Yakhauj Foom Koob Hmoov  Rau Nws Cov Tub

1 Yakhauj hu nws cov tub los mas hais tias, nej cia li los txoos ua ke, kuv yuav hais tej uas yav tom hauv ntej yuav

tshwm los rau nej.

2 Yakhauj cov tub es, cia li los ua ke mloog, cia li tig ntsej mloog nej txiv Ixayees tej lus.

3 Lunpees, koj yog kuv tus tub hlob, thiab yog kuv lub zog, thiab yog thawj yam ntawm kuv lub zog. Koj lub koob meej ncha dua lawv thiab koj lub zog loj dua lawv.

4 Koj siab tsis ruaj khov yam nkaus li dej ntas, koj yuav tsis tau ua thawj, vim koj nkag mus rau hauv koj txiv lub txaj pw. Koj ua rau lub txaj ntawd qias tsis huv, koj nkag mus rau hauv kuv lub txaj pw.

5 Xime‑oos thiab Levis yog ob tug kwvtij. Nkawv rab ntaj yog cuab yeej ua nruj ua tsiv.

6 Kuv tus ntsuj plig es, tsis txhob nkag mus rau hauv nkawv lub chaw sablaj. Kuv lub siab es, tsis txhob mus nrog nkawv cov tibneeg koom. Vim yog nkawv chim ces txawm cia li tua tibneeg, thiab nkawv txiav leeg raws nyuj raws li nkawv lub siab.

7 Thov cia nkawv txojkev chim raug foom tsis zoo, vim yog nkawv ua nruj ua tsiv. Cia nkawv txojkev npau taws raug foom tsis zoo, vim yog nkawv nyaum heev. Kuv yuav muab nkawv cais tsis pub ua ke rau hauv Yakhauj, thiab ua rau nkawv tawg ua sab ua sua rau hauv Ixayees.

8 Yahdah, koj cov kwv-tij yuav qhuas koj, koj txhais tes yuav nias koj cov yeeb ncuab caj qwb, koj txiv cov tub yuav khoov ntshis pe koj.

9 Yahdah yog menyuam tsov ntxhuav. Tub, koj tawm ntawm tus qauv mus lawm. Nws yuav pliab lua pw khwb rwg yam li txiv tsov ntxhuav thiab zoo li maum tsov ntxhuav. Leejtwg yuav muaj cuab kav zes nws sawv?

10 Tus cwj yuav tsis tu ncua ntawm Yahdah, tus thawj kav tus pas nrig, yuav tsis ploj ntawm nws kotaw mus li, mus txog thaum tus uas muaj feem los txog, thiab

ib tsoom tibneeg yuav mloog tus ntawd hais.

11 Nws yuav muab nws tus nees luav khi rau ntawm tsob txiv hmab, thiab muab tus menyuam nees luav khi rau ntawm tsob txiv hmab uas zoo heev. Nws muab cawv txiv hmab ntxhua nws tej ris tsho, thiab muab kua txiv hmab uas liab ploog li ntshav, ntxhua nws tsoos tsho.

12 Nws lub qhov muag liab khiav rau cawv txiv hmab, nws kaus hniav dawb paug li kua mis.

13 Xenpuloos yuav nyob ntawm ntug hiavtxwv, nws yuav ua chaw nres nkoj, nws li ciam teb yuav npuas lub moos Xidoos.

14 Ixakhas yog tus nees luav uas muaj zog heev, nws pliab lua cug nws lub nra.

15 Nws pom tias lub chaw so zoo, thiab lub tebchaws txaus siab, ces txawm cug xub pwg kwv, thiab yeem raug luag yuam ua qhev.

16 Daj yuav ua ib tug tu plaub rau nws haiv neeg, yog ib xeem hauv cov Ixayees.

17 Daj yuav zoo li ib tug nab uas nyob ntawm ntug kev, yog ib tug nab muaj taug ntawm ntug kev uas tom nees luj taws ua rau tus uas caij poob ntxeev kiag.

18 Au (יחוח)Yahweh, kuv tos ntsoov koj txojkev cawm dim.

19 Kas yuav muaj tib­neeg lws nws, tiamsis nws rov caum qab mus lws tau lawv.

20 Asaws yuav muaj qoob loo nplua mias, nws yuav ua tej zaub mov uas vajntxwv noj.

21 Nathalis yog ib tug maum mos lwj uas khiav ywj siab ywj ntsws, nws yug tau menyuam mos lwj zoo nkauj.

22 Yahxej yog ib tug ceg uas txi txiv ncw, yog tus ceg txi txiv uas nyob ntawm qhov dej txhawv, nws tej ceg nthuav mus hla ntsa loog.

23 Cov tub rog tua hneev, tua nws ua nruj ua tsiv, lawv tua hneev thiab ua nyaum kawg li rau nws.

24 Tiamsis nws rab hneev tseem khov kho, thiab nws txhais npab tseem muaj zog, vim yog muaj Yakhauj Tus Tswv (יחוח)Yahweh uas muaj hwjchim txhais tes, thiab vim muaj tus yug yaj uas yog Ixayees lub Txhib Zeb lub npe.

25 Thiab vim muaj koj txiv Tus Tswv uas yuav pab koj, yog (יחוח)Yahweh tus muaj hwjchim loj kawg nkaus uas yuav foom koob hmoov rau koj, yog tej hmoov uas los saum ntuj los thiab tej hmoov uas los hauv nruab tiv txwv, thiab tej hmoov uas los ntawm cov kua mis thiab lub plab me­nyuam.

26 Tej hmoov uas los ntawm koj txiv los mas loj dua tej hmoov uas los ntawm tej roob uas nyob ib txhis, thiab loj dua tej uas zoo nplua mias saum tej pov roob uas nyob mus ib txhis. Thov tej hmoov no los rau saum Yahxej lub taubhau thiab los rau saum tus uas raug ncaim cov kwvtij lub hauv pliaj.

27 Npeeyamees yog ib tug hma nyaum raws nqaij, thaum sawv ntxov, nws noj tej uas tom tau lawm, thaum tsaus ntuj, nws muab tej uas txeeb tau faib.

28 Cov no yog Ixayees kaum ob xeem. Tej lus no yog tej uas leej txiv hais rau lawv rau thaum foom koob hmoov rau lawv. Nws foom koob hmoov rau txhua tus raws li tsim nyog txhua tus tau.

​

 Yakhauj Tuag Thiab Muab Faus

29 Yakhauj nkaw lus rau lawv tias, kuv yuav mus nrog kuv tej poj koob yawm txwv nyob, cia muab kuv faus ua ke nrog kuv tej poj koob yawm txwv rau hauv lub qhov tsua uas nyob ntawm Efoos uas yog tibneeg Hithais daim teb.

30 Yog lub qhov tsua uas nyob hauv daim teb ntawm Mapelas uas nyob Males sab hnub tuaj hauv Khana‑as tebchaws. Lub qhov tsua thiab daim teb no Anplaham yuav ntawm Efoos uas yog tibneeg Hithais los ua nws tug cia ua toj ntxas.

31 Qhov chaw ntawd lawv twb faus Anplaham thiab Xalas uas yog nws tus pojniam thiab lawv faus Ixaj thiab Lenpekhas uas yog nws tus pojniam. Thiab tib qhov chaw ntawd kuv kuj faus Le‑as.

32 Daim teb thiab lub qhov tsua uas nyob hauv daim teb ntawd, peb yuav ntawm cov tibneeg Hithais.

33 Thaum Yakhauj hais rau nws cov tub tag lawm, nws txawm nqa kiag nws txhais kotaw rau saum lub txaj ces tu siav nrho, mus nrog nws tej poj koob yawm txwv nyob.