruab nrab cov pias iav ntawm ntug dej.

4 Mas tus muam hlob sawv deb tsawv saib thiaj paub tias yuav muaj li cas tshwm rau nws.

5 Mas Falaus tus ntxhais nqis mus da dej thiab nws cov nkauj qhe mus ua si ntawm ntug dej. Falaus tus ntxhais pom lub tawb nyob hauv plawv cov pias iav thiaj txib nws tus nkauj qhe mus muab lub tawb los.

6 Thaum nws qheb lub tawb saib mas nws pom ib tug menyuam, ua ciav tus menyuam tab tom quaj. Ces nws txawm hlub tus me nyuam ntawd thiab hais tias, no yog cov tibneeg Hinplus li menyuam.

7 Tus menyuam ntawd tus muam thiaj li hais rau Falaus tus ntxhais tias, koj puas xav cia kuv mus hu ib tug pojniam hauv cov tibneeg Hinplus tuaj tu tus menyuam no rau koj?

8 Falaus tus ntxhais thiaj hais tias, cia li mus. Tus muam ntawd thiaj li mus hu tus menyuam ntawd leej niam tuaj.

9 Mas Falaus tus ntxhais thiaj hais rau tus pojniam ntawd tias, koj coj tus menyuam no mus tu rau kuv, mas kuv yuav muab nqi zog rau koj. Tus pojniam ntawd txawm coj tus menyuam mus tu lawm.

10 Thaum tus me nyuam hlob lawd, nws thiaj coj tus menyuam tuaj rau Falaus tus ntxhais, mas tus menyuam ntawd ua Falaus tus ntxhais tus tub. Nws muab tis npe hu ua Mauxes, rau qhov nws hais tias, vim yog kuv rho nws tawm hauv dej los.

​

Mauxes Khiav Mus Pem Midees Tebchaws

11 Thaum Mauxes hlob lawm, muaj ib hnub, Mauxes mus saib nws haiv neeg mas pom lawv ua haujlwm nyhav heev. Nws pom ib tug Iziv tab tom muab ib tug Hinplus ntaus, yog nws haiv neeg ntag.

12 Nws saib ib ncig mas tsis pom leejtwg, nws thiaj muab tus Iziv ntawd tua kiag thiab muab zais rau hauv cov xuab zeb.

13 Hnub tom qab, thaum Mauxes tawm mus, kuj pom ob tug Hinplus sib ntaus thiab, nws thiaj hais rau tus uas ua txhaum tias, ua cas koj ntaus koj haiv neeg.

14 Nws teb tias, leejtwg tsa koj ua thawj kav peb thiab ua tus uas txiav txim rau peb? Koj npaj siab yuav tua kuv ib yam li koj tua tus Iziv thiab lov? Mauxes txawm ntshai xav tias, tej ntawd twb ncha mus thoob lawm lauj.

15 Thaum Falaus hnov txog tej ntawd, nws nrhiav kev muab Mauxes tua pov tseg. Tiam sis Mauxes khiav ntawm Falaus mus nyob rau hauv Midees tebchaws lawm. Nws mus zaum ntawm ib lub qhov dej.

16 Cov Midees tus pov thawj muaj xya leej ntxhais. Cov ntxhais ntawd tuaj ntaus dej hliv rau hauv lub tais, rau leej txiv tej yaj, tej tshis haus.

17 Ces txawm muaj ib co txivneej yug yaj yug tshis los ntiab cov ntxhais ntawd kom khiav mus. Mas Mauxes sawv tsees pab cov ntxhais thiab ntaus dej rau lawv tej yaj, tej tshis haus.

18 Thaum lawv rov mus txog Le-u‑ees uas yog lawv txiv, mas leej txiv nug tias, ua cas hnub no nej los tau ntxov?

19 Lawv teb tias, muaj ib tug tibneeg Iziv pab peb dim hauv cov tibneeg yug yaj txhais tes thiab tseem ntaus dej rau peb tej yaj, tej tshis haus.

20 Leejtxiv hais rau lawv tias, tus yawg ntawd nyob qhov twg? Ua cas nej muab nws tso tseg? Cia li mus hu nws los noj mov maj.

21 Mauxes kuj txaus siab nrog nws nyob, mas Le‑u‑ees muab tus ntxhais Xipaulas qua rau Mauxes. 

22 Xipaulas yug tau ib tug tub mas Mauxes muab tis npe hu ua Kawsoos, rau qhov nws hais tias, kuv yog ib tug uas ua qhua nyob rau hauv luag tebchaws. 

23 Dhau ntau xyoo los rau yav tom qab, vajntxwv Iziv tuag lawm. Cov Ixayees quaj ntsaj laws hauv txojkev ua qhev, thiaj li quaj hu thov kev pab.  Lawv lub suab quaj uas raug ua qhev no thiaj nrov mus txog (יחוח)Yahweh.

24 (יחוח)Yahweh hnov lawv lub suab quaj ntsaj, thiab nws nco txog tej lus uas nws cog tseg rau Anplaham, Ixaj thiab Yakhauj.

25 (יחוח)Yahweh saib ntsoov cov Ixayees thiab paub lawv lub neej zoo li cas.