Lub Phij Xab Nrog (יחוח)Yahweh  Sib Cog Lus

(Khiavdim 25:10-20)

1 Npexalees muab ntoo kub twm ua lub phij xab, ntev ob tshim txhais, dav ib tshim txhais, thiab siab ib tshim txhais.

2 Nws muab cov tseem kub luam tag nrho lub phij xab ntawd sab hauv, sab nraud huvsi thiab muab kub ua ib tug caj ntswm puag ncig lub phij xab.

3 Nws muab kub nchuav ua plaub lub ntsej tis rau plaub lub kaum phij xab, ua ib sab ob lub ntsej.

4 Nws muab ntoo kub twm ua ob tug las kwv thiab muab kub luam ob tug las ntawd huvsi.

5 Mas muab ntxig rau cov ntsej ntawm lub phij xab ob sab thiaj kwv tau lub phij xab.

6 Nws muab cov tseem kub ua lub hau phij xab uas roos kev txhaum, ntev ob tshim txhais, dav ib tshim txhais.

7 Nws muab kub ntaus ua ob tug Khelunpees txawb rau ob tog hau phij xab.

8 Nws ua ob tug Khelunpees ntawd, ib tug nyob ib tog hau phij xab lo xeeb keeb nkaus rau lub hau phij xab uas roos kev txhaum. 

9 Ob tug ntawd nthuav tis los roos saum lub hau phij xab, ob tug ntawd tig xubntiag ua ke, yog tig los saib lub hau phij xab uas roos kev txhaum.

​

Lub Rooj 

(Khiavdim 25:23-30)

10 Nws muab ntoo kub twm ua ib lub rooj, ntev ob tshim, dav ib tshim, thiab siab ib tshim txhais.

11 Nws muab cov tseem kub luam lub rooj ntawd huvsi thiab muab kub ua ib tug caj ntswm puag ncig lub rooj ntawd.

12 Nws ua ib daim ntoo dav ib xib thaiv puag cig lub npoo rooj thiab muab kub ua ib tug caj ntswm lo puag ncig daim ntoo ntawd.

13 Nws muab kub nchuav ua plaub lub ntsej tis rau plaub lub kaum rooj uas ncaj plaub tug ceg rooj.

14 Nws muab cov ntsej ntawd lo ze ze daim ntoo thiaj ntxig tau las kwv.

15 Nws muab ntoo kub twm ua ob tug las kwv lub rooj thiab muab kub luam ob tug las huvsi.

16 Nws muab cov tseem kub ua tej twj uas siv saum lub rooj, yog tais pliab, tais ntim rau hmoov tshuaj tsw qab, thiab tais phaj thiab tej pav lam hwj uas hliv cawv txiv hmab xyeem.

​

Lub Teeb Kub

(Khiavdim 25:31-40)

17 Nws muab cov tseem kub ua tus kav teeb. Nws ntaus ua lub taw thiab tus ncej teeb thiab ua cov tais zoo li paj thiab cov qia paj thiab cov nplai paj lo xeeb keeb nkaus rau tus kav teeb.

18 Tus kav teeb no ncau ua rau ceg, ib sab ncau peb ceg.

19 Txhua ceg muaj peb lub paj zoo li paj txiv duaj, txhua lub paj muaj lub qia paj thiab cov nplai paj rau rau ceg uas ncau ntawm tus kav teeb huvsi.

20 Tus tseem kav teeb muaj plaub lub paj txiv duaj uas muaj lub qia paj thiab cov nplai paj huvsi.

21 Rau ceg ntawd, txhua nkawm ceg uas ncau ntawm tus kav teeb, muaj ib lub qia paj nyob hauv qab.

22 Cov qia paj ntawd thiab cov ceg teeb lo xeeb keeb nkaus rau tus kav teeb, yog muab cov tseem kub ntaus ua.

23 Nws muab cov tseem kub ua xya lub teeb uas txawb saum xya ceg teeb ntawd, thiab ua rab txiab uas txiav teeb xeeb thiab ua lub phaj pliab uas rau txiab.

24 Nws muab cov tseem kub, nyhav ib talas ua lub teeb kub thiab tej twj uas siv ntawm lub teeb ntawd.

​

Lub Thaj Hlawv Hmoov Tshuaj Tsw Qab

(Khiavdim 30:1-5)

25 Nws muab ntoo kub twm ua lub thaj hlawv hmoov tshuaj tsw qab. Nws ua dav xwm fab xwm meem, ntev ib tshim, dav ib tshim, siab ob tshim. Cov kub ntawm kaum thaj mas yog ua keev kiag ntawm lub thaj los.

26 Nws muab cov tseem kub luam kiag lub thaj sab saud thiab plaub fab thiab cov kub thaj huvsi thiab muab kub ua ib tug caj ntswm lo puag ncig lub thaj.

27 Nws muab kub ua ob lub ntsej tis rau hauv tus qab caj ntswm ntawd, ib lub ib sab kom sib ncaj, mas thiaj ntxig tau las kwv mus.

28 Nws muab ntoo kub twm los ua ob tug las kwv thiab muab kub luam ob tug las ntawd.

29 Nws ua cov roj tsw qab dawb huv uas siv ua kevcai tsa thiab ua cov hmoov tshuaj tsw qab zoo zoo uas hlawv xyeem, ua tau zoo yam nkaus li tus Kws txawj ua tshuaj tsw qab ua.