Mauxes Tsa (יחוח)Yahweh Lub Tsev Ntaub

1 (יחוח)Yahweh hais rau Mauxes tias,

2 Lub ib hlis ntuj, hnub xiab ib, koj cia li tsa kuv lub tsev uas yog lub tsev ntaub sib ntsib. 

3 Thiab muab lub phij xab sib cog lus tso rau hauv lub tsev ntaub, thiab muab ib daim ntaub thaiv kem lub phij xab.

4 Nqa lub rooj los txawb rau hauv, thiab muab tej twj uas siv txawb saum lub rooj, nyias nyob nyias chaw, thiab nqa tus kav teeb los txawb rau thiab muab cov teeb txawb rau saud.

5 Txawb lub thaj kub uas hlawv hmoov tshuaj tsw qab ncaj rau ntawm lub phij xab sib cog lus chav nraum no, thiab muab daim ntaub khuam ua qhov rooj rau kuv lub tsev ntaub.

6 Teeb lub thaj uas hlawv qhov txhia chaw xyeem ncaj ntawm kuv lub tsev lub qhov rooj uas yog lub tsev ntaub sib ntsib sab nraud,

7 thiab muab lub phaj ntxuav tes taw txawb rau ntawm lub tsev ntaub sib ntsib thiab lub thaj kem nruab nrab, thiab nqa dej rau hauv lub phaj.

8 Xov laj kab puag ncig lub tsev ntaub ntawd thiab muab daim ntaub khuam ua rooj vag.

9 Muab cov roj tsw qab siv ua kevcai tsa hliv ywg kuv lub tsev thiab txhua yam uas nyob hauv, thiab ua kevcai tu kom kuv lub tsev thiab txhua yam ntawd dawb huv rau kuv, mas lub chaw pe hawm (יחוח)Yahweh thiaj dawb huv.

10 Thiab muab cov roj ntawd hliv ywg lub thaj uas hlawv xyeem thiab tej twj uas siv ntawm lub thaj huvsi ua kevcai tu kom dawb huv rau kuv, mas lub thaj ntawd thiaj dawb huv kawg nkaus.

11 Thiab muab cov roj tsw qab ntawd hliv ywg lub phaj thiab lub chaw uas txawb lub phaj ua kevcai tu kom dawb huv rau kuv.

12 Coj Aloos thiab nws cov tub los rau ntawm lub qhov rooj tsev ntaub sib ntsib thiab muab dej ntxuav lawv. 

13 Muab cev tsoos meej mom uas dawb huv rau Aloos hnav, thiab muab cov roj tsw qab hliv ywg rau nws, ua kevcai tu kom nws dawb huv rau kuv, mas nws thiaj ua tau pov thawj ua kuv tes haujlwm.

14 Coj Aloos cov tub tuaj thiab muab tej tsoos meej mom rau lawv hnav.

15 Muab cov roj tsw qab hliv ywg lawv ib yam nkaus li ywg rau lawv txiv, lawv thiaj ua tau pov thawj ua kuv tes haujlwm. Qhov uas muab roj hliv ywg ua kevcai tsa li ntawd, ua rau lawv muaj feem ua pov thawj ib txhiab, ib txhis, ib tiam dhau ib tiam mus li.

16 Mauxes ua txhua yam raws li uas (יחוח)Yahweh hais.

17 Xyoo ob, lub ib hlis ntuj, hnub xiab ib, Mauxes txawm tsa (יחוח)Yahweh lub tsev ntaub.

18 Mauxes tsa (יחוח)Yahweh lub tsev li no, nws teem cov taw tiag, thiab tsa cov ntoo tab, thiab ntxig las rau cov ntoo tab thiab tsa cov ncej.

19 Nws muab chaws ntaub los vov (יחוח)Yahweh lub tsev thiab muab cov tawv vov lub tsev ntaub txheej saud raws li (יחוח)Yahweh hais rau nws.

20 Nws muab ob daim txhib zeb uas sau (יחוח)Yahweh tej lus tso rau hauv lub phij xab thiab ntxig ob tug las kwv rau lub phij xab thiab muab lub hau uas roos kev txhaum kaw rau.

21 Nws muab lub phij xab kwv los rau hauv (יחוח)Yahweh lub tsev thiab dai daim ntaub kem lub phij xab sib cog lus, raws li (יחוח)Yahweh hais rau Mauxes.

22 Mauxes muab lub rooj txawb rau hauv lub tsev ntaub sib ntsib chav nraum daim ntaub thaiv sab ped,

23 thiab muab cov ncuav tso rau saum lub rooj kom nyias nyob nyias chaw ntawm (יחוח)Yahweh xubntiag, raws li (יחוח)Yahweh hais rau nws.

24 Mauxes muab tus kav teeb txawb rau hauv lub tsev ntaub sib ntsib sab nram ncaj nkaus lub rooj,

25 thiab muab cov teeb txawb rau saud rau ntawm (יחוח)Yahweh xubntiag, raws li (יחוח)Yahweh hais rau nws.

26 Mauxes muab lub thaj kub txawb rau hauv lub tsev ntaub sib ntsib, ti nkaus daim ntaub thaiv chav nraum,

27 Mas nws hlawv tej hmoov tshuaj tsw qab rau saum lub thaj ntawd, raws li (יחוח)Yahweh hais rau nws.

28 Mauxes muab daim ntaub khuam ua (יחוח)Yahweh lub tsev, lub qhov rooj.

29 Nws teeb lub thaj uas hlawv qhov txhia chaw xyeem sab nraud ncaj (יחוח)Yahweh lub tsev lub qhov rooj uas yog lub tsev ntaub sib ntsib. Nws muab qhov txhia chaw ua kevcai hlawv huvsi xyeem thiab ua kevcai xyeem qoob loo, raws li (יחוח)Yahweh hais rau nws.

30 Mauxes muab lub phaj txawb cia rau ntawm lub tsev ntaub sib ntsib thiab lub thaj ntu nruab nrab, thiab nws muab dej rau hauv ua chaw ntxuav.

31 Mauxes thiab Aloos thiab Aloos cov tub kuj siv cov dej hauv lub phaj ntawd, ntxuav tes, ntxuav taw.

32 Thaum lawv yuav mus hauv lub tsev ntaub sib ntsib lossis mus ze lub thaj thaum twg, lawv yuav tau ntxuav tes, ntxuav taw ua ntej, raws li (יחוח)Yahweh hais rau Mauxes lawm.

33 Mauxes xov laj kab puag ncig (יחוח)Yahweh lub tsev thiab lub thaj, thiab nws muab daim ntaub khuam ua qhov rooj vag. Nws ua ib puas tsav yam ntawd tiav tag nrho huvsi.

​

Huab Los Roos Ti Nkaus Lub Tsev Ntaub Sib Ntsib

34 Lub sijhawm ntawd, tus ncej huab los roos ti nkaus lub tsev ntaub sib ntsib thiab (יחוח)Yahweh lub hwjchim ci ntsa iab puv nkaus hauv (יחוח)Yahweh lub tsev.

35 Mauxes nkag tsis tau rau hauv lub tsev ntaub sib ntsib, vim tus ncej huab los roos ti nkaus lub tsev thiab (יחוח)Yahweh lub hwj chim ci ntsa iab puv nkaus hauv (יחוח)Yahweh lub tsev ntawd.

36Ncua sijhawm uas lawv pheej tsiv ntawd, yog tus ncej huab txav ntawm (יחוח)Yahweh lub tsev mus thaum twg, ces cov Ixayees yuav tau sawv kev tsiv mus thaum ntawd.

37 Yog tus ncej huab tsis txav mus mas lawv kuj tsis tawm mus li, lawv tos mus txog hnub uas tus ncej huab txav mus tso.

38 Ncua sijhawm uas lawv pheej tsiv ntawd, nruab hnub, (יחוח)Yahweh tus ncej huab nyob saum (יחוח)Yahweh lub tsev, hmo ntuj, tus ncej huab ntawd ci li nplaim taws tab meeg cov Ixayees sawvdaws pom.