1 Yahxej mus cuag Falaus thiab hais tias, kuv txiv thiab kuv cov kwvtij, thiab lawv tej yaj, tej tshis, tej nyuj, thiab lawv tej cuab txhiaj, cuab tam, huvsi los ntawm Khana‑as tebchaws los. Nimno lawv nyob hauv Kausees.

2 Yahxej xaiv cov kwvtij tsib leeg coj mus cuag Falaus.  

3 Falaus nug Yahxej cov kwvtij tias, nej ib txwm ua haujlwm abtsi? Lawv hais rau Falaus tias, peb uas yog koj cov tub qhe, yog tibneeg yug yaj, yug tshis, ib yam li peb tej poj koob yawm txwv.

4 Lawv hais rau Falaus tias, peb los nyob ib ntus hauv lub tebchaws no los vim yog Khana‑as teb­chaws tshaib nqhis heev tsis muaj tshav zaub rau peb yug tsiaj. Nimno thov koj cia peb uas yog koj cov tub qhe nyob hauv Kausees lauj.

5 Falaus thiaj hais rau Yahxej tias, koj txiv thiab koj cov kwvtij los txog koj lawm.

6 Lub teb­chaws Iziv nyob ntawm koj xubntiag, cia koj txiv thiab koj cov kwvtij nyob ruaj rau thaj teb uas zoo kawg nkaus, cia lawv nyob hauv Kausees. Yog koj paub koj cov kwvtij tus twg muaj peevxwm, mas tsa tus ntawd saib xyuas kuv tej tsiaj txhu thiab.

7 Yahxej coj nws txiv Yakhauj mus cuag Falaus, Yakhauj kuj foom koob hmoov rau Falaus.

8 Falaus hais rau Yakhauj tias, koj hnub nyoog muaj pes tsawg xyoo lawm?

9 Yakhauj teb Falaus tias, kuv ua neej nyob

tsis ruaj chaw hauv lub ntiajteb no tau ib puas peb caug xyoo, kuv txojsia tsis ntev thiab txom txom nyem li, tsis ntev li kuv tej poj koob yawm txwv txojsia uas lawv ua neej nyob tsis ruaj chaw hauv lub ntiajteb no.

10 Yakhauj foom koob hmoov rau Falaus tag ces thiaj tawm ntawm Falaus lub xubntiag mus lawm.

11 Yahxej txawm tu chaw rau nws txiv thiab nws cov kwvtij nyob, thiab muab     

tej teb uas zoo kawg nkaus hauv Iziv tebchaws ntawm lub moos Lamexes ua lawv tug raws li Falaus hais.

12 Yahxej muab zaub mov rau nws txiv thiab nws cov kwvtij thiab nws txiv tsev neeg sawvdaws tau noj raws li txhua yim muaj neeg coob los tsawg.

​

Kev Tshaib Nqhis Loj Heev

13 Thaum ntawd tsis muaj mov noj thoob plaws lub tebchaws, vim kev tshaib nqhis loj heev ua rau Iziv tebchaws thiab Khana‑as tebchaws qhuav nkig nkuav qaug zog tag.

14 Yahxej sau tej nyiaj huvsi hauv Iziv tebchaws thiab Khana‑as tebchaws uas cov pejxeem coj tuaj yuav mog thiab qeb, thiab coj mus cia rau hauv Falaus lub tsev.  

15 Thaum cov Iziv thiab cov Khana‑as tej nyiaj tag lawm, cov Iziv sawvdaws tuaj cuag Yahxej thiab hais tias, thov pub mov rau peb noj lauj. Koj yuav cia peb tuag tshaib rau ntawm koj xubntiag lov? Rau qhov peb tej nyiaj tag lawm.

16 Yahxej thiaj teb tias, yog nej tej nyiaj tag lawm, ces coj nej tej tsiaj txhu tuaj, kuv yuav muab mov pauv nej tej tsiaj.

17 Lawv thiaj coj lawv tej tsiaj txhu tuaj rau Yahxej, mas Yahxej muab mov pauv lawv tej nees, tej yaj, tej tshis, tej nyuj, tej nees luav. Xyoo ntawd, nws muab mov pauv lawv tej tsiaj txhu huvsi.

18 Dhau xyoo ntawd lawm, xyoo tom qab lawv tuaj cuag nws thiab hais tias, peb thov hais tseeb rau koj ua hlob tias, peb tej nyiaj los tag lawm, peb tej niag pab tsiaj txhu los poob ua koj li tag lawm. Tsis tshuav abtsi ntawm koj xubntiag lawm, tsuas yog tshuav peb lub cev thiab peb tej liaj teb xwb.

19 Koj yuav cia peb thiab peb tej liaj teb puam tsuaj rau ntawm koj xubntiag lov? Koj cia li muab mov noj pauv peb thiab peb tej liaj teb, peb thiab peb li liaj teb yuav ua Falaus qhev. Thov muab noob qoob rau peb cog kom peb thiaj ciaj sia nyob tsis tuag thiab tej liaj teb thiaj tsis nyob do cuas cia.

20 Yahxej thiaj yuav tej liaj teb huvsi hauv Iziv rau Falaus. Cov Iziv txhua tus muag lawv tej liaj teb, vim yog kev tshaib nqhis loj heev, tej liaj teb thiaj poob ua Falaus tug.

21 Mas Yahxej thiaj muab Iziv cov pejxeem thoob plaws tebchaws ua qhev. 

22 Tsuas yog tseg cov pov thawj li liaj teb, Yahxej thiaj tsis yuav xwb, rau qhov Falaus npaj lawv li feem rau lawv lawm, lawv thiaj tau noj. Yog li no, lawv thiaj tsis tau muag lawv tej liaj teb.

23 Yahxej hais rau cov pejxeem tias, saib maj, hnub no kuv twb yuav nej thiab nej tej liaj teb rau Falaus lawm. Mas nimno kuv muab noob qoob rau nej coj mus cog rau hauv tej liaj teb.

24 Thaum sau qoob loo lawm, nej yuav muab ib feem hauv tsib pub rau Falaus, muab plaub feem ua nej tug siv ua noob cog rau hauv nej tej liaj teb thiab ua mov rau nej thiab nej tsev neeg thiab nej tej menyuam tau noj.

25 Lawv hais tias, koj cawm tau peb txojsia lawm, thov koj uas yog peb Tus Tswv, hlub peb es peb yuav ua Falaus qhev.

26 Yahxej thiaj rhawv ib txoj kevcai hais txog tej liaj teb hauv Iziv teb­chaws siv los txog niaj hnub nimno, yog hais tias, Falaus yuav tau qoob loo ib feem hauv tsib. Tsuas yog tshuav cov pov thawj tej liaj teb thiaj tsis poob ua Falaus tug xwb.

​

Yakhauj Kom Yahxej Cog Lus

27 Cov Ixayees nyob hauv Iziv tebchaws ntawm Kausees li hais no. Lawv tau liaj tau teb ua lawv tug thiab muaj tub ki huaj vam coob heev.

28 Yakhauj tseem muaj txojsia nyob hauv Iziv tebchaws tau kaum xya xyoo. Yakhauj li hnub nyoog huvsi muaj ib puas plaub caug xya xyoo.

29 Thaum ze sijhawm uas Ixayees yuav tu siav, nws hu Yahxej los hais tias, yog koj hlub kuv, mas muab koj txhais tes tso rau hauv kuv txhais ncej qab es cog lus tias, koj yuav ua zoo thiab ua ncaj rau kuv. Tsis txhob muab kuv faus rau hauv Iziv teb­chaws.

30 Thaum kuv mus nrog kuv tej poj koob yawm txwv nyob lawm, koj cia li coj kuv tawm hauv Iziv tebchaws rov mus faus rau qhov chaw uas faus lawv. Yahxej teb tias, kuv yuav ua raws li uas koj hais.

31 Ixayees txawm hais rau nws tias, cia li cog lus twv. Yahxej kuj cog lus twv rau leej txiv. Ces Ixayees txawm nyo hau qhuas (יחוח)Yahweh saum nws lub txaj pw.

​

​