Kom Cov Ixayees Coj Qhov Txhia Chaw Tuaj Pub

(Khiavdim 35:4-9)

1 (יחוח)Yahweh hais rau Mauxes tias,

2 hais rau cov Ixayees coj qhov txhia chaw tuaj pub rau kuv. Koj cia li txais ntawm txhua tus uas zoo siab pub rau kuv.

3 Cov qhov txhia chaw uas koj yuav txais ntawm lawv ntawd, yog kub, thiab nyiaj, thiab tooj liab,

4 Thiab xov xiav, xov tsamxem, xov liab, thiab xov maj, uas nkoov zoo zoo thiab plaub tshis,

5 thiab cov tawv txiv yaj uas muab zas liab lawd, thiab cov tawv ntshuab hiavtxwv, thiab ntoo kub twm,

6 thiab roj sam lub teeb, thiab tej txuj lom uas xyaw cov roj tsw qab siv ua kevcai tsa, thiab xyaw cov hmoov tshuaj tsw qab,

7 thiab cov qe zeb iav txho ci lam lug, thiab tej qe zeb hlaws muaj nqis uas muab xaws lo rau lub tsho efauj thiab lub awv.

8 Kom lawv ua ib thaj chaw pe hawm kuv xwv kuv thiaj li nyob hauv lawv nruab nrab.

9 Nej yuav tau ua kuv lub tsev thiab ua tej twj uas siv rau hauv lub tsev raws li tus qauv uas kuv yuav qhia txhua yam rau koj huvsi.

​

Lub Phij Xab Nrog (יחוח)Yahweh Sib Cog Lus

(Khiavdim. 3:1-9)

10 Lawv yuav tau muab ntoo kub twm ua lub phij xab, ntev ob tshim txhais, dav ib tshim txhais, thiab siab ib tshim txhais.

11 Muab cov tseem kub luam tag nrho lub phij xab ntawd, sab hauv, sab nraud huvsi thiab muab kub ua ib tug caj ntswm puag ncig lub phij xab.

12 Muab kub nchuav ua plaub lub ntsej tis rau plaub tug taw phij xab, yog ua ib sab ob lub ntsej.

13 Muab ntoo kub twm ua ob tug las kwv thiab muab kub luam ob tug las ntawd huvsi,

14 Mas muab ntxig rau cov ntsej ntawm lub phij xab ob sab, thiaj kwv tau lub phij xab ntawd.

15 Cia ob tug las ntawd nyob hauv tsis txhob rho li.

16 Cia li muab ob daim txhib zeb uas sau kuv tej lus uas kuv yuav muab rau koj tso rau hauv lub phij xab.

17 Muab cov tseem kub ua lub hau phij xab uas roos kev txhaum, ntev ob tshim txhais, dav ib tshim txhais.

18 Muab kub ntaus ua ob tug Khelunpees txawb rau ob tog hau phij xab uas roos kev txhaum.

19 Ua ob tug Khelunpees ntawd ib tug nyob ib tog hau phij xab lo xeeb keeb nkaus rau lub hau phij xab.

20 Ua ob tug ntawd nthuav tis los roos saum lub hau phij xab, ob tug ntawd tig xubntiag ua ke, yog tig los saib lub hau phij xab uas roos kev txhaum.

21 Muab ob daim txhib zeb uas sau kuv tej lus uas kuv yuav muab rau koj tso rau hauv lub phij xab thiab muab lub hau phij xab kaw rau.

22 Kuv yuav nyob saum lub hau phij xab uas roos kev txhaum hauv nruab nrab ob tug Khelunpees uas nyob saum lub phij xab sib cog lus mas kuv yuav ntsib koj qhov ntawd thiab muab kuv tej kevcai txhua txoj rau koj coj mus qhia rau cov Ixayees.

​

Lub Rooj Teeb Ncuav

(Khiavdim 37:10-16)

23 Koj yuav muab ntoo kub twm ua ib lub rooj, ntev ob tshim, dav ib tshim, thiab siab ib tshim txhais.

24 Muab cov tseem kub luam lub rooj ntawd huvsi thiab muab kub ua ib tug caj ntswm puag ncig lub rooj ntawd.

25 Ua ib daim ntoo dav ib xib thaiv puag ncig lub npoo rooj thiab muab kub ua ib tug caj ntswm lo puag ncig daim ntoo ntawd.

26 Muab kub ua plaub lub ntsej tis rau plaub lub kaum rooj uas ncaj plaub tug ceg rooj.

27 Muab cov ntsej ntawd lo ze ze daim ntoo, thiaj ntxig tau las kwv.

28 Muab ntoo kub twm ua ob tug las kwv thiab muab kub luam ob tug las huvsi, thiaj kwv tau lub rooj.

29 Muab cov tseem kub ua tej tais pliab, tais ntim rau hmoov tshuaj tsw qab, thiab tais phaj thiab tej pav lam hwj uas hliv cawv txiv hmab xyeem.

30 Yuav tau muab cov ncuav uas xyeem rau ntawm (יחוח)Yahweh xubntiag tso rau saum lub rooj rau ntawm kuv lub xubntiag mus li.

​

Lub Teeb Kub

(Khiavdim 37:17-24)

31 Koj yuav muab cov tseem kub ua ib tug kav teeb. Ntaus ua lub taw thiab tus ncej teeb, thiab ua cov tais zoo li paj thiab cov qia paj thiab cov nplai paj lo xeeb keeb nkaus rau tus kav teeb.

32 Tus kav teeb no ncau ua rau ceg, ib sab ncau peb ceg.

33 Txhua ceg muaj peb lub paj zoo li paj txiv duaj, txhua lub paj muaj lub qia paj thiab cov nplai paj rau rau ceg uas ncau ntawm tus kav teeb huvsi.

34 Tus tseem kav teeb muaj plaub lub paj txiv duaj uas muaj

lub qia paj thiab cov nplai paj huvsi.

35 Rau ceg ntawd, txhua nkawm ceg uas ncau ntawm tus kav teeb, muaj ib lub qia paj nyob hauv qab.

36 Cov qia paj ntawd thiab cov ceg teeb lo xeeb keeb nkaus rau tus kav teeb, yuav muab cov tseem kub ntaus ua xwb. 

37 Ua xya lub teeb thiab muab txawb saum xya ceg teeb ntawd es taws kom ci mus rau ntawm cov teeb ntawd sab xubntiag. 

38 Muab cov tseem kub ua rab txiab uas txiav teeb xeeb thiab ua lub phaj pliab uas rau txiab. 

39 Muab cov tseem kub nyhav ib talas ua lub teeb kub thiab tej twj uas siv ntawm lub teeb ntawd. 

40 Yuav tau ceev faj ua txhua yam raws li tus qauv uas kuv hais rau koj saum lub roob.