Kevcai Hnub Sabbath

1 Mauxes hu ib tsoom pejxeem Ixayees tuaj txoos ua ib ke thiab nws hais rau lawv tias, tej no yog tej uas (יחוח)Yahweh kom nej ua.

2 Nej ua nej tej haujlwm rau hnub xwb. Hnub xya, yog hnub uas caiv so tiag tiag, yog hnub Sabbath uas dawb huv rau (יחוח)Yahweh. Yog leejtwg ua ib yam haujlwm rau hnub ntawd, mas yuav rau raug muab tua pov tseg.

3 Hnub Sabbath tsis txhob rauv taws hauv nej tej tsev kiag li.

​

Neeg Nqa Tuaj Pub Rau ()Yahweh

(Khiavdim 25:1-9)

4 Mauxes hais rau cov Ixayees sawvdaws tias, (יחוח)Yahweh kom nej ua li no,

5 Nej sawvdaws mus nqa tej uas nej muaj tuaj pub rau (יחוח)Yahweh. Leejtwg lub siab dav, kuj coj nws tej qhov txhia chaw tuaj pub rau (יחוח)Yahweh, yog kub thiab nyiaj thiab tooj liab,

6 Thiab xov xiav, xov tsamxem, xov liab thiab xov maj uas nkoov zoo zoo thiab plaub tshis,

7 thiab cov tawv txiv yaj uas muab zas liab lawd, thiab cov tawv ntshuab hiavtxwv, thiab ntoo kub twm,

8 thiab roj sam lub teeb, thiab tej txuj lom uas xyaw cov roj tsw qab siv ua kevcai tsa, thiab xyaw cov hmoov tshuaj tsw qab,

9 thiab cov qe zeb iav txho ci lam lug thiab tej qe zeb hlaws muaj nqis uas muab xaws lo rau lub tsho efauj thiab lub awv.

​

Cov Khoom Uas Ua Lub Tsev Ntaub

(Khiavdim 39:32-43)

10 Cia txhua tus uas muaj tswvyim hauv nej cov tuaj ua txhua yam uas (יחוח)Yahweh kom nej ua, yog (יחוח)Yahweh lub tsev, 

11 uas yog lub tsev ntaub thiab daim ntaub uas vov txheej saud thiab cov khawb, cov ntoo tab, cov las, cov ncej thiab cov taw tiag hauv taw,

12 thiab lub phij xab thiab cov las kwv thiab lub hau phij xab roos kev txhaum, thiab daim ntaub uas thaiv,

13 Thiab lub rooj, ob tug las kwv, thiab tej twj uas siv saum lub rooj, thiab cov ncuav uas xyeem txawb rau ntawm (יחוח)Yahweh xubntiag,

14 thiab tus kav teeb uas txawb teeb pom kev, tej twj uas siv tu lub teeb, cov teeb thiab cov roj sam teeb,

15 thiab lub thaj hlawv hmoov tshuaj tsw qab xyeem thiab ob tug las kwv, thiab cov roj tsw qab siv ua kevcai tsa, thiab cov hmoov tshuaj tsw qab, thiab daim ntaub uas ua qhov rooj tsev ntaub,

16 thiab lub thaj hlawv qhov txhia chaw xyeem, daim tsuav ntxaij tooj liab, cov las kwv thiab tej twj uas siv saum lub thaj, thiab lub phaj tooj liab, thiab lub chaw txawb lub phaj,

17 thiab cov ntaub xov laj kab, cov ncej, cov taw tiag ncej thiab daim ntaub ua rooj vag.

18 Thiab cov tswg uas txhos tsa (יחוח)Yahweh lub tsev thiab cov tswg uas txhos tuav laj kab thiab cov hlua,

19 thiab tej tsoos meej mom uas ntos tau zoo zoo uas hnav rau lub sijhawm mus ua (יחוח)Yahweh tes haujlwm hauv lub chaw dawb huv, yog cev tsoos meej mom dawb huv uas pov thawj Aloos hnav thiab tej tsoos meej mom uas nws cov tub hnav rau thaum lawv ua pov thawj li haujlwm.

20 Ces cov Ixayees sawv daws txawm rov qab ntawm Mauxes mus.

21 Txhua tus uas kub siab thiab zoo siab txawm nqa tej qhov txhia chaw tuaj pub rau (יחוח)Yahweh siv ua lub tsev ntaub sib ntsib, thiab siv ua txhua yam haujlwm rau hauv, thiab ua tej tsoos meej mom dawb huv.

22 Cov pojniam, txivneej txhua tus uas zoo siab pub, sawvdaws coj tej npauj kub, kauj co, tej nplhaib, thiab tej tooj npab, thiab tej saw kub tuaj. Txhua tus coj tej kub li no tuaj xyeem pub rau (יחוח)Yahweh.

23 Mas txhua tus uas muaj xov xiav, xov tsamxem, xov liab, thiab tej xov maj uas nkoov zoo zoo, thiab plaub tshis thiab tawv txiv yaj uas zas liab liab, thiab cov tawv ntshuab hiavtxwv nqa tuaj pub.

24 Txhua tus uas muaj nyiaj, muaj tooj liab, kuj coj tuaj pub rau (יחוח)Yahweh, thiab txhua tus uas muaj ntoo kub twm zoo siv kuj nqa tuaj pub.  

25 Cov pojniam sawvdaws uas txawj ua maj ua ntuag kuj coj tej xov maj xov ntuag uas xiav, thiab tsamxem, thiab liab, thiab coj xov maj uas nkoov zoo zoo tuaj pub.

26 Cov pojniam sawvdaws uas zoo siab thiab txawj saws plaub tshis kuj coj xov tshis tuaj pub.

27 Cov thawj coj kuj coj tej qe zeb iav txho ci lam lug, thiab tej qe zeb hlaws uas muaj nqis tuaj xaws lo lub tsho efauj thiab lub awv.

28 Thiab coj tej txuj lom thiab coj roj tuaj yog yuav siv sam teeb, thiab siv ua cov roj tsw qab, siv ua kevcai tsa, thiab siv ua cov hmoov tshuaj tsw qab hlawv xyeem.

29 Cov Ixayees cov pojniam txivneej sawvdaws uas kub siab pub qhov txhia chaw ua txhua yam haujlwm uas (יחוח)Yahweh kom Mauxes hais rau lawv ua lawd, kuj coj tuaj pub rau (יחוח)Yahweh raws li lawv zoo siab hlo pub.

​

Npexalees Thiab Auhaulias

(Khiavdim 31:1-11)

30 Mauxes hais rau cov Ixayees tias, saib maj, (יחוח)Yahweh twb xaiv Ulis tus tub Npexalees uas yog Hawj tus xeeb ntxwv, yog xeem Yahdah,

31 thiab (יחוח)Yahweh twb pub Tus Ntsuj Plig Dawbhuv puv npo rau nws kom nws muaj lajlim, tswvyim plab plaws, thiab txawj ntse, paub ua txhua tsav txhua yam,

32 Thiab txawj sau qauv, thiab muab nyiaj, muab kub, muab tooj liab, los ua tau txaij nraug zees,

33 thiab nws txawj npawm, thiab txhum tej qe zeb hlaws muab khawm lo rau lub me tais, txawj sais ntoo txaij zoo nkauj, nws txawj ua txhua yam uas zoo nkauj tag li.

34 (יחוח)Yahweh kuj pub Npexalees thiab Auhaulias uas yog Ahixamas tus tub, yog xeem Daj, nkawv muaj siab qhia lwm tus ua tau.

35 (יחוח)Yahweh pub tswvyim peevxwm rau ob tug no, nkawv thiaj txawj ua tau txhua yam haujlwm uas cov tub txawg tub ntse ua. Nkawv txawj sau qauv zoo zoo li, txawj siv xov xiav, xov tsamxem, xov liab thiab xov maj uas nkoov zoo zoo ua paj ntaub, thiab nkawv txawj ua txhua tsav txhua yam, thiab txawj xav sau qauv txaij nraug zees.