1 Npexalees thiab Auhaulias thiab txhua tus muaj peevxwm uas (יחוח)Yahweh twb pub tswvyim plab plaws thiab kev txawj kom ua tau txhua yam haujlwm ua lub chaw pe hawm (יחוח)Yahweh mas sawvdaws yuav ua txhua yam raws li (יחוח)Yahweh twb hais tseg lawd.

​

Cov Pejxeem Pub Rau (יחוח)Yahweh

2 Mauxes hu Npexalees thiab Auhaulias thiab sawvdaws uas muaj peevxwm ua, uas (יחוח)Yahweh twb pub tswvyim plab plaws rau lawv lawd, yog txhua tus uas kub siab ua haujlwm kom tuaj ua haujlwm.

3 Lawv txais tej qhov txhia chaw ntawm Mauxes txhais tes, yog tej uas cov Ixayees zoo siab coj tuaj pub ua lub chaw pe hawm (יחוח)Yahweh lawd. Cov pejxeem kuj niaj tagkis coj tej qhov txhia chaw uas lawv zoo siab pub tuaj pub.

4 Cov tibneeg uas txawj ua txhua yam haujlwm hauv lub chaw pe hawm (יחוח)Yahweh txawm tso haujlwm tseg,

5 sawvdaws ua ke mus hais rau Mauxes tias, cov pejxeem coj qhov txhia chaw tuaj ntau dhau txhua yam haujlwm uas (יחוח)Yahweh kom peb ua lawm.

6 Mauxes thiaj tshaj tawm thoob plaws zej zog rau sawvdaws tias, pojniam, txivneej, tsis txhob coj qhov txhia chaw tuaj pub ua lub chaw pe hawm (יחוח)Yahweh lawm. Mas cov pejxeem thiaj tseg tsis coj tuaj pub lawm,

7 vim cov uas muaj twb txaus ua txhua yam haujlwm thiab siv tsis tag.

​

(יחוח)Yahweh Lub Tsev Ntaub Sib Ntsib

(Khiavdim 26:1-37)

8 Cov uas txawj ua mas lawv muab kaum chaws ntaub mag ua (יחוח)Yahweh lub tsev, yog lawv muab cov xov maj uas nkoov zoo zoo thiab xov xiav, xov tsamxem thiab xov liab ntos ua, thiab cov Kws txawj ntos, ntos ua duab Khelunpees rau hauv.

9 Ib chaws ntaub ntev nees nkaum yim tshim, dav plaub tshim, txhua chaws ntaub dav ntev ib yam nkaus.

10 Nws muab tsib chaws ntaub xaws ua ke ua ib daig, muab tsib chaws xaws ua ib daig.

11 Nws muab cov ntaub xiav xaws ua ntsej rau daim ntug ntaub uas ib, thiab ua ntsej rau daim ntug ntaub uas ob ib yam nkaus.

12 Nws ua tsib caug lub ntsej rau daim ntug ntaub uas ib, thiab ua tsib caug lub ntsej rau daim uas ob, sab npoo uas txuas ua ke kom sib ncaj nkaus.

13 Thiab nws muab kub los ua tsib caug lub khawb los khawm ob daig ntaub ntawd kom ua kiag ib daig ua (יחוח)Yahweh lub tsev.

14 Nws muab plaub tshis los ntos ua kaum ib chaws ntaub vov kiag (יחוח)Yahweh lub tsev.

15 Ib chaws ntaub ntev peb caug tshim, dav plaub tshim, kaum ib chaws ntaub dav ntev ib yam nkaus.

16 Nws muab tsib chaws ntaub xaws ua ke ua ib daig, muab rau chaws, xaws ua ib daig.

17 Nws ua tsib caug lub ntsej rau daim ntug ntaub uas ib, thiab ua tsib caug lub ntsej rau daim ntug ntaub uas ob, sab npoo ntaub uas txuas ua ke.

18 Nws muab tooj liab ua tsib caug lub khawb thiaj khawm tau ob daig ntaub kom ua kiag ib daig.

19 Nws muab cov tawv txiv yaj uas zas liab lawd los ua ntaub vov lub tsev ntaub thiab muab cov tawv ntshuab hiavtxwv los ua ntaub vov txheej saud. 

20 Nws muab ntoo kub twm los ua tab tsa xov (יחוח)Yahweh lub tsev.

21 Cov tab ntawd, ntev kaum tshim, dav ib tshim txhais. 

22 Ib daim ntoo tab mas nws thais ua ob tug taw thiaj txuas tau ua ke. Nws ua txhua daim ntoo tab li no coj los ua (יחוח)Yahweh lub tsev.

23 Nws ua nees nkaum daim ntoo tab xov (יחוח)Yahweh lub tsev sab nrad,

24 thiab muab nyiaj ua plaub caug tus taw tiag nees nkaum daim ntoo tab li taw, ib daim ntoo tab ntxig rau ob tug taw.

25 Nws ua nees nkaum daim ntoo tab xov (יחוח)Yahweh lub tsev sab ped,

26 thiab ua plaub caug tus taw nyiaj tiag hauv taw, ib daim ntoo tab ntxig rau ob tug taw tiag.

27 Nws ua rau daim ntoo tab xov (יחוח)Yahweh lub tsev sab qaum tsev uas hnub poob.

28 Nws ua ob daim ntoo tab xov ob lub kaum tsev ntaub uas yog sab qaum tsev.

29 Ob daim ntoo tab ntawd mas hauv taw, lawv muab ib daim txawb qes mentsis rau sab nraud, saum hau daim ntoo, lawv muab teem ti nkaus lub ntsej saum kawg. Nws ua li no rau ob lub kaum tsev ntaub.

30 Sab hnub poob muaj yim daim ntoo tab xov thiab muaj kaum rau tus taw nyiaj, ib daim ntoo tab ntxig rau ob tug taw. 

31 Nws muab ntoo kub twm ua tsib tug las tuav (יחוח)Yahweh lub tsev ib sab phab ntsa,

32 thiab ua tsib tug las rau dua ib sab thiab ua tsib tug rau sab qaum tsev uas hnub poob.

33 Nws ua tus las nruab nrab uas tuav cov ntoo, ntev keev kiag txij ib lub kaum tsev txog ntua ib lub kaum tsev.

34 Nws muab kub luam cov ntoo tab ntawd thiab muab kub ua cov ntsej uas ntxig cov las ntawd, thiab muab kub luam cov las huvsi.

35 Nws muab xov xiav, xov tsamxem, xov liab thiab xov maj uas nkoov zoo zoo ua ib daim ntaub thaiv thiab cov Kws txawj ntos, ntos ua duab Khelunpees rau hauv.

36 Nws muab ntoo kub twm los ua plaub tug ncej thiab muab kub luam cov ncej huvsi. Nws muab kub ua nqe lauj thiab muab nyiaj nchuav ua plaub tug taw tiag cov ncej ntawd.

37 Nws muab xov xiav, xov tsamxem, xov liab thiab xov maj uas nkoov zoo zoo ua ib daim ntaub, ua lub qhov rooj tsev ntaub, thiab ua paj ntaub rau.

38 Nws ua tsib tug ncej, muaj nqe lauj dai daim ntaub ntawd. Nws muab kub ua ib lub tais khwb cov hau ncej thiab muab kub ua thi rau saum cov hau ncej thiab nws muab tooj liab ua tsib tug taw ncej tiag cov ncej ntawd.