Yakhauj Foom Koob Hmoov Rau Efa‑is Thiab Manaxes

1 Dhau ntawd los, muaj tibneeg hais rau Yahxej tias, koj txiv muaj mob. Yahxej txawm coj nws ob tug tub, yog Manaxes thiab Efa‑is nrog nws mus.

2 Muaj tibneeg hais rau Yakhauj tias, koj tus tub Yahxej tuaj saib koj. Ixayees thiaj siv zog sawv zaum saum txaj.

3 Yakhauj thiaj hais rau Yahxej tias, (יחוח)Yahweh uas muaj hwjchim loj kawg nkaus tau tshwm rau kuv pom ntawm lub moos Lus hauv Khana‑as tebchaws thiab foom koob hmoov rau kuv.

4 Thiab hais rau kuv tias, kuv yuav ua rau koj muaj tub ki huaj vam coob coob, thiab kuv yuav ua rau koj ua ntau haiv neeg thiab yuav muab lub teb­chaws no rau koj caj ces ua lawv tug mus ib txhis.

5 Koj ob tug menyuam uas koj yug hauv Iziv tebchaws ua ntej uas kuv tsis tau los txog koj hauv Iziv tebchaws no kuj yog kuv li thiab. Efa‑is thiab Manaxes yuav ua kuv menyuam, ib yam li Lunpees thiab Xime‑oos.

6 Hos cov yau uas koj yug tom qab thiaj yog koj cov menyuam. Lawv yuav raug hu raws ob tug tijlaug lub xeem thiaj tau qub txeeg qub teg ntawm ob tug.

7 Thaum kuv tawm ntawm Padas los, mas kuv nyuaj siab kawg rau qhov uas Lachees tuag rau thaum taug kev hauv Khana‑as tebchaws rau ntawm lub chaw uas los yuav txog Efathas. Mas kuv muab nws faus rau ntawm ntug kev uas mus rau Efathas, uas yog Npelehees.

8 Thaum Ixayees pom Yahxej ob tug tub nws thiaj hais tias, no yog leejtwg?

9 Yahxej teb nws tias, no yog kuv ob tug tub uas (יחוח)Yahweh pub rau kuv hauv lub teb­chaws no. Ixayees thiaj hais tias, thov koj coj nkawv los es kuv yuav foom koob hmoov rau nkawv.

10 Ixayees qhov muag pom kev tsis tseeb lawm, vim nws laus heev, saib abtsi los tsis tshua pom. Yahxej thiaj coj nkawv txav los ze Ixayees, mas nws nwj thiab puag nkawv.

11 Ixayees hais rau Yahxej tias, kuv xav tias kuv yuav tsis pom koj lub ntsej muag li lawm. Tiamsis (יחוח)Yahweh tseem pub kuv pom koj cov menyuam thiab.

12 Yahxej tsaws menyuam ntawm Ixayees hauv caug los thiab pe ua lub plhu ti nkaus av. 

13 Yahxej tuav ob tug tub tes mus ti nkaus leej txiv, nws sab tes xis tuav rawv Efa‑is mus rau Ixayees sab tes laug, nws sab tes laug tuav rawv Manaxes mus rau Ixayees sab tes xis.

14 Tiamsis Ixayees xyab sab tes xis mus tso rau saum Efa‑is uas yog tus yau lub taub­hau, thiab nws muab nws sab tes laug tso rau saum Manaxes taubhau, txawm yog Manaxes yog tus hlob los nws xyab tes sib rig li no.  

15 Mas Ixayees foom koob hmoov rau Yahxej tias, thov (יחוח)Yahweh uas kuv yawg Anplaham, thiab kuv txiv Ixaj hwm, thiab yog Tus Tswv uas coj kuv txoj hauv kev ib sim neej los txog niaj hnub nimno. Yog tus tubtxib uas pab kuv dim hauv txhua yam kev phem, thov Tus Tswv (יחוח)Yahweh ntawd foom koob hmoov rau ob tug tub no.

16 Thov cia kuv lub npe, thiab kuv yawg Anplaham, thiab kuv txiv Ixaj lub npe, muaj nyob rau hauv lawv mus ib txhis. Thov cia nkawv huaj vam coob rau hauv lub ntiajteb.

17 Thaum Yahxej pom tias nws txiv muab txhais tes xis tso rau saum Efa‑is taubhau, nws tsis txaus siab, nws txawm ntsiab nkaus leej txiv txhais tes saum Efa‑is taub­hau los tso rau saum Manaxes taubhau.

18 Yahxej hais rau nws txiv tias, txiv, tsis yog ua li kod, tus no thiaj yog tus hlob, cia li muab koj txhais tes xis tso rau saum tus no taubhau.

19 Tiamsis leej txiv tsis kam, nws teb tias, kuv paub lawm. Tub, kuv paub lawm. Nws yuav ua ib haiv neeg thiab yuav ua loj. Txawm li cas los xij, tus kwv yuav ua loj dua tus tijlaug, thiab tus kwv caj ces yuav ua ntau haiv neeg.

20 Hnub ntawd Ixayees thiaj foom koob hmoov rau nkawv hais tias, cov Ixayees yuav tuav neb lub npe foom koob hmoov hais tias, thov (יחוח)Yahweh ua rau nej zoo ib yam li Efa‑is thiab Manaxes. Raws li uas hais no, Ixayees thiaj tsa Efa‑is ua loj dua Manaxes.

21 Ixayees hais rau Yahxej tias, kuv twb yuav tuag, tiamsis (יחוח)Yahweh yuav nrog nraim nej thiab yuav coj nej rov mus rau nej tej poj

koob yawm txwv lub tebchaws.

22 Thiab kuv muab ib thaj teb ntawm toj siab uas kuv xuas ntaj xuas hneev txeeb tau ntawm cov tibneeg Amaulais rau koj xwb, tsis muab rau koj cov kwvtij.