Txhwm Dua Ob Daim Txhib Zeb

(Kevcai 10:1-5)

1 (יחוח)Yahweh hais rau Mauxes tias, cia li txua dua ob daim txib zeb zoo ib yam li thawj ob daim, mas kuv yuav sau tej lus uas nyob hauv ob daim qub uas koj ua tawg lawm rau hauv.

2 Cia li npaj kom txhij rau tagkis, mas sawv ntxov nce tuaj rau saum lub roob Xinais thiab tuaj cuag kuv saum lub ncov roob.

3 Tsis txhob kheev leejtwg nrog koj tuaj thiab tsis kheev leejtwg tuaj nyob saum lub roob ib thaj twg kiag li. Tsis txhob kheev tej yaj, tej tshis, tej nyuj noj zaub ze ntawm lub roob no.

4 Mauxes thiaj txua ob daim txhib zeb zoo yam li thawj ob daim, thiab nws sawv ntxov nce mus rau saum lub roob Xinais raws li (יחוח)Yahweh hais rau nws, thiab nqa ob daim txhib zeb ntawm txhais tes mus.

5 Mas (יחוח)Yahweh nyob hauv tauv huab nqis los thiab nrog Mauxes sawv ua ke thiab tshaj tawm (יחוח)Yahweh lub npe.

6 (יחוח)Yahweh hla kiag ntawm Mauxes xubntiag mus thiab tshaj tawm tias, (יחוח)Yahweh, (יחוח)Yahweh, yog Tus Tswv uas muaj hwjchim loj kawg nkaus, muaj kev zam txim thiab kev hlub, nws tsis chim sai, nws txojkev hlub uas ruaj khov thiab nws txojkev ua ncaj uas tso siab tau muaj nplua mias.

7 Nws txojkev hlub ruaj khov muaj rau tibneeg qas txhiab qas tiam, nws zam txim rau tej kev ua phem, ua qias, thiab kev ntxeev siab, thiab kev ua txhaum muaj txim. Tiamsis nws kuj tsis suav tias tsis txhaum, nws yuav rau leej txiv lub txim poob mus rau cov menyuam thiab cov xeeb ntxwv peb plaub tiam.

8 Mauxes txawm maj nroos nyo hau ti nkaus av pe hawm.

9 Nws hais tias, Au Tus Tswv, yog kuv txaus koj lub siab, txawm yog haiv neeg no tawv ncauj los kuv thov koj nrog peb mus. Thiab thov koj zam peb tej kev txhaum thiab peb lub txim, thiab txais yuav peb ua koj teej koj tug.

​

(יחוח)Yahweh Rov Cog Lus Rau Mauxes

(Khiavdim 23:14-19; Kevcai 7:1-5, 16 :1-17)

10 (יחוח)Yahweh hais tias, ntawm no kuv cog lus rau koj. Kuv yuav ua txujci tseem ceeb tshwm los tab meeg koj haiv neeg, yog tej txujci uas tsis tau ua dua rau hauv lub ntiajteb lossis ua rau hauv lub tebchaws twg kiag li. Ib tsoom tibneeg uas nyob puag ncig koj sawvdaws yuav pom (יחוח)Yahweh tes haujlwm, rau qhov tej uas kuv yuav ua rau koj ntawd yuav yog ib yam uas txaus ntshai kawg li.

11 Koj yuav tau ua raws li tej uas hnub no kuv hais rau koj. Saib maj, kuv yuav ntiab cov Amaulais, cov Khana‑as, cov Hithais, cov Pelixais, cov Hivais thiab cov Yenpus khiav tawm ntawm koj xubntiag mus. 

12 Yuav tau ceev faj tsis txhob nrog cov tibneeg hauv lub tebchaws uas koj yuav mus txog ntawd cog lus sib raug zoo, ntshai tsam yuav ua rooj hlua cuab koj.

13 Nej yuav tau rhuav lawv tej thaj teev dab pov tseg thiab tsoo lawv tej ncej tseem ceeb kom tawg tag thiab ntov lawv tej ncej dab Aselas.

14 Nej tsis txhob pe luag tej dab tej mlom ib tug kiag li, rau qhov (יחוח)Yahweh, uas khib xeeb nws cov menyuam, yog Tus Tswv uas khib xeeb heev.

15 Yog nej cog lus nrog cov tibneeg hauv lub tebchaws ntawd sib raug zoo, mas ntshai tsam thaum lawv deev lawv tej dab, thiab tua tsiaj xyeem rau tej dab ntawd, ces lawv yuav hu nej mus nrog lawv koom, thiab nej yuav noj tej uas lawv muab xyeem rau tej dab ntawd,

16 Thiab nej yuav mus yuav lawv tej ntxhais los ua nej tej tub pojniam, ces lawv tej ntxhais yuav mus deev lawv tej dab thiab yaum nej tej tub mus deev lawv tej dab thiab.

17 Nej tsis txhob nchuav dab mlom rau nej pe kiag li.

18 Nej yuav tau nco ntsoov ua kevcai noj ncuav tsis xyaw keeb. Yuav noj ncuav tsis xyaw keeb kom puv xya hnub rau lub sijhawm uas teem cia hauv lub hli Anpis raws li kuv hais rau nej, rau qhov nej tawm hauv Iziv tebchaws los rau lub hli Anpis.

19 Thawj plab menyuam txhua tus, yog kuv li, yog nej thawj tug menyuam tsiaj uas yog tus txiv huvsi, yog thawj tug menyuam nyuj, menyuam yaj.

20 Thawj tug menyuam nees luav mas nej yuav muab ib tug yaj txhiv. Yog nej tsis txhiv, kuj muab lov caj pas pov tseg. Nej thawj tug tub hlob, txhua tus kuj yuav tau txhiv thiab. Tsis txhob cia leejtwg tuaj cuag kuv tes dawb tes do.

21 Nej yuav tau ua haujlwm rau hnub xwb, hnub uas xya, yuav tau so. Txawm yog lub caij laij teb, caij sau qoob, los yuav tau so.

22 Yuav tau nco ntsoov ua kevcai xya lub chib so uas sau thawj phaum mog, thiab nco ntsoov ua kevcai sau qoob thaum qab xyoo.

23 Nej cov txivneej sawvdaws yuav tau tuaj ua ke rau ntawm (יחוח)Yahweh uas yog Ixayees Tus Tswv lub xubntiag, ib xyoos peb zaug.

24 Kuv yuav ntiab lwm haiv neeg khiav tawm ntawm nej lub xubntiag mus thiab pub kom nej tau tebchaws dav zuj zus. Lub sijhawm uas nej mus cuag (יחוח)Yahweh uas yog nej Tus Tswv ib xyoos peb zaug ntawd, yuav tsis muaj leejtwg xav txeeb nej lub tebchaws kiag li.

25 Tsis txhob muab tej tsiaj uas tua xyeem li ntshav xyeem nrog cov ncuav xyaw keeb ua ke. Tsis txhob tseg tus menyuam yaj uas muab ua kevcai hla dhau li nqaij cia nyob txog kaj ntug.

26 Thawj phaum qoob loo uas sau hauv teb los mas yuav coj tej uas zoo zoo tuaj rau hauv (יחוח)Yahweh uas yog nej Tus Tswv lub tsev. Tsis txhob muab tus maum tshis cov kua mis los hau nws tus menyuam.

27 (יחוח)Yahweh hais rau Mauxes tias, tej lus no muab sau cia. Kuv nrog koj thiab cov Ixayees cog lus cia raws li tej nqes no lawm.

28 Mauxes nrog (יחוח)Yahweh nyob qhov ntawd plaub caug hnub, plaub caug hmo, nws tsis noj mov tsis haus dej li. Nws sau tej lus cog tseg rau hauv ob daim txhib zeb, yog kaum txoj kevcai.

​

Mauxes Nqis Saum Lub Roob Los

29 Mauxes nqis saum lub roob Xinais los, nws nqa ob daim txhib zeb uas sau (יחוח)Yahweh tej lus ntawm nws txhais tes los. Lub sijhawm uas Mauxes nqis saum lub roob los, nws tsis paub tias nws lub ntsej muag ci, vim yog nws tau nrog (יחוח)Yahweh hais lus lawm.

30 Thaum Aloos thiab cov Ixayees sawvdaws saib Mauxes mas pom tias, nws lub ntsej muag ci, lawv tsis kav txav los ze nws.

31 Tiamsis Mauxes hu lawv los. Aloos thiab cov uas ua thawj hauv cov pejxeem sawvdaws thiaj rov los cuag Mauxes, thiab nws nrog lawv hais lus.

32 Tom qab ntawd, cov Ixayees sawvdaws txav los ze, thiab Mauxes thiaj qhia tej kevcai uas (יחוח)Yahweh tau hais rau nws saum lub roob Xinais txhua nqe rau lawv mloog.

33 Thaum Mauxes hais rau lawv tag lawm, nws muab ntaub los kauv nws lub ntsej muag.

34 Thaum twg Mauxes nkag mus rau ntawm (יחוח)Yahweh xubntiag, nws kuj muab daim ntaub ntawd yaws mus txog thaum nws tawm los. Thaum nws tawm los thiab qhia tej uas (יחוח)Yahweh kom nws hais rau cov Ixayees mloog.

35 Mas cov Ixayees saib Mauxes lub ntsej muag kuj pom Mauxes lub ntsej muag ci, ces Mauxes txawm muab ntaub kauv nws lub ntsej muag dua mus txog thaum nws nkag mus nrog (יחוח)Yahweh hais lus.