(יחוח)Yahweh Lub Tsev Ntaub Sib Ntsib

(Khiavdim 36:8-38)

1 Thiab koj yuav muab kaum chaws ntaub mag ua (יחוח)Yahweh lub tsev ntaub, yuav muab xov maj uas nkoov zoo zoo thiab muab xov xiav, xov tsamxem, xov liab ntos ua, thiab kom cov Kws txawj ntos ua duab Khelunpees rau hauv. 

2 Ib chaws ntaub ntev nees nkaum yim tshim, dav plaub tshim, txhua chaws ntaub dav ntev ib yam nkaus.

3 Muab tsib chaws ntaub xaws ua ke ua ib daig, muab tsib chaws xaws ua ib daig.

4 Muab cov ntaub xiav xaws ua ntsej rau daim ntug ntaub uas ib, thiab ua ntsej rau daim ntug ntaub uas ob ib yam nkaus.

5 Ua tsib caug lub ntsej rau daim ntug ntaub uas ib, thiab ua tsib caug lub ntsej rau daim uas ob, sab npoo uas txuas ua ke kom sib ncaj nkaus. 

6 Thiab muab kub los ua tsib caug lub khawb los khawm ob daig ntaub ntawd kom ua kiag ib daig, ua (יחוח)Yahweh lub tsev. 

7 Muab plaub tshis los ntos ua kaum ib chaws ntaub vov kiag ()Yahweh lub tsev,

8 Ib chaws ntaub ntev peb caug tshim, dav plaub tshim, kaum ib chaws ntaub dav ntev ib yam nkaus.

9 Muab tsib chaws ntaub xaws ua ke ua ib daig, muab rau chaws xaws ua ib daig, mas daim uas rau, muab quav rov rau saum qhov rooj lub tsev ntaub.

10 Ua tsib caug lub ntsej rau daim ntug ntaub uas ib, thiab ua tsib caug

lub ntsej rau daim ntug ntaub uas ob,

11 Thiab muab tooj liab ua tsib caug lub khawb los khawm ob daig ntaub ntawm cov ntsej kom ua kiag ib daig.

12 Daim ntaub uas vov lub tsev es tshaj ib nrab daim ntawd, mas yuav muab tso dauv rau sab pem qaum tsev.

13 Daim ntaub uas vov lub tsev ntaub mag, ua tshaj rau ob sab, ib sab tshaj ib tshim thiaj li kauv tau lub tsev ob sab huvsi.

14 Thiab yuav muab cov tawv txiv yaj uas zas liab lawd, los ua ntaub vov lub tsev ntaub thiab muab cov tawv ntshuab hiavtxwv los ua ntaub vov txheej saud.

15 Muab ntoo kub twm los ua tab tsa xov kuv lub tsev.

16 Cov tab ntawd, ntev kaum tshim, dav ib tshim txhais.

17 Ib daim ntoo tab mas thais ua ob tug taw thiaj txuas tau ua ke. Ua txhua daim ntoo tab li no coj los ua kuv lub tsev.

18 Ua nees nkaum daim ntoo tab xov kuv lub tsev sab nrad,

19 Thiab muab nyiaj ua plaub caug tus taw tiag nees nkaum daim ntoo tab li taw, ib daim ntoo tab ntxig rau ob tug taw.

20 Ua nees nkaum daim ntoo tab xov kuv lub tsev sab ped,

21 Thiab muab nyiaj ua plaub caug tus taw tiag hauv taw, ib daim ntoo tab ntxig rau hauv ob tug taw tiag.

22 Ua rau daim ntoo tab xov kuv lub tsev sab qaum tsev uas hnub poob.

23 Ua ob daim ntoo tab xov ob lub kaum tsev ntaub uas yog sab qaum tsev.

24 Ob daim ntoo tab ntawd mas hauv taw muab ib daim txawb qis me ntsis rau sab nraud, saum hau daim ntoo, muab teem ti nkaus lub ntsej saum kawg. Ua li no rau ob lub kaum tsev ntaub.

25 Sab hnub poob muaj yim daim ntoo tab xov thiab muaj kaum rau tus taw nyiaj tiag hauv taw, ib daim ntoo tab ntxig rau ob tug taw.

26 Muab ntoo kub twm ua tsib tug las tuav kuv lub tsev ib sab phab ntsa,

27 Thiab ua tsib tug las rau dua ib sab thiab ua tsib tug rau sab qaum tsev uas hnub poob.

28 Tus las nruab nrab uas tuav cov ntoo tab yuav ntev keev kiag txij ib lub kaum tsev txog ntua ib lub kaum tsev.

29 Muab kub luam cov ntoo tab ntawd thiab muab kub ua cov ntsej uas ntxig cov las ntawd, thiab muab kub luam cov las huvsi.

30 Tsa kuv lub tsev ntawd raws li tus qauv uas kuv twb hais rau koj saum lub roob.

31 Muab xov xiav, xov tsamxem, xov liab thiab xov maj uas nkoov zoo zoo ua ib daim ntaub thaiv, thiab kom cov Kws txawj ntos, ntos ua duab Khelunpees rau hauv.

32 Muab daim ntaub no dai rau saum cov nqe lauj kub uas nyob ntawm plaub tug ncej ntoo kub twm uas muab kub luam rau thiab muab ntxig rau hauv plaub tug taw nyiaj tiag ncej.

33 Mas muab daim ntaub cov ntsej khuam rau cov nqe lauj es muab lub phij xab sib cog lus tso rau chav hauv daim ntaub ntawd, mas daim ntaub ntawd yuav kem lub tsev ntaub chav uas dawb huv thiab chav uas dawb huv kawg nkaus.

34 Muab lub hau phij xab uas roos kev txhaum kaw rau lub phij xab sib cog lus hauv lub chaw uas dawb huv kawg nkaus.

35 Muab lub rooj txawb rau nraum daim ntaub sab ped, muab lub teeb xya ceg txawb rau sab nram ncaj ntawm lub rooj.

36 Muab xov xiav, xov tsamxem, xov liab thiab xov maj uas nkoov zoo zoo ua ib daim ntaub ua lub qhov rooj tsev ntaub, thiab ua paj ntaub rau.

37 Muab ntoo kub twm ua tsib tug ncej thiab muab kub ua nqe lauj khuam daim ntaub ntawd, thiab muab tooj liab nchuav ua tsib tug taw tiag cov ncej ntawd.