Cov Ixayees Raug Kev Tsim Txom Hauv Iziv Tebchaws

1 Ntawm no mus yog Ixayees cov tub tej npe uas nyias coj nyias tsev neeg nrog Yakhauj mus nyob tim Iziv tebchaws.

2 Yog Lunpees, Xime‑oos, Levis, thiab Yahdah,

3 Ixakhas, Xenpuloos, thiab Npeeyamees, 

4 Daj, Nathalis, Nkas, thiab Asaws. 

5 Yakhauj cov tub ki huvsi muaj xya caum leej. Yahxej ces yeej nyob hauv Iziv tebchaws lawm. 

6 Los rau tom qab Yahxej thiab nws cov kwvtij sawvdaws thiab tej tibneeg uas nyob tiam ntawd, puavleej tuag tag lawm.  

7 Ixayees caj ces muaj tub ki coob thiab huaj vam coob heev. Lawv huaj vam coob thiab muaj zog heev nyob mus puv nkaus lub tebchaws.

8 Muaj ib tug vajntxwv tshiab uas tsis paub Yahxej, sawv los kav Iziv tebchaws.

9 Vajntxwv hais rau nws cov pejxeem tias, saib maj, cov tibneeg Ixayees coob dhau thiab muaj zog tshaj peb hwv lawm.

10 Peb cia li ntaus tswvyim txov cov tibneeg no, tsam ces lawv huaj vam coob thiab yog muaj kev ua rog, lawv yuav tuaj yeeb ncuab tog ua rog rau peb thiab khiav dim hauv lub tebchaws mus.

11 Yog li no, lawv thiaj tsa ib co nom tswv los saib xyuas quab yuam cov Ixayees ua haujlwm nyhav. Cov Ixayees thiaj ua tej moos uas khaws qhov txhia chaw cia rau Falaus, yog lub moos Pithoos thiab lub moos Lamexes.

12 Lawv yim raug quab yuam heev, mas lawv yimhuab huaj vam coob nyob nthuav dav zuj zus. Cov Iziv thiaj ntshai cov Ixayees heev.

13 Lawv thiaj ua nruj ua tsiv yuam cov Ixayees ua haujlwm khwv.

14 Lawv ua rau cov Ixayees lwj siab kawg, vim tej haujlwm khwv heev, yog ua hmoov zeb sib thiab thwv cib, thiab ua txhua yam haujlwm hauv tej liaj teb. Txhua yam uas cov Ixayees ua mas cov Iziv ua nruj ua tsiv thiab yuam kom lawv ua haujlwm khwv heev.  

15 Iziv tus vajntxwv hais rau ob tug pojniam uas pab cov Hinplus yug menyuam, ib tug hu ua Sifas ib tug hu ua Pu‑as hais tias,

16 thaum neb mus pab cov Hinplus tej pojniam yug menyuam, thiab pom lawv zaum saum txaj yug menyuam, yog yug tau tub ces muab tua pov tseg, yog yug tau ntxhais ces li tseg cia nyob.

17 Tiamsis ob tug pojniam uas pab yug menyuam ntawd paub ntshai (יחוח)Yahweh thiaj tsis ua raws li vajntxwv Iziv hais, cov tub los kuj cia dim txojsia.

18 Vajntxwv Iziv thiaj hu ob tug pojniam ntawd tuaj thiab hais tias, ua cas neb ua li no es tseem cia cov tub ciaj sia nyob thiab?

19 Ob tug pojniam ntawd teb Falaus tias, vim yog cov pojniam Hinplus tsis thooj li cov pojniam Iziv, lawv muaj muaj zog, tus uas pab tsis tau mus txog, twb yug tau lawm.

20 (יחוח)Yahweh ua zoo rau ob tug pojniam uas pab yug menyuam ntawd. Cov Ixayees thiaj li huaj vam coob thiab muaj zog heev.

21 Vim ob tug pojniam uas pab yug me nyuam paub ntshai (יחוח)Yahweh, mas (יחוח)Yahweh thiaj pub ob tug muaj me nyuam.

22 Falaus thiaj hais rau nws cov pejxeem sawvdaws tias, txhua tus tub uas cov Hinplus yug, nej cia li muab laim pov tseg rau hauv tus dej Nais, tseg txhua tus ntxhais ciaj sia nyob xwb.