Dab Mlom Nyuj Kub

(Kevcai 9:6-29)

1 Thaum cov pejxeem pom tias Mauxes nyob ntev heev tsis nqis saum roob los, lawv txawm ua ke tuaj hais rau Aloos tias, koj cia li sawv tsees ua tej dab mlom rau peb uas yuav coj peb kev mus. Tus Mauxes uas coj peb tawm hauv Iziv teb chaws los, peb tsis paub xyov nws ua li cas lawm.

2 Mas Aloos hais rau lawv tias, cia li hle tej kauj co kub ntawm nej tej pojniam thiab nej tej tub, tej ntxhais qhov ntsej coj tuaj rau kuv.

3 Cov pejxeem sawvdaws thiaj hle tej kauj co kub ntawm lawv qhov ntsej coj tuaj rau Aloos.

4 Aloos tau tej kub ntawm lawv txhais tes ces nws txawm muab nchuav thiab siv cuab yeej txua ua ib tug thav nyuj. Mas lawv hais tias, cov Ixayees es, tej no yog nej tej dab uas coj nej tawm hauv Iziv tebchaws los.

5 Thaum Aloos pom li no, nws txawm tib ib lub thaj xyeem rau ntawm tus dab mlom nyuj ntawd xubntiag. Mas Aloos tshaj tawm hais tias, tagkis yuav ua kevcai noj haus rau (יחוח)Yahweh.

6 Mas hnub tom qab, lawv sawv ntxov mus tua tsiaj ua kevcai hlawv xyeem thiab coj tej tsiaj xyeem ua kevcai sib raug zoo. Cov pejxeem kuj zaum noj haus thiab sawv dhia ua lomzem.

7 (יחוח)Yahweh hais rau Mauxes tias, koj cia li nqis mus, vim koj haiv neeg uas koj coj tawm hauv Iziv tebchaws los ntawd, twb ua phem ua qias lawm.

8 Lawv twb tig hlo ntawm txojkev uas kuv qhia rau lawv sai kawg li lawm. Lawv nchuav ib tug dab mlom thav nyuj rau lawv, thiab pe thiab tua tsiaj xyeem rau tus dab mlom ntawd, thiab hais tias, cov Ixayees es, tej no yog nej tej dab uas coj nej tawm hauv Iziv tebchaws los.

9 (יחוח)Yahweh hais rau Mauxes tias, kuv pom haiv neeg no lawm, lawv yeej yog haiv neeg uas tawv ncauj heev.

10 Vim li no koj tsis txhob tav kuv, kom kuv txojkev npau taws thiaj tshwm plaws ua kom lawv puam tsuaj tag. Tiamsis kuv yuav tsa koj ua ib haiv neeg loj heev.

11 Mas Mauxes thov (יחוח)Yahweh uas yog nws Tus Tswv tias, Au (יחוח)Yahweh, ua cas koj npau taws heev rau koj haiv neeg uas koj siv koj lub hwjchim loj thiab siv koj txhais tes uas muaj zog coj tawm hauv Iziv tebchaws los?

12 Ua cas yuav cia cov Iziv hais tias, (יחוח)Yahweh npaj yuav ua phem es coj lawv tawm mus thiaj muab lawv tua rau tom tej roob thiab muab lawv ua puam tsuaj tag hauv lub ntiajteb mus? Thov koj thim koj txojkev npau taws heev thiab hloov koj lub siab, tsis txhob ua qhov phem no rau koj haiv neeg.

13 Thov koj nco txog Anplaham, Ixaj thiab Ixayees uas yog koj cov qhev. Koj tau cog lus ruaj khov rau lawv tias, kuv yuav ua rau nej caj ces huaj vam coob yam li tej hnub qub saum ntuj, thiab lub tebchaws no huvsi uas kuv cog lus cia lawd, kuv yuav pub rau nej caj ces mas lawv yuav tau ua qub txeeg qub teg mus ib txhis li.

14 Mas (יחוח)Yahweh thiaj hloov siab tsis ua tej xwm txheej phem raws li nws tau xav tseg tias nws yuav ua rau nws haiv neeg.

15 Mauxes thiaj tig kiag nqis saum lub roob los, nws nqa ob daim txhib zeb uas sau (יחוח)Yahweh tej lus rau ob sab huvsi los.

16 Ob daim txhib zeb no yog (יחוח)Yahweh ua thiab cov npe ntawv ntawd yog (יחוח)Yahweh sais rau hauv daim txhib zeb.

17 Thaum Yahshua hnov cov pejxeem lub suab nrov ntshu nrooj, nws txawm hais rau Mauxes tias, muaj suab nrov ua rog nram lub chaw nyob.

18 Tiamsis Mauxes hais tias, lub suab uas hnov ntawd, tsis yog suab yeej rog thiab tsis yog suab swb rog, tiamsis yog suab qw ua lomzem xwb.

19 Thaum Mauxes los ze lub zos lawm thiab pom tus dab mlom thav nyuj thiab pom tibneeg seev cev, ces nws txawm npau taws heev, nws muab ob daim txhib zeb laim pov tseg tawg tag rau ntawm taw roob lawm.

20 Nws muab tus dab mlom thav nyuj uas lawv ua ntawd, hlawv thiab muab tuav ua hmoov w rau hauv dej thiab yuam cov Ixayees haus cov dej ntawd.

21 Mauxes thiaj hais rau Aloos tias, cov pejxeem no, ua li cas rau koj es koj thiaj coj lub txim loj li no los raug lawv?

22 Aloos teb tias, yawg hlob, tsis txhob npau taws kiag li. Koj yeej paub cov pejxeem no lawm, lawv siab yeej qaug lais mus taug txojkev phem xwb.

23 Lawv hais rau kuv tias, cia li ua tej dab mlom rau peb uas yuav coj peb mus. Tus Mauxes uas coj peb tawm hauv Iziv tebchaws los, peb tsis paub xyov nws ua li cas lawm.

24 Kuv thiaj hais rau lawv tias, leejtwg muaj kauj co kub cia li hle los. Lawv thiaj muab rau kuv mas kuv muab pov rau hauv cub hluavtaws, ces txawm tshwm tus thav nyuj no tawm los.

25 Thaum Mauxes pom tias cov pejxeem lem kiag lawm, vim yog Aloos tso lawv lem lawm, ua rau lawv raug lawv cov yeeb ncuab thuam luag.

26 Mas Mauxes sawv ntsug ntawm rooj vag hauv lub zos thiab hais tias, leejtwg nyob (יחוח)Yahweh tog? Cia li los ntawm kuv. Mas Levis cov tub ki sawvdaws thiaj los rau ntawm Mauxes.

27 Mauxes hais rau lawv tias, (יחוח)Yahweh uas yog Ixayees Tus Tswv hais li no tias, nej txhua tus cia li ris ntaj ntawm duav thiab mus mus los los ntawm txhua lub rooj vag hauv lub zos thiab txhua tus nyias tua nyias cov kwvtij thiab nyias tua nyias cov phoojywg thiab nyias tua nyias cov kwvtij zej zog.

28 Mas cov Levis kuj ua raws li Mauxes hais. Mas hnub ntawd cov pejxeem thiaj raug tua kwvlam peb txhiab leej.

29 Mauxes hais tias, hnub no nej rov tsa nej ua cov uas ua (יחוח)Yahweh tes haujlwm, vim nej txhua tus nyias tawm tsam nyias tej tub thiab nyias tej kwvtij, hnub no (יחוח)Yahweh thiaj li foom koob hmoov rau nej.

30 Hnub tom qab, Mauxes thiaj hais rau cov pejxeem tias, nej tau ua txhaum muaj txim loj heev. Mas nimno kuv yuav nce rov mus cuag (יחוח)Yahweh. Tej zaum kuv yuav ntxuav tau nej tej kev txhaum txim.

31 Mauxes thiaj rov mus cuag (יחוח)Yahweh thiab thov hais tias, cov pejxeem no ua txhaum txim loj kawg. Lawv ua tej dab mlom kub rau lawv.

32 Tiamsis nimno thov koj zam lawv lub txim. Yog koj tsis kam, mas thov koj muab kuv lub npe rhuav tawm hauv koj phau ntawv uas koj sau cia.

33 Mas (יחוח)Yahweh hais rau Mauxes tias, leejtwg ua txhaum rau kuv, kuv yuav rhuav tus ntawd lub npe tawm hauv kuv phau ntawv.

34 Koj cia li mus, coj cov pejxeem mus rau lub chaw uas kuv hais rau koj lawm. Kuv tus tubtxib saum ntuj yuav ua koj ntej mus.

Txawm li ntawd los txog hnub uas kuv txiav

txim, kuv yuav rau txim rau lawv.

35 Mas (יחוח)Yahweh tso mob kis los raug cov pejxeem vim yog qhov uas lawv ua tus dab mlom thav nyuj, uas Aloos ua ntawd.