1 Yahxej puag nkaus nws txiv xubntiag quaj thiab nwj nws.

2 Yahxej hais rau cov kws tshuaj uas yog nws cov tub teg tub taws, kom muab tshuaj pleev thiab tsau nws txiv lub cev. Cov kws tshuaj kuj ua li ntawd rau Ixayees lub cev tuag.

3 Lawv ua tau plaub caug hnub, vim qhov uas pleev thiab tsau tshuaj rau lub cev tuag siv sijhawm plaub caug hnub. Cov Iziv kuj quaj ntsuag Ixayees tau xya caum hnub.

4 Thaum dhau lub sij hawm quaj ntsuag lawm, Yahxej hais rau Falaus cov tub teg tub taws tias, yog nej txaus siab rau kuv, thov pab mus hais rau Falaus li no,

5 Kuv txiv kom kuv cog lus twv cia hais tias, kuv twb yuav tuag, koj cia li coj kuv mus faus rau hauv kuv lub qhov ntxa uas kuv khawb rau hauv Khana‑as tebchaws. Yog li no, thov koj tso kev rau kuv mus faus kuv txiv, kuv li rov los.

6 Falaus teb tias, cia li coj koj txiv mus faus raws li nws kom koj cog lus twv tseg lawm.

7 Yahxej thiaj coj nws txiv mus faus, Falaus cov tub teg tub taws huvsi, yog cov kev txwj laus hauv Falaus lub tsev thiab cov kev txwj laus hauv Iziv tebchaws sawvdaws nrog nws mus.

8 Thiab Yahxej tsev neeg huvsi thiab nws cov kwvtij, thiab nws txiv tsev neeg sawvdaws mus thiab, tseg lawv tej menyuam thiab tej yaj, tej tshis, tej nyuj, nyob hauv Kausees.

9 Thiab muaj tej tsheb ua rog thiab muaj cov uas caij nees nrog nws mus ua ib pab coob heev kawg li.

10 Thaum lawv mus txog lub tshav ntaus qoob ntawm Athas uas nyob ntawm tus dej Yaladees sab hnub tuaj, lawv quaj quaj ntsuag lwj siab ntsuav qhov ntawd. Yahxej ua kevcai pam leej txiv qhov ntawd xya hnub.

11 Thaum cov tibneeg Khana‑as uas nyob hauv lub tebchaws ntawd pom qhov uas pam tuag hauv lub tshav ntaus qoob ntawm Athas, lawv sib tham hais tias, no yog cov Iziv li kev pam tuag lwj siab heev. Vim li ntawd, lawv thiaj hu qhov chaw ntawd ua Anpees Mila‑is, yog nyob ntawm tus dej Yaladees sab hnub tuaj.

12 Yakhauj cov tub pam leej txiv raws li nws tau hais rau lawv.

13 Nws cov tub coj nws mus rau Khana‑as tebchaws, muab faus rau hauv lub qhov tsua ntawm daim teb hauv Mapelas uas nyob ntawm Males sab hnub tuaj. Lub qhov tsua thiab daim teb no Anplaham yuav ntawm Efoos uas yog tib­neeg Hithais los ua nws tug cia ua toj ntxas.

14 Thaum muab leej txiv faus tag lawm, Yahxej thiab nws cov kwvtij thiab txhua tus uas nrog nws mus faus leej txiv sawvdaws rov los rau Iziv tebchaws.

​

Yahxej Hais Kom Nws Cov Kwvtij Txhob Ntshai 

15 Thaum Yahxej cov tijlaug pom tias leej txiv tuag lawm, lawv txawm sib tham hais tias, ntshai Yahxej yuav ntxub peb thiab yuav ua pauj txhua yam uas peb ua phem rau nws lawm.

16 Lawv thiaj li txib tibneeg mus hais rau Yahxej tias, thaum koj txiv tsis tau tuag, nws hais cia li no tias,

17 Nej cia li hais rau Yahxej tias, kuv thov kom koj zam koj cov tijlaug tej kev txhaum txim uas lawv ua phem rau koj.  Mas nimno peb thov koj zam peb uas yog koj txiv Tus Tswv (יחוח)Yahweh cov tub qhe tej kev txhaum. Thaum Yahxej hnov cov tijlaug tej lus no, nws quaj quaj.

18 Nws cov tijlaug thiaj ua ke tuaj khwb nkaus pe Yahxej hais tias, peb yog koj cov tub qhe lauj!

19 Yahxej thiaj hais rau lawv tias, nej tsis txhob ntshai li, kuv nim yog (יחוח)Yahweh lov?  

20 Nej xav ua phem rau kuv tiag, tiamsis (יחוח)Yahweh muab ua kom tau qhov zoo los cawm tau tibneeg coob coob txojsia, yam li uas niaj hnub nimno cawm tau lawm.  

21 Yog li no, nej tsis txhob ntshai li, kuv yuav yug nej thiab nej cov menyuam. Yahxej hais tej lus no nplij lawv lub siab thiaj li ua rau lawv sov siab lawm.  

​

Yahxej Tuag

22 Yahxej thiab nws txiv tsev neeg nyob hauv Iziv tebchaws. Yahxej hnub nyoog muaj ib puas kaum xyoo.

23 Yahxej kuj pom Efa‑is cov tub thiab xeeb leej xeeb ntxwv. Manaxes tus tub Makhis kuj yug menyuam rau saum Yahxej hauv caug.

24 Yahxej hais rau nws cov kwvtij tias, kuv twb yuav tuag, tiamsis (יחוח)Yahweh yuav los saib nej thiab yuav coj nej tawm hauv lub tebchaws no mus rau lub tebchaws uas (יחוח)Yahweh cog lus rau Anplaham, Ixaj thiab Yakhauj.

25 Yahxej kom Ixayees cov tub cog lus twv tseg hais tias, thaum (יחוח)Yahweh los saib nej, nej yuav coj kuv cov pob txha nrog nej tawm hauv lub tebchaws no mus.

26 Yahxej tuag thaum nws hnub nyoog muaj ib puas kaum xyoo. Lawv muab tshuaj pleev thiab tsau nws lub cev tuag, tso rau hauv hleb khaws cia rau hauv Iziv tebchaws.