Xaws Tej Tsoos Meej Mom Pov Thawj

1Lawv muab cov xov xiav, xov tsam xem, xov liab ntos zoo zoo ua tej tsoos uas hnav mus ua haujlwm hauv lub chaw dawb huv, thiab ua cev tsoos meej mom dawb huv rau Aloos, raws li (יחוח)Yahweh hais rau Mauxes.

​

Lub Tsho Efauj

(Khiavdim 28:6-14)

2 Lawv muab kub thiab xov xiav, xov tsamxem, xov liab, thiab xov maj uas nkoov zoo zoo ua lub tsho efauj.

3 Lawv ntaus tej daim kub nyias nyias muab txiav ua tej pluaj me me, ntos nrog cov xov xiav, xov tsamxem, xov liab thiab cov xov maj uas nkoov zoo zoo, thiaj ua tau zoo nkauj txaij nraug zees.

4 Lawv ua ob pluaj ntaub khuam lub tsho efauj ntawm xub pwg, muab teem rau ob sab xub pwg tsho.

5 Txoj siv sia uas ntos zoo zoo uas muab xaws lo rau lub tsho efauj, mas lawv ua ib yam nkaus li lub tsho efauj, yog lawv muab cov xov kub thiab xov xiav, xov tsamxem, xov liab thiab cov xov maj uas nkoov zoo zoo ntos ua, raws li uas (יחוח)Yahweh hais rau Mauxes.

6 Lawv muab xov kub qhaib ua ob lub tais kub txaij mos mos khawm ob lub qe zeb iav txho ci lam lug, thiab lawv txaug Ixayees cov tub li npe rau hauv ob lub qe zeb iav ntawd, ib yam nkaus li txaug txwm.

7 Lawv muab xaws lo nkaus rau pluaj ntaub uas khuam lub tsho efauj ntawm ob sab xub pwg, ua lub chaw uas nco ntsoov Ixayees cov tub, raws li (יחוח)Yahweh hais rau Mauxes.

​

Lub Awv

(Khiavdim 28:15-30)

8 Lawv ua ib lub awv zoo nkauj txaij nraug zees. Lawv muab xov kub thiab xov xiav, xov tsamxem, xov liab thiab cov xov maj uas nkoov zoo zoo ua ib yam nkaus li ua lub tsho efauj.

9 Lub awv xwm fab dav ib dos, ntev ib dos, thiab sab hauv khoob ua ib lub hnab.

10 Lawv muab kaum ob lub qe zeb hlaws uas muaj nqis teem ua plaub leej rov ntav rau ntawm lub awv ntawd. Leej saum uas yog leej ib, mas yog peb lub qe zeb, ib lub qe zeb liab tsim tseb, ib lub qe zeb daj pes lis, ib lub qe zeb ntsuab liab.

11 Leej uas ob, mas yog ib lub qe zeb ntsuab txho, ib lub qe zeb phaithus tsamxem, ib lub qe zeb hlaws iav.

12 Leej uas peb, mas yog ib lub qe zeb ntsuab xiav, ib lub qe zeb uas txho taws, ib lub qe zeb tsamxem zem ziv.

13 Leej uas plaub, mas yog ib lub qe zeb ntsuab pes xiab, ib lub qe zeb iav txho ci lam lug, thiab ib lub qe zeb daj tshiab tshiab. Mas muab cov tseem xov kub qhaib ua kaum ob lub tais kub txaij mos mos khawm cov qe zeb ntawd.

14 Kaum ob lub qe zeb hlaws ntawd, yuav muaj Ixayees cov tub tej npe txaug rau hauv ib yam nkaus li txaug txwm, muaj kaum ob xeem, ib xeem zuj zus li npe nyob rau hauv.

15 Lawv muab cov tseem xov kub ntswj ua ib txoj saw kheej zoo li txoj hlua tis rau lub awv.

16 Lawv muab xov kub ua ob lub tais kub txaij mos mos thiab muab kub ua ob lub ntsej mas muab ob lub ntsej tis rau ob lub kaum awv.

17 Lawv muab ob txoj qab saw kub los khawm rau ob lub ntsej ntawm ob lub kaum awv,

18 thiab muab ob yav qab saw sauv tis rau ob lub tais kub txaij mos mos uas muab lo rau lub tsho efauj ntawm ob sab xub pwg, sab xubntiag.

19 Lawv muab kub ua ob lub ntsej tis rau ob lub kaum awv hauv qab sab hauv uas npuas lub tsho efauj.

20 Lawv muab kub ua ob lub ntsej tis rau ob pluaj ntaub ntawm xub pwg, ntawm lub tsho efauj sab xubntiag ze kab lej leeg tsho ntawm txoj siv sia uas ntos zoo zoo sab saud.

21 Lawv muab xov xiav ntswj ua ob txoj hlua khi ob lub ntsej awv sab hauv rau ob lub ntsej ntawm lub tsho efauj, lub awv thiaj nyob sab sauv txoj siv sia uas ntos zoo zoo uas sia ntawm duav thiaj tsis plam ntawm lub tsho efauj, raws li (יחוח)Yahweh hais rau Mauxes.

​

Lub Tsho Ntev Thiab Txoj Phuam

(Khiavdim 28:31-43)

22 Lawv muab xov xiav ntos ua lub tsho ntev phim lub tsho efauj.

23 Lawv ua lub tsho no yog lub tsho looj thiab lawv muab lub ntsej tsho ntawd foob zoo zoo thiaj tsis ntuag.

24 Lub qab tsho ntawd mas lawv muab xov xiav, xov tsamxem, xov liab, thiab cov xov maj uas nkoov zoo zoo qhaib ua tej lub zoo li txiv ntsiav kws dai rau.

25 Thiab lawv muab cov tseem kub ua tej lub tswb los dai quas cov txiv ntsiav kws thoob plaws ntawm lub qab tsho ntev ntawd.

26 Dai ib lub tswb quas ib lub txiv ntsiav kws, dai li no thoob plaws lub qab tsho ntev uas hnav ua (יחוח)Yahweh li haujlwm, raws li (יחוח)Yahweh hais rau Mauxes. 

27 Lawv muab cov xov maj uas nkoov zoo zoo ntos ua tsho rau Aloos thiab nws cov tub,

28 Thiab muab cov xov maj nkoov zoo zoo ua mom, ua phuam, thiab ua ris luv,

29 thiab muab cov xov maj nkoov zoo zoo thiab xov xiav, xov tsamxem, xov liab, ntos txoj siv sia thiab ua paj rau thiab, raws li (יחוח)Yahweh hais rau Mauxes.

30 Lawv muab cov tseem kub ntaus ua ib pluaj kub uas dawb huv thiab txaug npe ntawv rau hauv zoo ib yam li txaug rau ntawm daim phiaj hais tias, Dawb Huv rau (יחוח)Yahweh.

31 Thiab muab xov xiav ua hlua khi pluaj kub ntawd rau saum hau phuam, raws li (יחוח)Yahweh hais rau Mauxes.

​

Ua Txhua Yam Hauv Lub Tsev Ntaub Tiav

(Khiavdim 35:10-19)

32 Lawv ua (יחוח)Yahweh lub tsev uas yog lub tsev ntaub sib ntsib txhua yam tiav. (יחוח)Yahweh hais li cas rau Mauxes, cov Ixayees kuj ua txhua yam tiav li ntawd.

33 Lawv coj txhua yam uas ua (יחוח)Yahweh lub tsev los rau Mauxes, yog lub tsev ntaub thiab tej twj uas siv huvsi, tsis hais cov nqe lauj, cov ntoo tab, cov las, cov ncej thiab cov taw tiag hauv taw,

34 thiab cov tawv txiv yaj uas zas liab lawd, thiab cov tawv ntshuab hiavtxwv uas vov lub tsev ntaub txheej saud, thiab daim ntaub mag uas thaiv,

35 thiab lub phij xab sib cog lus, cov las kwv, thiab lub hau phij xab uas roos kev txhaum,

36 thiab lub rooj, thiab tej twj uas siv saum lub rooj, thiab cov ncuav uas xyeem txawb rau ntawm (יחוח)Yahweh xubntiag,

37 thiab tus kav teeb tseem kub, thiab tej teeb uas nyob saum tus kav teeb, thiab txhua yam twj siv tu lub teeb, thiab cov roj sam teeb,

38 thiab lub thaj kub, thiab cov roj tsw qab siv ua kevcai tsa, thiab cov hmoov tshuaj tsw qab, thiab daim ntaub uas ua qhov rooj tsev ntaub,

39 thiab lub thaj tooj liab uas hlawv qhov txhia chaw xyeem, thiab daim tsuav ntxaij tooj liab, thiab cov las kwv, thiab tej twj siv saum lub thaj, thiab lub phaj ntxuav tes taw, thiab lub chaw txawb lub phaj,

40 Thiab cov ntaub xov laj kab, cov ncej, cov taw tiag ncej, thiab daim ntaub ua rooj vag, cov hlua, thiab cov tswg uas txhos tuav laj kab, thiab txhua yam twj uas siv ua haujlwm hauv (יחוח)Yahweh lub tsev uas yog lub tsev ntaub sib ntsib,

41 thiab tej tsoos meej mom uas ntos tau zoo zoo uas hnav rau lub sijhawm mus ua (יחוח)Yahweh tes haujlwm hauv lub chaw dawb huv, yog cev tsoos meej mom dawb huv uas pov thawj Aloos hnav thiab tej tsoos meej mom uas nws cov tub hnav rau thaum ua pov thawj li haujlwm.

42 Txhua yam uas (יחוח)Yahweh hais kom Mauxes ua lawd, mas cov Ixayees kuj ua tiav huvsi.

43 Mauxes mus tshuaj saib tej haujlwm txhua yam mas pom tias lawv ua raws nraim li uas (יחוח)Yahweh hais lawd, ces Mauxes txawm foom koob hmoov rau lawv.