Xaiv Npexalees Thiab Auhaulias Ua Haujlwm

(Khiavdim 35:30-36:1)

1 (יחוח)Yahweh hais rau Mauxes tias,

2 Saib maj, kuv twb xaiv Ulis tus tub Npexalees uas yog Hawj tus xeeb ntxwv, yog xeem Yahdah,

3 thiab kuv twb pub Tus Ntsuj Plig Dawbhuv puv npo rau nws kom nws muaj lajlim tswvyim plab plaws thiab txawj ntse paub ua txhua tsav txhua yam,

4 thiab txawj sau qauv thiab muab nyiaj, muab kub, muab tooj liab, los ua tau txaij nraug zees, 

5 Thiab txawj txua thiab txhum tej qe zeb hlaws uas muaj nqis es muab khawm lo rau lub me tais, txawj sais ntoo txaij zoo nkauj, nws txawj ua txhua yam.

6 Saib maj, kuv twb xaiv Ahixamas tus tub Auhaulias uas yog xeem Daj, ua tus uas pab nws. Kuv kuj pub tswvyim peevxwm rau txhua tus kws txawj, lawv thiaj ua tau txhua yam uas kuv twb hais rau koj lawd. 

7 Yog lub tsev ntaub sib ntsib, lub phij xab sib cog lus thiab lub hau phij xab uas roos kev txhaum thiab txhua yam twj uas siv hauv lub tsev ntaub.

8 Yog lub rooj thiab tej twj siv saum lub rooj, lub teeb tseem kub thiab tej twj siv tu lub teeb, thiab lub thaj hlawv hmoov tshuaj tsw qab,

9 thiab lub thaj uas hlawv qhov txhia chaw xyeem thiab tej twj uas siv saum lub thaj, thiab lub phaj ntxuav tes taw thiab lub chaw uas txawb lub phaj,

10 thiab cev tsoos meej mom dawb huv uas ntos tau zoo zoo rau pov thawj Aloos hnav thiab tej tsoos meej mom uas Aloos cov tub hnav rau thaum lawv ua pov thawj ua kuv tes haujlwm,

11 thiab cov roj tsw qab uas siv ua kevcai tsa thiab cov hmoov tshuaj tsw qab uas muab hlawv rau hauv lub chaw uas dawb huv. Tej no huvsi mas lawv yuav tau ua txhua yam raws nraim li uas kuv twb hais rau koj lawd.

​

Hnub Sabbath Yog Hnub Tseem Ceeb

12 (יחוח)Yahweh hais rau Mauxes tias,

13 koj cia li hais rau cov Ixayees tias, nej yuav tau nco ntsoov so rau kuv hnub Sabbath, vim tias qhov no yog lub hom thawj rau kuv thiab nej mus rau txhua tiam kom nej thiaj paub tias kuv uas yog (יחוח)Yahweh, muab nej cais ua dawb huv.

14 Nej yuav tau nco ntsoov so rau hnub Sabbath, vim tias yog hnub uas dawb huv rau nej. Leejtwg ua puas tsuas hnub ntawd nws yuav raug txim tuag. Yog leejtwg ua haujlwm rau hnub ntawd, nws yuav raug muab txiav tawm hauv nws haiv neeg.

15 Cia li ua haujlwm rau hnub, tiamsis hnub xya, yog hnub Sabbath, yog hnub uas caiv so tiag tiag li thiab yog hnub uas dawb huv rau

(יחוח)Yahweh. Yog leejtwg ua haujlwm rau hnub Sabbath, yuav raug txim tuag.

16 Yog li no, cov Ixayees yuav tau nco ntsoov so hnub Sabbath. Lawv yuav hwm hnub ntawd mus rau txhua tiam ua lus cog tseg nyob mus ib txhis li.

17 Yog lub hom thawj rau kuv thiab cov Ixayees mus ib txhis qhia hais tias, (יחוח)Yahweh tsim lub ntuj, lub ntiajteb tau rau hnub xwb tiav tag, mas hnub xya, nws so tsis ua haujlwm thiaj tau so los siav.

18 Thaum nws hais rau Mauxes saum lub roob Xinais tag lawd, nws muab ob daim txhib zeb uas (יחוח)Yahweh xuas ntiv tes sau nws tej lus cog tseg rau hauv, pub rau Mauxes.